Alkitab Karaoke

Loading audio...

Catatan: Perhitungan audio timestamp (ketepatan waktu antara audio dan teks) berdasarkan perhitungan mesin / algoritma.

¹ [Kenca bage erjabap ka Jop nina,] "Kuga maka lalap aku ipesega-segandu? Getem pusuhku erkiteken ranandu.

² (Ayb 19:1)

³ Nggo piga-piga kali aku isakitindu; la kin kam mela ngidah perbahanenndu bangku?

⁴ Di ersalah gia aku, lit kin i je rugindu?

⁵ Ulin akapndu kam asa aku, janah kiniseranku enda, akapndu jadi buktina, maka aku ersalah tuhu-tuhu.

⁶ Tapi arus itehndu, maka la bujur perbahan Dibata bangku. Nggo itogengna siding i kelewetku, lako nangkap aku.

⁷ Serko aku, "Kejam Dibata!" Tapi la lit si ngaloisa. Nderkuh aku mindo keadilen, tapi pernderkuhku la ibegiken.

⁸ Nggo irambeng Dibata dalanku, IgelapiNa pe, emaka aku lanai banci mentas arah e.

⁹ Kebayaken IrampasNa kerina, kemulianku pe IcedakenNa.

¹⁰ Arah apai pe aku IrambasNa, desken ngeruah batang kayu IbahanNa. Pengarapenku IruahNa kerina, emaka bene me aku.

¹¹ Pernembeh ate Dibata gara bangku, janah MusuhNa kal AkapNa aku.

¹² IsuruhNa TenteraNa merang aku, ikalina parik, ikepungna sapo-sapongku.

¹³ Dibata kap mahanca maka aku itadingken senina-seninangku janah kalak si kutandai lanai akapna aku teman.

¹⁴ Kade-kadengku ras temanku meriah, kerina nggo nilah;

¹⁵ janah kalak si gelgel jadi temuengku, nggo ngelupaken aku genduari.

¹⁶ Kudilo suruh-suruhenku, tapi la aku ialoina; aminna pe kupindo perkuah atena.

¹⁷ Mutah ate ndeharangku nganggeh bau kesahku, sembuyakku la nggit ndeher perban ciga atena aku.

¹⁸ Anak-anak pe nokoh-nokohi aku, adi tedis aku, itawa-tawaina aku.

¹⁹ Kandu-kandungku kal pe ciga atena aku, kalak si kukelengi kal, nggo salih jadi imbangku.

²⁰ Kulitku nari ngenca leket bas tulanku, narus-narus mate me aku.

²¹ O teman-temanku, mekuah min atendu aku, sabap nggo mekelek pengkenai tan Dibata aku.

²² Ngkai maka ikut-ikutndu Dibata erbahan ateku mesui? Langa kin akapndu bias erbahan mesui pusuhku?

²³ Oh, isuratken min kata-katangku i bas kitap, gelah iinget kalak pagi lalap.

²⁴ Tah iukir min i bas batu alu pahat besi, gelah asa ndigan pe ula masap nari.

²⁵ Tapi kuteh kap maka i Surga lit penebusku, janah kedungenna reh me Ia nampati aku.

²⁶ Aminna kulitku nggo ipan penakit kerina, kuidah me Dibata, asum aku i bas kulangku enda denga.

²⁷ Alu matangku jine pagi Ia kuidah, janah lanai Ia pagi bagi kalak man bangku. Bene ukurku sabap nindu ngerana,

²⁸ 'Uga ndia sibahan gelah mesui atena?' Idaramindu dalan lako nerang aku.

²⁹ Tapi genduari mbiarlah kam man pedang, pedang si maba ukumen Dibata erkiteken dosa, gelah itehndu maka lit kap Dibata si ngadili manusia."