Loading audio...
Error: Maaf, audio tidak dapat diputar.
(It seems your browser does not support HTMLMediaElement.playbackRate, so you will not be able to change the speech rate.)
Catatan: Perhitungan audio timestamp (ketepatan waktu antara audio dan teks) berdasarkan perhitungan mesin / algoritma.
1 Mingka appialimi Ayub, angkana, "Angngapa nainakke tulusu’ nucalla ngaseng, siagang nupa’risi lalang kana-kana?
2 (19:1)
3 Nupa’mole-moleia’ nuhina, siagang nusessa’ tena siri’nu.
4 Ebara’ angkana sala panggaukangku, tena olona ikau ngaseng lanapakarugi.
5 Nukanaka la’bi bajikangngangko na inakke? Susaku nukana a’jari butti ri kasalangku.
6 Assengi angkanaya inakke Nasessa’ Allata’ala, siagang Najakkalaka’ lalang ri sikko’Na.
7 A’jalloka’ lanri anjo kapallakkang kammaya, mingka tena manna sitau amparhatikanga’. Akkioka’ angkana, ‘Kemae kaadelanga’, mingka tena tau allangngereki sa’rangku.
8 Natongkoki Allata’ala oloangku, takkullea’ allalo, lorong-lorong kuoloa Napa’jari sassang pakka’.
9 Narampasaki sikontu barang-barangku, Napanraki areng bajikku.
10 Nalappassangngia’ battu ri kere-keremae, sanrapang tau ambi’bu aka’ lamung-lamung, nampa Nabolikka’ ta’ronang na kalumeng, kammaminjo bateku Naalleang sikontu panrannuangku.
11 A’rinra-rinrai larroNa Allata’ala mae ri nakke; Napa’jaria’ sangkamma musunNa.
12 Battui pasukanNa ambakkaia’, takkulleai nitahang; narompai oloangku, natammulili kemaku.
13 Napakabellai battu ri nakke bija pammanakangku; a’jari tau maraenga’ mae ri sikamma passiassengangku.
14 Napakabella ngasengi kalenna bija-bijangku siagang bela-belaku; agang-agangku takkaluppa ngasemmi ri nakke.
15 Ata bainea nakaluppaima’, karaenna ke’nanga; napasangkamma’ tau tenaya naassengi ke’nanga.
16 Kukioki atangku, mingka tappialiai ri nakke, manna kunyonyo’ siagang kana-kana baji’.
17 Turiballakku eroki ta’langnge angngaraki rasanna napasakku, sari’battang tangkakku taerokai a’reppese’ ri nakke.
18 Nihina’ ri ana’-anaka ri aganga; punna ammentenga’, nakakkalia’ ke’nanga.
19 Punna nacinikka’, sanna’ malla’na bela bajikku; nibokoia’ ri sikamma tu kukamaseanga.
20 Kalengku bukkuleng mami anrokoki buku-bukungku; sike’de’ mami kumate siagang allayang nyawaku.
21 He agang-agangku, kamaseang laloa’, saba’ nitunrunga’ ri limanNa Allata’ala.
22 Tulusu’ nijallakkangku ri Allata’ala, angngapa numminawang turu’ ri Ia anjallakkanga’? Tenapa nasangga pa’mai’nu ansessa’?
23 Oh, nicataki paleng kana-kanangku, sa’genna tuli laniu’rangi;
24 nipattoki siagang bassi mae ri batua, sollanna attahang sallo.
25 Kuassengi angkana nia’ Mappatojengku ri suruga; kale’bakkanna labattui antulunga’.
26 Manna bokka’-bokka’ siagang reppe’-reppe’ bukkulengku, mingka lalang nia’na ija tubuku, laccinika’ mae ri Allata’ala.
27 Mata kalengku laccini’ mae ri Ia, Iami a’jari sahabakku. Ancuruki pa’maikku lanri nukanana ngaseng,
28 ‘Antekamma bateta lantuntuki?’ A’boyako patteteang untu’ appare’ kara-kara.
29 Mingka kamma-kamma anne, malla’ laloko mae ri pa’dang; Saba’ larroi Allata’ala na Nahukkung tau dorakaya; jari nuassemmi angkanaya Allata’ala angngadeli rupataua."
sabda_ylsa
Yayasan Lembaga SABDA
sabda_ylsa
Selengkapnya
SABDA Alkitab
Podcast SABDA
Slideshare SABDA