Alkitab Karaoke

Loading audio...

Catatan: Perhitungan audio timestamp (ketepatan waktu antara audio dan teks) berdasarkan perhitungan mesin / algoritma.

¹ “Domma mandatei tonduyhu, domma mintop ari-aringku, domma ranggak tanoman bangku.

² Hape tong ope rehe-rehe bagianku, anjaha matangku manaron panreheion ni sidea.

³ Ham ma gabe jaminan bangku i lambung-Mu, anggo lang, ise ma na ra gabe jaminan bangku?

⁴ Ai domma ilingodkon Ham panimbangion humbani uhur ni sidea, halani ai seng tumaram pamonangon-Mu sidea.

⁵ Barang ise na mantahihon hasomanni laho mambuat untung, maningon horlom mata ni anakni holi.

⁶ Domma ibahen Ham ahu gabe umpama ni deba, gabe halak sitijuran ni deba do bohingku.

⁷ Horlom do matangku halani pusok ni uhurhu, anjaha ganup pagoringku doskon halinoh tumang.

⁸ Pala tarsonggot halak parpintor halani ai, anjaha sungkun-sungkun halak na so marpipot pasal halak parjahat.

⁹ Tapi tene tong do marsijoloman uhur ni parpintor mandalani dalanni, lambin tambah tene gogoh ni halak siborsih tangan.

¹⁰ Mulak-ulak pe hanima roh, halak na pentar lang jumpah ahu i tongah-tongahnima.

¹¹ Domma sayop ari-aringku, domma seda sura-surangku, pangindoan ni uhurhu.

¹² Sihol do bahenon ni sidea borngin gabe arian, dohoran mando na siang humbani na golap.

¹³ Porini pe marpangarapan ahu hujai, nagori toruh mando rumahku, anjaha ibagas hagolapan huamparhon apeihu.

¹⁴ Dilo-dilo pe ahu hubani tanoman ai, ʻBapa!ʼ Ampa hubani goya ai, ʻInang!ʼ Atap, ʻBotou!ʼ

¹⁵ ija ma pangarapan-pangarapankai? Anjaha tuahkai, ise ma na boi patuduhkon ai?

¹⁶ Turun do ai rapkon ahu hu nagori toruh, rap do hanami tuad hubagas orbuk.