Alkitab Karaoke

Loading audio...

Catatan: Perhitungan audio timestamp (ketepatan waktu antara audio dan teks) berdasarkan perhitungan mesin / algoritma.

¹ Ujung geluhku nggo ndeher, nandangi mutus me kesahku, kuburen nari ngenca kerajangku.

² Aku ikeleweti kalak si nguru-nguru, matangku ngidah uga gombangna ia bangku.

³ Bujur nge aku; o Dibata, teklah Kam bangku, tapi ise nggit njamini aku?

⁴ Nggo ItutupNdu ukurna maka la iertina, emaka ula pelepas aku italukenna.

⁵ Nina kuan-kuan, ise ngaduken temanna lako muat untung, anak-anakna pagi ndatken balasna.

⁶ Genduari alu kuan-kuan e aku isaling-saling, temanku reh ayongku icidurina.

⁷ Matangku meriben perban ateku ceda, kerina ringringku bagi awih kertangna.

⁸ Kalak si ngaku dirina bujur, tersengget ngidah si enda, janah kerina ia ngatakenca maka la aku mbiar man Dibata.

⁹ Kalak si ngaku dirina bujur, reh tetapna ukurna, maka cara resgeluhna ngena ate Dibata.

¹⁰ Tapi bicara kerina ia reh, tedis i lebe-lebengku, sekalak pe i bas ia labo lit si pentar tuhu-tuhu.

¹¹ Wari-waringku nggo mentas, si kusuraken la seh, pengarapenku melengas.

¹² Tapi nina teman-temanku, "berngi e kap suari, nandangi terang me." Tapi kueteh maka aku tetap i bas gelap.

¹³ Doni kematen nari ngenca kuarapken, jadi inganku medem i bas kegelapen.

¹⁴ Kuburen kubahan jadi bapangku; gaya ras kobe si mangani dagingku e kubahan jadi nandengku ras turangku.

¹⁵ Dage, ma lanai lit si banci kuarapken? Ise nari banci nuduhken bangku?

¹⁶ Tupung aku nusur ku doni kematen, pengarapenku la banci berkat ras aku.