Loading audio...
Error: Maaf, audio tidak dapat diputar.
(It seems your browser does not support HTMLMediaElement.playbackRate, so you will not be able to change the speech rate.)
Catatan: Perhitungan audio timestamp (ketepatan waktu antara audio dan teks) berdasarkan perhitungan mesin / algoritma.
1 Tape Ayyub nyaot, "Sengko’ la seggut ngedhing se kantha jareya; pangleporra ba’na pera’ daddi seksa’an.
2 (16:1)
3 Bila ba’na se ambuwa acaca? Polana apa ba’na me’ terros ban-labanan?
4 Ja’ sakenga ba’na daddi sengko’ ban sengko’ daddi ba’na, sengko’ bisa acaca kantha jareya keya. Bi’ sengko’ ba’na eberri’ana babala’an ros-terrosan, sambi pek-kepeggan tadha’ ambuna.
5 Atena ba’na epakowada ban babala’an se bannya’ macemma, sarta elepora ban tang caca.
6 Mon sengko’ acaca, tang kasossa’an ta’ kera korang, mon sengko’ neng-enneng, apa gunana?
7 Sengko’ epace’lessona bi’ Allah; tang ana’ bine epamate tadha’ karena.
8 Sengko’ etangkep ban ekamoso. Sateya tang badan sampe’ koros, oreng sabannya’na nganggep jareya buktena ja’ sengko’ reya bannya’ dusana.
9 Allah ce’ dukana, tang aba’ ebit-sebbit tadha’ karena; se ngoladi sengko’ katon ce’ baji’na.
10 Oreng bi-nyebbi sengko’ bi’ colo’na se ebukka’ epalebar; sengko’ egaruyu’, ban tang pepe etamper.
11 Bi’ Allah sengko’ eparengngagi ka oreng daraka, eontallagi ka tanangnga oreng durjana.
12 Dha’-adha’na sengko’ odhi’ taremtem ban aman, tape bi’ Allah pas eserrang daksakala. Tang le’er ecangkarem dhari budhi, samarena pas ebantengngagi; egabay sasaranna lateyan.
13 Sengko’ epana tadha’ ambuna, tadha’ sakale bellas asena, sampe’ essena tang tabu’ ngalowa.
14 Allah nyerrang sengko’ reya akantha tantara se ngamok dhari baji’na; sengko’ elokae ta’ etemmo barampa kalena.
15 Sengko’ akalambi karong tandha sossa, toju’ e abu tandha kala.
16 Dhari bannya’na nanges tang mata sampe’ mera, bara ban beddeng balukodanna.
17 Tape sengko’ ta’ andhi’ sala ajalannagi kakerrasan; tang du’a ka Allah kalowar dhari ate se ehlas.
18 E bume, kajahadan se eteba’agi ka sengko’ ja’ alenge; tang serro se menta kaadilan ja’ anggep tadha’!
19 Sengko’ tao ja’ se abillai sengko’ badha e sowarga, se nyakse’e ja’ sengko’ ta’ andhi’ sala.
20 Sengko’ eca’-koca’e ban ekala’-gella’ ca-kanca; sengko’ nanges ngadhep ka Allah nyo’on bantowan.
21 Mandar Allah dibi’ nolonga sengko’ e ajunanna, akantha oreng se nolong kancana.
22 Tang omor la ta’ bannya’ karena, sakejja’ aggi’ sengko’ la tadha’ ban ta’ abali saterrossa.
sabda_ylsa
Yayasan Lembaga SABDA
sabda_ylsa
Selengkapnya
SABDA Alkitab
Podcast SABDA
Slideshare SABDA