Loading audio...
Error: Maaf, audio tidak dapat diputar.
(It seems your browser does not support HTMLMediaElement.playbackRate, so you will not be able to change the speech rate.)
Catatan: Perhitungan audio timestamp (ketepatan waktu antara audio dan teks) berdasarkan perhitungan mesin / algoritma.
1 [Erjabap ka Jop nina,] Nggo melala kal kubegi ranan si bagena, pengapulndu niksa aku ngenca.
2 (Ayb 16:1)
3 La kin keri-keri cakap sia-sia si ibelasndu? Ngkai maka nggit kal kam njabapi aku?
4 Bicara aku bagi kam ena, janah kam bagi aku enda, aku pe beluh kap ngerana bagi rananndu ena; ngasup aku ngerana la erpeltep-peltep nuriangi kam, janah takalku kukupir-kupirken ngenehen kam.
5 Banci kam kupegegehi alu ajarku, dingen la erkeri-kerin pengapulku bandu.
6 Ngerana pe aku, si mesuingku labo urak, aminna pe sinik, kiniseranku labo mantak.
7 O Dibata, nggo ngelabuh aku IbahanNdu, keluargangku nggo keri IkernepkenNdu.
8 Itangkap dingen ImusuhiNdu aku, emaka nggo kertang kal dagingku. Iakap kalak, enda eme buktina, maka aku, tuhu-tuhu nggo erdosa.
9 Perban nembehna ate Dibata, icaing-CaingNa aku; IpenNa erderik, MataNa IpebendilNa kempak aku.
10 Mbelang babah kalak nggombang-gombangi aku, iuru-uruna aku, iparapna kurumku.
11 Iendesken Dibata aku kempak kalak si la mbiar man Dibata; ku bas tan kalak jahat, aku IdabuhkenNa.
12 Mbarenda senang geluhku, tapi kerahungku ijenggel Dibata; iripukken janah IdampeskenNa aku. Sanga latihen erpanah, ku aku IpanahkenNa.
13 Dagingku serser kena anak panah, IlukaiNa aku seh ku pusuh; tapi la teridah AteNa mekuah, aminna darehku mambur ku taneh.
14 Mulih-ulih aku IlukaiNa, IperjatiNa aku bagi tentera si mbisa.
15 Kupake uis guni tanda ceda ateku, janah perban aku nggo talu, kundul aku i bas abu.
16 Ayongku megara perban rusursa ngandung, matangku besar, kelewetna mbiring.
17 Tapi la lit kalak kusiksa, dingen pertotonku ertorosen kempak Dibata.
18 O taneh, ula tamburi darehku si iamburken kalak janah pernderkuhku mindo keadilen ula penisik.
19 Kuteh kap maka saksingku lit i Surga, pembelangku lit i bas Ingan si Meganjangna.
20 Teman-temanku naling-naling dingenna tawa-tawa, matangku ngamburken iluh kempak Dibata.
21 Mesikel aku maka lit si ngkapiti aku i lebe-lebe Dibata, desken sekalak jelma ngkapiti temanna.
22 Tahun-tahun kegeluhenku lanai piga, jenari berkat me aku, janah la mulihken nari.
sabda_ylsa
Yayasan Lembaga SABDA
sabda_ylsa
Selengkapnya
SABDA Alkitab
Podcast SABDA
Slideshare SABDA