Alkitab Karaoke

Loading audio...

Catatan: Perhitungan audio timestamp (ketepatan waktu antara audio dan teks) berdasarkan perhitungan mesin / algoritma.

¹ “Tonggor ma, haganup ai domma ididah matangku, domma ibogei pinggolhu, anjaha iarusi do ai.

² Aha na binotohnima, ai pe hubotoh do, seng talu ahu marimbang hanima.

³ Tapi sihol do ahu marsahap pakon Pargogoh Na So Tarimbang in, anjaha sihol do uhurhu marsisungkunan pakon Naibata.

⁴ Anggo hanima, ladung do ibahen hanima palemes-lemeskon, panambari na so marguna do hanima ganup.

⁵ Dearan hanima namin sip, ai ma gabe hapentaran bannima.

⁶ Tangar hanima ma hatoranganku, anjaha pardiateihon hanima ma panlawanan ni bibirhu.

⁷ Mintor sahapkononnima ma na so sintong, laho mangapiti Naibata? Anjaha hatahononnima ma sipaoto-oto, laho mangkombari-Si?

⁸ Sihol hampit Naibata hanima, anjaha hanima marnagodangkon pahara-Ni?

⁹ Mintor tumaram ma sonang hanima anggo ipareksa hanima? Barang tartipu hanima ma Ia, songon sada halak na manipu hasomanni jolma?

¹⁰ Borat do panguhum-Ni bannima, anggo songon sipangapit-apiti hanima.

¹¹ Mintor lang ma songgotan ni hamuliaon-Ni hanima, anjaha biar dompak-Si manjombai hanima?

¹² Hata sipaingatnima ai, doskon abuan do ai; partahanannima ai, partahanan tanoh halampung.

¹³ Sip ma hanima anjaha palopas hanima ma ahu marsahap; paturut roh bangku atap aha pe ai.

¹⁴ Sihol boanonku do sibukku i holangkolang ni iponku, anjaha nahkononku tonduyhu ibagas tanganku.

¹⁵ Tonggor ma, sihol bunuhon-Ni do ahu, seng dong siarapkononku; tapi sihol patidakonku do dalanku hu lobei-Ni.

¹⁶ Age on hatuahon do bangku, na so bolas ai halak parjahat roh hu lobei-Ni.

¹⁷ Tangar ma hatangku pangkei-pangkei, anjaha itangihon pinggolnima ma hatoranganku.

¹⁸ Tonggor ma, domma sirsir hinan hatoranganku, anjaha hubotoh pintoran-Ni do ahu.

¹⁹ Mintor adong ma na pag mangaduhon ahu, ase sip namin ahu anjaha matei?

²⁰ Pitah na dua pahara on ulang bahen Ham bangku, jadi seng ponopkononku be bohingku hun lobei ni bohi-Mu:

²¹ Padaoh Ham ma tangan-Mu humbangku, anjaha ulang ma hirjaton ahu ibahen songgot-songgot-Mu.

²² Dob ai dilo Ham ma ahu, sai balosanku do; atap lopas Ham ahu marsahap, anjaha balosi Ham ahu.

²³ Sadiha ma gakni buei ni hajahatonku ampa dousangku? Pabotohkon Ham ma bangku panlanggaronku ampa dousangku.

²⁴ Mase ma ponopkonon-Mu bohi-Mu, anjaha ihira Ham ahu songon imbang-Mu?

²⁵ Sihol songgoton-Mu ope sada bulung ni hayu na matangtang, anjaha pardakdakon-Mu sada anggala ni omei na dob masak,

²⁶ ase ipaporsankon Ham bangku na mapaet, anjaha manginsonoh bangku hajahaton ni haposoonku,

²⁷ ase ibayangkon Ham naheihu, itulimati Ham ganup dalanku, anjaha ibahen Ham ambat-ambat i lobei ni tapak-tapak ni naheihu?

²⁸ Age pe domma bois diri songon hayu na burburon, anjaha songon hiou na pinangan ni ngitngit?”