Alkitab Karaoke

Loading audio...

Catatan: Perhitungan audio timestamp (ketepatan waktu antara audio dan teks) berdasarkan perhitungan mesin / algoritma.

¹ Dob ai Nini si Job ma Mambalosi,

² “Nai ma tongon, hanima ma tongon na sintong, anjaha rap pakon hanima masab hapentaran.

³ Ahu pe paruhur do usih songon hanima; seng pala talu ahu marimbang hanima. Ise ma na so mambotoh na sonai ai?

⁴ Gabe sipartatawaan do ahu bani huan-kuanku, ahu sidilo Naibata, na bonar anjaha na daulat maruhur.

⁵ Mapas do tongon uhur ni halak na mardohar mangidah halak na masombuh, anjaha ijullakkon ope halak na sihol tarlandit naheini.

⁶ Mardamei-damei do lampolampo ni halak panrampok, anjaha sonang do halak na pagajag-gajag ringis ni Naibata, na mamboan naibatani ibagas tanganni.

⁷ Mahua sungkun ma namin pinahan, ase sidea mangajari ho; manuk-manuk na i awang-awang, ase sidea patugahkon bam.

⁸ Atap parsahapkon namin binatang na i tanoh, ase ai mangajari ho, ampa dengke na ibagas laut patorangkon ai bam.

⁹ Ise ma na so mambotoh pasal haganupan ai, paboa tangan ni Jahowa do sijadihon ai?

¹⁰ Ibagas tangan-Ni do hosah ni sagala na manggoluh, pakon tonduy ni sagala jolma.

¹¹ Ai lang pinggol do na mananda hata, anjaha langit-langit mandai sipanganon?

¹² Bani halak na matua do jumpah hapentaran, anjaha pangarusion bani halak siganjang umur.

¹³ Bani Naibata do hapentaran pakon hagogohon, Bani do uhur pakon pangarusion.

¹⁴ Tonggor ma, anggo Ia manrumbakkon, seng be tarpauli, anggo itutup sada halak, ise pe lang na boi paluahkon.

¹⁵ Tonggor ma, anggo ijolomi bah, marsik do, anjaha anggo ipaluah ai, maseda tanoh ibahen.

¹⁶ Bani do hagogohon pakon hapentaran, Ia do sibotoh halak na kahou ampa na pakahouhon.

¹⁷ Ipalaho do parkuasa ni harajaon mangambei, anjaha maoto panguhum ibahen.

¹⁸ Itanggali do gari ni raja-raja, anjaha iranteihon do rantei bani binongei ni sidea.

¹⁹ Ipalaho do malim mangambei, anjaha idabuhkon siparkuasa.

²⁰ Ipadaoh do hapandeian marsahap humbani halak na hinatengeran, anjaha ibuat do uhur humbani halak na matua.

²¹ Iuseihon do hahirion bani na sangap-sangap, anjaha itanggali do gondit ni halak na gogoh.

²² Ipatalar do na ponop ibagas hagolapan, anjaha iboan hubani haliharon na lotir ni na lotir.

²³ Ipatimbul do bangsa-bangsa, dob ai iagou use; ipararat bangsa-bangsa, dob ai ipalaho use.

²⁴ Ibuat do uhur humbani pambobai ni bangsa i tanoh on, anjaha ipakahou sidea i halimisan na so adong dalan.

²⁵ Dadap-dadap do sidea ibagas hagolapan na lang marhaliharon, anjaha rebad-rebad sidea songon halak na mabuk.