Loading audio...
Error: Maaf, audio tidak dapat diputar.
(It seems your browser does not support HTMLMediaElement.playbackRate, so you will not be able to change the speech rate.)
Catatan: Perhitungan audio timestamp (ketepatan waktu antara audio dan teks) berdasarkan perhitungan mesin / algoritma.
1 Appialimi Ayub angkana, "Memang, ikau ngasemminne wakkele’na rupataua. Punna mate mako, lamate tommi kacara’dekanga.
2 (12:1)
3 Inakke tau nia’ tonja akkala’ bajikku; sikontu nupaua ngaseng anjo kupahang tommi. Nampa pole, inai tau angngasseng ngasengi anjo sikammaya? Jari, teako nanukana ngaseng la’biangngang mako na inakke!
4 Nikakkalia’ ri agangku siagang belaku, nampa inakke anne annaba’ siagang tena callaku. Riolo Napiali Allata’ala pappala’ doangku punna akkioka’ appala’ bantuang.
5 Nupakkanaia’ tu cilaka, nampa amang ikau tallasa’nu; tau a’biringa tu’guru’ nualle nutunrung ngaseng ba’lalo.
6 Mingka katallassanna paellaka tena niancangi; tau barania ambaliangi Allata’ala, amangi tallasa’na. Na rewataja a’jari panrannuanna ke’nanga, kagassingang kalennaji bawang napattoang.
7 Akkuta’nangko mae ri jangang-jangang siagang olo’-olo’ maraengannaya na nasareko ke’nanga pangngajarang.
8 Appalakko kasingarang mae ri apa attallasaka ri butta siagang ri tamparang, na nasareko ke’nanga kasingarang.
9 Inai ri yangasenna anjo ke’nanga tangngassengai, angkana mappa’jarina ke’nanga iamintu KalenNa Allata’ala?
10 Ia angngatoroki tallasa’na sikontu niaka attallasa’; Ia Makoasa mae ri nyawana tunggala’ rupataua.
11 Sangkamma lilaku nangai nakasia’ kanre nyamanga, kammaminjo tolingku nangai mappilangngeria kana-kana.
12 Turu’ kabara’, kacara’dekanga niaki ri tau toaya umuru’na, mingka kacara’dekang siagang kagassingang ri Allata’ala bawang nia’. Nakana taua, pammahanga niaki ri allaloamo umuru’na, mingka pammahang siagang kakoasang ri Allata’alaji bawang nia’!
13 (12:12)
14 Apa le’baka Narumbang takkulleai nibangung poleang inai Natahang takkulleai bebasa’ ammotere’.
15 Natahangi je’neka, nakalotoro’ siagang roso’ sikamma niaka; Nalappassangi assolong, nabattumo a’baya!
16 Anjo Allata’ala gassingi, kassaki siagang porei! Lapung patipu siagang nitipua nia’ ngasengi ri kakoasanNa.
17 Nabi’buki kacara’dekanga battu ri sikamma koasaya ri pamarentahang, na sikamma pamimpinga Napa’jari tunikakkali.
18 Naruntungi karaenga nampa Natahang ke’nanga;
19 Napakatunai imang-imanga siagang sikamma pamimpinga.
20 Natongkoki bawana tau cara’deka a’bicara, Nabi’buki kacara’dekanna sikamma tau toaya.
21 Napakasiriki tau nipakalompoa; Naallei kakoasanna tau koasaya.
22 Nasingari tampa’-tampa’ anremenga; Nasiori bayang-bayang le’leng pakkaka.
23 Na’jari bansa-bansaya a’bakka’ siagang kala’biang, nampa Napanraki ke’nanga sa’genna ancuru’.
24 Napa’lingui sikamma pamimpinga, sa’genna piti lampa-lampai tanaassengai lanatujua ke’nanga.
25 Angngosalaki ke’nanga lalang ri sassanga, ta’royong-royong sanrapang tau nasa’ring."
sabda_ylsa
Yayasan Lembaga SABDA
sabda_ylsa
Selengkapnya
SABDA Alkitab
Podcast SABDA
Slideshare SABDA