Alkitab Karaoke

Loading audio...

Catatan: Perhitungan audio timestamp (ketepatan waktu antara audio dan teks) berdasarkan perhitungan mesin / algoritma.

¹ Ulin musil tapi bujur, asangken perbual dingen longor.

² La mehuli mejingkat adi la radu ras pemeteh, si merudusa mabai kalak ku bas kiniseran kap.

³ Lit deba encedaken dirina jine erkiteken kebodohenna, jenari TUHAN ka ilepakkenna.

⁴ Kalak bayak tambah-tambah lalap temanna, tapi kalak musil temanna pe nadingken ia.

⁵ Kalak si nuriken si la tuhu i bas pengadilen, iukum me; la banci ia pulah.

⁶ Nterem kalak si ngangkat-ngangkat ukur kalak si mbelin, kalak si melumbar mere nterem dat teman.

⁷ Kalak musil la meherga iakap seninana, emaka labo ate mamang adi ia la erteman. Ugapa pe ibahanna, la ia ngasup ndatken teman.

⁸ Ise ngayaki pemeteh, ikelengina kap dirina, dingen ise si nginget kai si ipelajarina jumpa kap ia si mehulina.

⁹ La lit kalak pulah i bas pengadilen nari, kune iturikenna kata la tuhu.

¹⁰ La arusna inanami kalak bodoh kegeluhen si mewah, dingen la patut pe suruh-suruhen merentah tuanna.

¹¹ Kalak pentar ikuasaina dirina, terpuji ia perban iperdiatekenna kesalahen kalak si deban.

¹² Rawana raja bali kap ras singa si erdengum, kiniulin raja desken udan si mbaru denga reh.

¹³ Anak si longor banci encilakaken bapana, ndehara si perjungut-jungut desken tarum cires naktaken launa.

¹⁴ Ranan dingen erta banci dat i bas orang tua nari, tapi ndehara si pentar i bas TUHAN nari ngenca rehna.

¹⁵ Adi atendu kin jadi kalak malas, pedemkenlah maka kam lumben.

¹⁶ Adi atendu gelah terkelin, arus ipatuhindu perentah Dibata, adi la ergakenndu, mate me kam.

¹⁷ Nampati kalak musil bali ras pepinjamken man TUHAN, TUHAN ka kari si ersimulih.

¹⁸ Ajarken disiplin man anakndu tupung kitik denga, adi lang, isampatindu me ia ngkernepken dirina.

¹⁹ Pediat kalak meter naik darehna, ia jine ndatken nanamna

²⁰ Adi kam nggit megiken kata dingen nggit erlajar, i bas sada paksa kam la banci lang jadi pentar.

²¹ Manusia banci ersura-sura, tapi peraten TUHAN nge jadi.

²² Si iarapken i bas manusia nari eme kesetian. Ulin musil asangken jadi perbual.

²³ Patuhlah man TUHAN maka cawir kam metua, puas me iakapndu dingen la kam kena cilaka.

²⁴ Lit kalak si la tanggung malasna; nama nakan ku babahna pe la diatena.

²⁵ Adi kalak megombang iukum, emaka kalak si langa melala pemetehna banci dat pelajaren. Adi kalak pentar iajarken, datca me pemeteh.

²⁶ Kalak si nakiti dingen nulak orangtuana, eme anak si njuruken si la lit kiniulinna.

²⁷ O anakku adi lanai kam nggit erlajar, lupa me kam nandangi kai si nggo ipelajarindu.

²⁸ Kalak si nuriken kesaksin si la tuhu, kejahaten kap ngenca ulihna.

²⁹ Kalak bodoh dingen meganjang rukur, la banci lang ipekpeki.