Alkitab Karaoke

Loading audio...

Catatan: Perhitungan audio timestamp (ketepatan waktu antara audio dan teks) berdasarkan perhitungan mesin / algoritma.

¹ Mon nyaot epalaba, ate peggel daddi sabbar; jawaban se peddhes mapeggel ate.

² Cacana oreng bicaksana andaddiyagi pangataowan masen-neng ate; cacana oreng budhu coma aesse kabudhuwan.

³ PANGERAN ngoladi sabarang se kadaddiyan e dhimma’a bai; Salerana ngoladi ka sabarang se becce’ ban se juba’.

⁴ Ca’-oca’ se bagus nambai samangat, ca’-oca’ se nyake’e ate mamateyan karep.

⁵ Oreng budhu ta’ parduli babala’anna eppa’na, oreng bicaksana agateyagi parengeddan.

⁶ E bengkona oreng becce’ bannya’ artana; artana oreng jahat mosna lantaran karekongan.

⁷ Ca’-oca’an oreng bicaksana aesse pangataowan, tape pekkeranna oreng budhu ta’ kantha jareya.

⁸ PANGERAN narema du’ana oreng se becce’, tape baji’ ka tor-atorra oreng se juba’ ate.

⁹ PANGERAN baji’ ka cara odhi’na oreng daraka, tape taresna ka oreng se aehteyar ajalannagi kasokanna.

¹⁰ Oreng se alako juba’ bakal eseksa’a; oreng se ta’ endha’ epateppa’ bakal mateya.

¹¹ PANGERAN ngagali ka dunnyana oreng mate ban ke’-lekke’na; baramma se bisa’a pekkeranna manossa eerrep dhari Salerana?

¹² Oreng se dujan ya-nyeya ta’ endha’ mon epaenga’; ta’ endha’ menta babala’an dhari oreng se bicaksana.

¹³ Se senneng atena binar mowana; ate sossa maorem sonarra mata.

¹⁴ Oreng bicaksana nyare pangataowan; oreng budhu repot ban kabudhuwanna.

¹⁵ Oreng se orem kodu aperrang terros e dhalem odhi’na, tape oreng se gumbira senneng terros atena.

¹⁶ Lebbi becce’ sakone’ artana tape tako’ ka PANGERAN, katembang bannya’ dhi-andhi’na tape tako’ ros-terrosan.

¹⁷ Lebbi becce’ ngakan ngan-gangan etoro’e ate taresna, katembang ngakan daging se nyaman etoro’e kabaji’an.

¹⁸ Oreng se lekkas peggel madhateng tokar, oreng se sabbar madhateng karokonan.

¹⁹ Oreng males tanto terros nemmo karekongan; oreng jujur ta’ nemmo kasossa’an.

²⁰ Ana’ se bicaksana masenneng atena eppa’na; ana’ se budhu ta’ ngargai ebuna.

²¹ Kabudhuwan reya se masenneng atena oreng gendheng, oreng bicaksana odhi’na loros.

²² Apa se ekasajja ta’ ahasel mon ta’ etoro’e partembangan; se ekasajja ahasel mon bannya’ se aberri’ babala’an.

²³ Caca se ekoca’agi teppa’ baktona masenneng pekkeran.

²⁴ Oreng bicaksana lebat e ga’-ongga’an se nojju ka kaodhi’an, banne ron-toronan se nojju ka pate.

²⁵ PANGERAN bakal magujura bengkona oreng se angga’, tape ngaobana tanana randha.

²⁶ PANGERAN baji’ ka sajja se juba’, tape ca’-oca’ se bagus masenneng panggaliyanna.

²⁷ Sapa se nyare kaontongan se ta’ halal, maancor kaliwargana dibi’. Sapa se ta’ endha’ ka pesse go’-sogo’ bakal sennengnga odhi’na.

²⁸ Oreng becce’ mon ca’-ngoca’a epekker sabellunna; oreng jahat dujan ngoca’agi parkara se juba’.

²⁹ Du’ana oreng becce’ bi’ PANGERAN epeyarsa’agi, tape oreng daraka ta’ eparduli.

³⁰ Mowa se binar masenneng ate, kabar becce’ masegger tolang.

³¹ Oreng se endha’ epaenga’ nyamana oreng bicaksana.

³² Oreng se ta’ endha’ narema babala’an, ta’ ngargai aba’na dibi’; oreng se endha’ narema babala’an daddi oreng se tenggi buddina.

³³ Tako’ ka PANGERAN reya dhasarra pangajaran se teppa’; oreng kodu andhap asor sabellunna olle kahormadan.