Alkitab Karaoke

Loading audio...

Catatan: Perhitungan audio timestamp (ketepatan waktu antara audio dan teks) berdasarkan perhitungan mesin / algoritma.

¹ Ana’ se penter agateyagi babala’anna eppa’na; oreng sombong ta’ endha’ narema parengeddan.

² Cacana oreng becce’ madhateng kaontongan; oreng se ta’ jujur lebur ka kakerrasan.

³ Oreng se te-ngate acaca tanto aman odhi’na; oreng se acaca ban-saromban tanto calaka’.

⁴ Oreng males bannya’ pangaterrona tape tadha’ se ekaolleya; oreng se alako berra’ katekkan sakabbinna pangaterrona.

⁵ Oreng jujur baji’ ka dusa, tengka gulina oreng jahat matodhusan ban ecale oreng.

⁶ Kajujuran ngaobi oreng se loros odhi’na; kajahadan maancor oreng se dusa.

⁷ Badha se gi-masogi, tape sanyatana ta’ andhi’ pa-apa, badha se ken-mamesken tape sanyatana ce’ sogina.

⁸ Oreng sogi kodu makalowar pessena sopaja aman odhi’na; oreng mesken tadha’ oreng se ngara.

⁹ Oreng alem akantha sonar se tar-kataran; oreng jahat akantha damar se mate.

¹⁰ Kaangkowan pera’ madhateng tokar; oreng se bicaksana endha’ narema pangajaran.

¹¹ Kasogiyan se gampang ekaolle gampang keya elangnga; tape arta se epakompol gan sakone’ sajan abit sajan bannya’.

¹² Mon pangaterro ta’ katekkan ate sompek ta’ karowan; mon pangaterro katorodan, ate gumbira.

¹³ Oreng se ngenthengngagi pangajaranna Pangeran, macalaka’ aba’na dibi’; oreng se atoro’ ka dhabuna Allah bakal narema’a ganjaranna.

¹⁴ Pangajaranna oreng se bicaksana reya somberra kasennengngan, e dhalem babaja, pangajaran jareya panyalamedda ba’na.

¹⁵ Oreng se bagus buddina bakal ealemma; oreng se ta’ ekenneng parcaja bakal malarada odhi’na.

¹⁶ Oreng bicaksana apekker gallu sabellunna alako apa’a bai, oreng budhu ngobral kabudhuwanna.

¹⁷ Otosan se ta’ bendher madhateng calaka’; otosan se ekenneng parcaja tanto ahasel.

¹⁸ Oreng se ta’ endha’ edhidhi’ daddi mesken ban nespa; oreng se ngedhingngagi babala’an bakal ehormada oreng.

¹⁹ Ce’ nyamanna mon ngaolle pa-apa se ekaterro! Oreng budhu ta’ endha’ adina’agi kajahadan.

²⁰ Oreng se akanca’an ban oreng bicaksana, bakal daddiya bicaksana; oreng se akanca’an ban oreng budhu, bakal calaka’a.

²¹ Oreng dusa ros-terrosan eserser kasossa’an, oreng becce’ ros-terrosan olle kasennengngan.

²² Oreng becce’ nyangkollagi kasogiyan ka na’ potona; artana oreng dusa esempen kaangguy oreng se loros odhi’na.

²³ Tana kosong bisa ngasellagi kakanan sabannya’na kaangguy oreng mesken; tape lalakon se ta’ adil andaddiyagi tana jareya ta’ elakone.

²⁴ Ta’ mokol ana’ artena ta’ neser ka kana’ jareya; mon neser kodu bangal mokol kana’ jareya.

²⁵ Oreng becce’ cokop saterrossa, tape oreng jahat kakorangan salanjangnga.