Alkitab Karaoke

Loading audio...

Catatan: Perhitungan audio timestamp (ketepatan waktu antara audio dan teks) berdasarkan perhitungan mesin / algoritma.

¹ Oreng se lebur ka pangataowan senneng narema parengeddan; tape oreng se ta’ endha’ epaenga’ jareya oreng budhu.

² Oreng becce’ ekaleburi PANGERAN, tape oreng se andhi’ sajja jahat bakal narema’a okoman.

³ Tadha’ oreng se paggun jaja polana kajahadan; tape oreng se jujur teptep koko, ta’ ekenneng gundhek.

⁴ Bine se becce’ magumbira ban masenneng atena lakena; bine se matodhusan lakena marabut panyaket se mabucco’ tolangnga.

⁵ Oreng jujur mekkere sabarang se becce’; oreng jahat mekker carana se nepowa oreng.

⁶ Cacana oreng jahat mamateyan oreng; cacana oreng jujur madhateng kasalameddan.

⁷ Oreng jahat bakal gaggara ban mate tadha’ lampadda, tape oreng becce’ bakal pagguna koko ron-temoron.

⁸ Oreng ealem satembang ban kabicaksana’anna; oreng eya-seya satembang ban kagendhengnganna.

⁹ Lebbi becce’ daddi oreng kene’ se andhi’ lalakon, etembang gi-masogi tape sanyatana kakorangan kakan.

¹⁰ Oreng becce’ mekkere ebinna; tape oreng jahat nyeksa ebinna.

¹¹ Oreng tane se alako berra’ bannya’ kakananna, tape se wang-mowang baktona kaangguy barang se ta’ aguna jareya oreng budhu nyamana.

¹² Oreng jahat terro olleya kaontongan dhari oreng daraka; oreng becce’ akantha bungka se abuwa.

¹³ Oreng jahat tajira’ bi’ cacana se juba’, oreng becce’ lopot dhari kasossa’an.

¹⁴ Saneyap oreng narema ganjaran menorot caca ban lalakonna; kabbi padha eberri’ opa bang-sebang se sabandhing.

¹⁵ Oreng gendheng apangrasa aba’na ta’ tao sala, tape oreng bicaksana lebur ngedhingngagi babala’an.

¹⁶ Mon oreng budhu epapeggel oreng, laju ekoca’agi bakto jareya keya; tape oreng bicaksana ta’ parduli maske ecale baramma’a.

¹⁷ Oreng se acaca bendher madekdek kaadilan, oreng se acaca lecek madhateng barang se ta’ adil.

¹⁸ Caca se ban-saromban bisa maloka ate akantha se ejujju ban peddhang, caca se bicaksana akantha obat se mabaras.

¹⁹ Barang se lecek tanto tabungkar e dhalem saparngedep, tape caca se teppa’ bakal teptebba salanjangnga.

²⁰ Oreng se andhi’ sajja jahat lebur ka barang se ta’ adil, oreng se nyare kabecce’an bakal sennengnga.

²¹ Oreng becce’ ta’ kera ekenneng mosiba; oreng jahat tanto ros-terrosan sossa.

²² PANGERAN baji’ ka oreng se lecegan; tape lebur ka oreng se jujur.

²³ Oreng se bicaksana ta’ ngedirragi pangataowanna, oreng budhu ngobral kabudhuwanna.

²⁴ Oreng se alako berra’ neggu’ kakobasa’an; oreng se males tapaksa daddi dunor.

²⁵ Kakobateran e dhalem ate mapotong samangat, tape caca se manes maraja ate.

²⁶ Oreng se bendher apojuran dhari tatanggana, oreng jahat posang polana kajahadanna.

²⁷ Oreng males ta’ kera ngaolle pangaterrona; mon alako berra’ tanto olle arta.

²⁸ Oreng se noro’ jalan se bendher tanto senneng odhi’na; oreng se noro’ jalan se sala nojju ka maot.