Loading audio...
Error: Maaf, audio tidak dapat diputar.
(It seems your browser does not support HTMLMediaElement.playbackRate, so you will not be able to change the speech rate.)
Catatan: Perhitungan audio timestamp (ketepatan waktu antara audio dan teks) berdasarkan perhitungan mesin / algoritma.
1 Bursik ma halak na so marpanarian i Sion, ampa halak na mangahapkon aman i Dolog Samaria, ai ma halak na sangap i tongah-tongah ni bangsa sibetengan, tuan-tuan ni ginompar ni Israel.
2 Mandipar ma nasiam manorih hu Kalne, dob ai laho ma nasiam hu Hamat, huta na bolon ai; dob ai tuad ma nasiam hu Gat, huta ni halak Palistim. Mintor dearan ma sidea ase harajaon on? Atap bolagan ma tanoh ni sidea ase tanoh nasiam?
3 E nasiam na mangagan daoh ari hamagouan ai, hape lambin ipadohor nasiam do tahun hasedaon ai;
4 nasiam na martibalan i atas ni podoman gading, na patordangkon diri i atas ni podoman-podomanni, na mangankon biribiri humbani hulanan ampa anak ni lombu humbani harang;
5 nasiam na mandoding-doding pairik-irik sora ni husapi ampa na padomu-domu doding songon si Daud;
6 nasiam na manginum anggur simantinan ampa na mamminaki diri marhitei minak sidearan, tapi na so mangkaruhon hasedaon ni si Josep.
7 Halani ai maningon sidea ma na parlobei tarbuang humbani na tarbuang, anjaha maronti ma surak-surak ni halak na pasonang-sonangkon dirini.
8 Domma pala marbulawan Jahowa bani diri-Ni, nini Jahowa Naibata Zebaot do, “Magigi do Ahu mangidah gijang ni uhur ni Jakob, anjaha sogam do uhur-Hu bani benteng-bentengni, anjaha palopason-Ku ma tarulang huta ai ampa ganup pangisini.
9 Anjaha porini tading ope sapuluh halak ibagas rumah, maningon matei do sidea.
10 Jadi anggo dong sindohorni atap na mananomsi sihol mambuatsi, laho padaratkon holiholi ai hun rumah ai, jadi hatahononni ma hubani halak na i kamar parbagas ni rumah ai, ʻAdong ope atap ise rapkon ho?ʼ Jadi hatahononni ma, ʻIse pe lang!ʼ Tapi hatahononni ma, ʻSip! Seng bulih diloon goran ni Jahowa.ʼ
11 Ai tonggor ma, Jahowa do na mamarentahkon, gabe iropuki halak rumah na bolon, anjaha itahai rumah na etek-etek.
12 Mintor mardingkal ma huda i atas dolog batu, barang adong ma na maninggala laut marhitei lombu? Tapi ipaubah hanima do hasintongan gabe rasun ampa buah ni hapintoron gabe pogu.
13 Hanima na mangkamalaskon Lodebar, na mangkatahon, ʻAi lang domma italuhon hita banta Karnaim marhitei gogohta?ʼ
14 Tonggor ma, puhoan-Ku ma sada bangsa ase iimbang hanima, alo ginompar ni Israel,” nini Jahowa, Naibata Zebaot, “jadi sosakonni ma hanima olat ni dalan laho hu Hamat das hu bah na i Araba.”
sabda_ylsa
Yayasan Lembaga SABDA
sabda_ylsa
Selengkapnya
SABDA Alkitab
Podcast SABDA
Slideshare SABDA