Loading audio...
Error: Maaf, audio tidak dapat diputar.
(It seems your browser does not support HTMLMediaElement.playbackRate, so you will not be able to change the speech rate.)
Catatan: Perhitungan audio timestamp (ketepatan waktu antara audio dan teks) berdasarkan perhitungan mesin / algoritma.
1 Cilakako ikau ngaseng attallasa’ nyamanga ri Sion, siagang amanga pakkasia’na ri Samaria — ikau ngaseng he pamimpinna tau jaia ri anne Israel porea, ikau ngaseng sarroa nibattui ri ra’yaka untu’ nipappalakki pannulungang!
2 Mae mako ciniki ri Kalne, siagang a’jappa tulusu’ mako mange ri anjo kota Hamat lompoa, nampa mange ri kota Gat ri Filistin. Nukapangi angkanaya anjo kota-kotaya la’bi bajiki nakakaraengang Yehuda siagang Israel. Maka la’bi lompoangangi daerana ke’nanga nadaeranu?
3 Nupatterassangi angkanaya anjo allo angngeranga bala bella iji, mingka anjo sikamma panggaukannu poro pila’ napa’jari linta’ji kabattuanna anjo allo kapallakkanga.
4 Cilaka ngasengko attinroa irate ri ranjang ga’ga-ga’gaya siagang angnganre lompoa dageng sapi siagang gimbala’ rungka!
5 Nungai appareka kelong, sangkamma nagaukanga Daud, siagang nungai angkelongangi anjo lagua nururungang kacapi.
6 Angnginungko anggoro’ battu ri pangnginungang niboneia sa’genna rassi, siagang ammakeko minynya’ bau’ kaminang bajika, mingka tena nasi’na pa’mai’nu mae ri kaancuranna Israel.
7 Lanri kammana anjo, ikau ngasemmi uru-uru laniengka’ mange ri butta pammelakkanga. Passua’-suarrannu siagang pangnganreang-pangnganreannu lakala’busammi.
8 Naterassimi Batara Kaminang Koasaya siagang Kaminang Tinggia ampassareangi pappakainga’ kammaya anne: "Birisiki nyawaKu mae ri katampoanna umma’ Israel; tena nasannang nyawaKu mae ri sikamma balla’ karaeng ga’gana ke’nanga. Ibukotana ke’nanga siagang sikontu bonena laKupassareangi mae ri musua."
9 Punna nia’ sampulo tau accokko lalang ri se’rea balla’, lamate tonji ke’nanga.
10 Sitau anggota kaluargana ia tugasaka angngurusuki panguburanna, laniaki battu siagang naerangi assulu’ maya’na bijanna. Lakkioki mae ri tau niaka ri bageang bokona anjo ballaka angkana, "Apaka nia’ ija maraeng attallasa’ pantaranganna ikau?" Na lania’mo sa’ra appiali angkana, "Tenamo!" Anjo anggota kaluarga tugasaka antarawangi anjo mayaka lanakana, "Tea’ mako a’bicarai pole! Takkulleaki’ ampaui arenNa Batara."
11 Punna assarei parenta Batara, sikamma balla’ lompoa siagang ca’dia laniancuru’ kabusuki.
12 Maka akkullei lari jaranga irate ri bulu’ batua? Niakka tau le’ba’ ampa’jekoi tamparanga siagang sapi? Mingka ikau ngaseng le’ba’mi nuputara’ bale’ kaadelanga a’jari racung ammunoa, siagang annabaya a’jari sala.
13 A’bicara kosongko angkanaya le’ba’mi nubeta Lodebar. A’bicara tongko angkana, "Nia’ kagassinganna ikambe untu’ angngallei Karnaim."
14 KalenNa Batara Kaminang Tinggia siagang Kaminang Koasaya angkana, "He umma’ Israel, lakkiringA’ tantara battu ri se’reang bansa maraeng untu’ ambunduki pa’rasangannu. Lanajallakkang ngasengko appakkaramula battu ri agang mangea ri Hamat wara’ sa’genna Ka’bung Araba timboro’."
sabda_ylsa
Yayasan Lembaga SABDA
sabda_ylsa
Selengkapnya
SABDA Alkitab
Podcast SABDA
Slideshare SABDA