Loading audio...
Error: Maaf, audio tidak dapat diputar.
(It seems your browser does not support HTMLMediaElement.playbackRate, so you will not be able to change the speech rate.)
Catatan: Perhitungan audio timestamp (ketepatan waktu antara audio dan teks) berdasarkan perhitungan mesin / algoritma.
1 Hata ni si Amos, sada halak humbani parmahan na hun Tekoa, ai ma na nididahni pasal Israel bani panorang ni si Usia, raja ni Juda, ampa bani panorang ni si Jerobeam, anak ni si Joas, raja ni Israel, dua tahun i lobei ni lalou ai.
2 Jadi nini ma, “Martaur do Jahowa hun Sion, anjaha ipagogoh sora-Ni hun Jerusalem. Jadi marhoru ma sampalan ni parmahan, anjaha melus ma pakpak ni Karmel.”
3 Sonon do hata ni Jahowa, “Halani na tolu panlanggaron ni Damaskus ampa halani na ompat ai seng pasuruton-Ku uhum ai, halani na dob idogei sidea Gilead marhitei pambogbog bosi ni omei.
4 Halani ai tongoskonon-Ku ma apuy hubani rumah ni si Hasael, anjaha siapkononni ma benteng-benteng ni si Benhadad.
5 Ropukan-Ku ma pating-pating ni Damaskus, anjaha siapkonon-Ku pangisi ni Bikat-Awen ampa sijolom tungkot harajaon na hun Bet-Eden; anjaha halak Aram tarbuang hu Kir,” nini Jahowa.
6 Sonon do hata ni Jahowa, “Halani na tolu panlanggaron ni Gasa ampa halani na ompat ai seng pasuruton-Ku uhum ai, ai ibuangkon sidea do hibul pangisi ni sada nagori, iondoskon hu Edom.
7 Halani ai tongoson-Ku do apuy bani tembok ni Gasa, anjaha siapkononni ma benteng-bentengni.
8 Anjaha siapkonon-Ku ma pangisi ni Asdod ampa sijolom tungkot harajaon hun Askalon, patoltolon-Ku ma tangan-Ku dompak Ekron, anjaha magou ma simasima ni Palistim,” nini Tuhan Jahowa.
9 Sonon do hata ni Jahowa, “Halani na tolu panlanggaron ni Tirus ampa halani na ompat ai seng pasuruton-Ku uhum ai, ai iondoskon sidea do hibul pangisi ni sada nagori hu Edom, anjaha seng idingat padan parsaninaon.
10 Halani ai tongoson-Ku do apuy bani tembok ni Tirus, anjaha siapkononni ma benteng-bentengni.”
11 Sonon do hata ni Jahowa, “Halani na tolu panlanggaron ni Edom ampa halani na ompat ai seng pasuruton-Ku uhum ai, ai ipardakdak do saninani marhitei podang, anjaha iintopi holongni, gabe torus marsiraki ringisni, anjaha tongtong isimpan gilani.
12 Halani ai tongoson-Ku ma apuy hu Teman, anjaha siapkononni ma benteng-benteng ni Borsa.”
13 Sonon do hata ni Jahowa, “Halani na tolu panlanggaron ni halak Amon ampa halani na ompat ai seng pasuruton-Ku uhum ai, ai ilapahi sidea do na boratan rumah i Gilead, laho pabolakkon parbalogan ni sidea.
14 Halani ai pagaraon-Ku ma apuy bani tembok ni Rabba, gabe bois panganonni benteng-bentengni marhasoman surak-surak bani mata ni parporangan, marhasoman habahaba bani panorang hamamasa ni halisungsung.
15 Anjaha raja ni sidea tarboan hu habuangan, ia rap pakon raja-raja na i toruhni,” nini Jahowa.
sabda_ylsa
Yayasan Lembaga SABDA
sabda_ylsa
Selengkapnya
SABDA Alkitab
Podcast SABDA
Slideshare SABDA