Alkitab Karaoke

Loading audio...

Catatan: Perhitungan audio timestamp (ketepatan waktu antara audio dan teks) berdasarkan perhitungan mesin / algoritma.

¹ Anjo lapung Amos, iamintu sitau pakalawaki gimbala’ battu ri kota Tekoa. Nikioki a’jari na’bi ri wattu niparentana pa’rasangang Yehuda ri Karaeng Uzia, siagang Israel niparentai ri Karaeng Yerobeam, ana’na Yoahas. Ruan taung ri tenanapa nakajariang ta’ge’goso’na buttaya, Napa’nyatai Allata’ala mae ri Amos ri passala’na tu Israel.

² Iaminne napabattua Amos, "Ammammuki Batara battu ri Bulu’ Sion, a’gamarrungi sa’ranNa battu ri Yerusalem. Sikamma parang rukuka a’jari kalotoroki, rukuka ri Moncong Karmel kalotoro’ taba sikali."

³ Nakana Batara, "Pandudu’na Damsyik a’mole-molemi doraka, lanri kammana anjo ma’nassa laKuhukkungi ke’nanga. Sanna’ palla’na panggaukanna ke’nanga mae ri tu Gilead,

⁴ lanri kammana anjo lakkiringA’ pepe’ mange ri balla’ karaenna Karaeng Hazael, siagang laKutunui sa’genna putta sikamma pattahanganna Karaeng Benhadad.

⁵ Sikamma pakke’bu’ lompona Damsyik laKupanraki, kammayatompa pandudu’na Ka’bung Awen laKubarrasaki sa’genna tangkasa’ battu ri tampa’ pammantanganna ke’nanga. Pamarentana Bet-Eden laKupanaungi battu ri empoang kakaraenganna, siagang pandudu’na Siria lanitahangi siagang laniengkaki mange ri pa’rasangang Kir."

⁶ Nakana Batara, "Pandudu’na Gaza a’mole-molei doraka, lanri kammana anjo ma’nassa laKuhukkungi ke’nanga. Le’baki naengka’ ke’nanga se’rea bansa mange ri pammelakkanga, nampa nabalukang salaku ata mae ri tu Edom.

⁷ Lanri kammana anjo lakkiringA’ pepe’ mae ri tembo’-tembo’na Gaza, siagang Kutunu sa’genna cappu’ sikamma pattahanganna.

⁸ Pandudu’na siagang pamarentana kota Asdod kammayatompa Askelon laKupabellai. Kota Ekron laKuhukkungi, siagang sikontu tu Filistin tassesaya laKupanraki."

⁹ Nakana Batara, "Pandudu’na Tirus a’mole-molei doraka, lanri kammana anjo ma’nassa laKuhukkungi ke’nanga. Le’baki naengka’ ke’nanga se’rea bansa mange ri pammelakkanga, nampa napassareang mae ri Edom; nadakkai ke’nanga parjanjiang passari’battanganna.

¹⁰ Lanri kammana anjo lakkiringA’ pepe’ mae ri tembo’-tembo’na Tirus siagang Kutunu sa’genna cappu’ sikamma pattahanganna."

¹¹ Nakana Batara, "Pandudu’na Edom a’mole-molei doraka, lanri kammana anjo ma’nassa laKuhukkungi ke’nanga. Tena pangngamaseanna ke’nanga na nabunduki tu Israel, sari’battanna ngaseng ke’nanga. Tulusu’ larrona ke’nanga, siagang tulusu’ napari pa’mai’na kalarroanna.

¹² Lanri kammana anjo, lakkiringA’ pepe’ mange ri kota Téman, siagang Kutunu sa’genna cappu’ sikamma pattahanganna Bozra."

¹³ Nakana Batara, "Bansa Amon a’mole-molei doraka, lanri kammana anjo ma’nassa laKuhukkungi ke’nanga. Ri wattunna a’bundu’ ke’nanga untu’ ampakaluaraki daerana, napuei battanna tubai’-baine tiananga ri Gilead.

¹⁴ Lanri kammana anjo, lakkiringA’ pepe’ mae ri tembo’-tembo’na kota Raba, siagang Kutunu sa’genna cappu’ sikamma pattahanganna. Anjo wattua lania’ nilangngere’ karicuang pa’bundukang, siagang anjo pa’bundukanga hebaki sanrapang anging lompo dudua.

¹⁵ Karaenna ke’nanga siagang pagawe-pagawe pamarentana laniengkaki mange ri pammelakkanga. INakke, Batara, anne akkana."

Amos

Video Amos 1

Ikuti Kami:

KONTAK | PARTISIPASI | DONASI