Loading audio...
Error: Maaf, audio tidak dapat diputar.
(It seems your browser does not support HTMLMediaElement.playbackRate, so you will not be able to change the speech rate.)
Catatan: Perhitungan audio timestamp (ketepatan waktu antara audio dan teks) berdasarkan perhitungan mesin / algoritma.
1 Amos reya tokang ngowanna dumba dhari kottha Tekowa. Se daddi nabbi e baktona nagara Yehuda eparenta Rato Uziya, ban Isra’il eparenta Rato Yerobeyam, pottrana Yowahas. Dhu taon sabellunna badha lendhu, Allah anyata’agi ka Amos pa-apa parkara Isra’il.
2 Reya’ se edhabuwagi Amos, "PANGERAN adhabu ce’ dukana dhari Gumo’ Siyon, sowarana agarudhu’ dhari Yerusalim. Lon-talon padha kerreng rebbana, bariya keya rebba e Gunong Karmel."
3 PANGERAN adhabu, "Pandhudhu’ Damsyik la pan-barampan kale agabay dusa, daddi bi’ Sengko’ masthe eokom. Oreng Damsyik jareya ce’ kejjemma ka oreng Gileyad,
4 daddi Sengko’ madhatengnga apoy ka karatonna Rato Hazael, ngobbara teng-bintengnga Rato Benhadad epasampe’a tadha’ karena.
5 Bang-labang sakethengnga Damsyik bi’ Sengko’ eparosaga, dineng oreng Cora Awen bi’ Sengko’ epatadha’a karena dhari kennengnganna. Oreng se ngobasane Bet-Eden bi’ Sengko’ epatorona dhari tahtana, dineng oreng Siria etawana sarta eangko’a ka nagara Kir."
6 PANGERAN adhabu, "Oreng Gaza la pan-barampan kale agabay dusa, daddi bi’ Sengko’ masthe eokom. Oreng Gaza jareya la ngangko’ settong bangsa sampe’ epatadha’ karena, ejuwal menangka dunor ka oreng Edom.
7 Daddi Sengko’ madhatengnga apoy ka dhung-geddhungnga Gaza, sarta ngobbara teng-bintengnga sampe’ epatadha’a karena.
8 Pandhudhu’ ban pangobasana Asdod ban Askelon bi’ Sengko’ epanyeseya. Kottha Ekron bi’ Sengko’ eokoma, ban karena oreng Filistin se gi’ odhi’ epamateya kabbi."
9 PANGERAN adhabu, "Pandhudhu’ Tirus la pan-barampan kale agabay dusa, daddi bi’ Sengko’ masthe eokom. Oreng Tirus jareya la ngangko’ settong bangsa egiba ka tana buwangan kabbi, sarta massra’agi bangsa jareya ka Edom; oreng Tirus jareya ta’ neptebbi parjanjiyan parsobadanna.
10 Daddi Sengko’ madhatengnga apoy ka dhung-geddhungnga sarta ngobbara teng-bintengnga sampe’ epatadha’a karena."
11 PANGERAN adhabu, "Pandhudhu’ Edom reya la pan-barampan kale agabay dusa, daddi bi’ Sengko’ masthe eokom. Oreng Edom jareya nyerrang oreng Isra’il, tan-taretanna dibi’, ta’ kalaban andhi’ ate neser sakone’a balakka’. Reng-oreng jareya terros peggel, ban tadha’ ambuna se sake’ ate.
12 Daddi Sengko’ madhatengnga apoy ka kottha Téman, sarta ngobbara teng-binteng Bozra epasampe’a tadha’ karena."
13 PANGERAN adhabu, "Bangsa Amon la pan-barampan kale agabay dusa, daddi bi’ Sengko’ masthe eokom. E bakto aperrang kaangguy malebara dhaera kakobasa’anna, bangsa jareya morak tabu’na babine’an se teppa’na ngandhung e Gileyad.
14 Daddi, Sengko’ madhatengnga apoy ka dhung-geddhungnga kottha Raba, sarta ngobbara teng-bintengnga epasampe’a tadha’ karena. E bakto jareya oreng bakal ngedhinga baridhuna paperrangan, ban paperrangan bakal ngamoga padha ban kaleng busbus.
15 Ratona ban sakabbinna kaom oreng agungnga pamarenta’anna eangko’a ka pambuwangan. Sengko’, PANGERAN, la ngoca’."
sabda_ylsa
Yayasan Lembaga SABDA
sabda_ylsa
Selengkapnya
SABDA Alkitab
Podcast SABDA
Slideshare SABDA