Loading audio...
Error: Maaf, audio tidak dapat diputar.
(It seems your browser does not support HTMLMediaElement.playbackRate, so you will not be able to change the speech rate.)
Catatan: Perhitungan audio timestamp (ketepatan waktu antara audio dan teks) berdasarkan perhitungan mesin / algoritma.
1 Gasagasa da'õ, lõ mamalõ Zaulo wameta'u awõ wamunu solo'õ khõ Yesu So'aya. Mõi ia khõ gere sebua,
2 wangandrõ sura kuaso we'amõi ba nomo'omo wangandrõ niha Yahudi ba Ndramaseko, ena'õ tola ira'u na isõndra niha si faduhu tõdõ khõ Yesu, ba i'ohe ba Yeruzalema.
3 Me numalõ ia ba Ndramaseko, me ahatõ ia ba mbawa gõli mbanua, i'anema'õ so haga moroi ba mbanua si yaw̃a samasui Saulo.
4 Alau tou ia ba danõ ba irongo li si hede khõnia sanguma'õ, "He Saulo, he Saulo! Hana wa õgohi Ndra'o?"
5 Isofu Saulo imane, "He So'aya, haniha Ndra'ugõ?" Itema li si hede andrõ Imane, "Yesu Ndra'odo, nigohimõ.
6 Hiza fazaw̃a'õ ba ae'e ba Ndramaseko. Ba da'õ te'ombakha'õ khõu hadia ia nilaumõ."
7 Oi tokea niha si fao khõ Zaulo irege tebai muhedehede ira; bõrõ me larongo li andrõ ba samõsa lõ ni'ilara niha.
8 Muzizio Zaulo ba ibokai hõrõnia, ba hiza tebai i'ila hadia ia sa'ae. Andrõ lagogohe dangania ba la'ohe ia numalõ ba Ndramaseko.
9 Tõlu ngaluo tebai i'ila niha ba ma'ifu lõ manga ia ba lõ ibadu nidanõ.
10 So zolo'õ khõ Yesu So'aya ba Ndramaseko, Anania dõinia. Muhede khõnia Zo'aya ba gangilata. Imane So'aya, "He Anania!" Itema li Anania imane, "Ya'e ndra'odo, So'aya."
11 Imane So'aya, "Ofanõ iada'e. Ae'e ba nomo Yuda ba lala sadõlõ andrõ. Sofu ba da'õ haniha zotõi Saulo moroi ba mbanua Daresu. Mangandrõ niha andrõ iada'e,
12 ba gangilata no i'ila niha sotõi Anania, sangondrasi ya'ia ba sanufa ya'ia faoma tangania ena'õ tola i'ila niha mangawuli."
13 Itema li Anania imane, "He So'aya, no urongo ato niha samatumatunõ niha andre, mendrua manõ wamakaonia banua-U ba Yeruzalema.
14 Ba no so ia iada'e si fao fanehegõ moroi khõ ndra ere sebua ba wondra'u niha samati khõ-U."
15 Ba hiza imane So'aya khõ Ganania, "Ae'e manõ! Bõrõ me no Ufili ia tobali enoni-Gu, ena'õ tobali sanuriaigõ ia khõ-Gu ba soi bõ'õ si tenga agama Yahudi awõ ba ndra razo, ba ba soi Gizera'eli gõi.
16 Ba U'oroma'õ khõnia wamakao si lõ tola lõ'õ itaõgõ bõrõ Ndra'o."
17 Numalõ Ganania ba nomo andrõ ba itufa tangania hõgõ Zaulo. Imane Anania, "Ya'ugõ talifusõgu Saulo, Yesu So'aya, ni'ilau ba lala me numalõ ndra'ugõ ba da'e, zamatenge ya'odo ena'õ tola õ'ila niha mangawuli ba Ifatõrõ ndra'ugõ Eheha Lowalangi."
18 I'anema'õ atoru moroi ba hõrõ Zaulo zi hulõ hunahuna gi'a ba awena tola i'ila niha mangawuli. Maoso ia, ba tebayagõ ia idanõ.
19 Abõlõ ia mangawuli me no aefa ilau manga. Torõi Zaulo ba Ndramaseko awõ zolo'õ khõ Yesu ba zi ha'uga ngaluo fa'ara.
20 Idõlõ ia ba nomo wangandrõ ba ituriaigõ wa Yesu andrõ no Ono Lowalangi.
21 Ahõli dõdõ niha fefu wamondrongo khõ Zaulo. Lamane, "Hadia tenga ya'ia andre zamunu fefu si faduhu tõdõ khõ Yesu ba Yeruzalema? Mõi ia ba da'e wondra'u ba wolohe ya'ira khõ ndra ere sebua!"
22 Ba itugu abõlõ Zaulo. Tandratandra ni'ombakha'õnia sanandrõsa khõ Yesu andrõ isõsõ dõdõ niha, wa Razo Sangorifi Yesu andrõ, irege tebai lafadaõ linia ira niha Yahudi si so ba Ndramaseko.
23 Me no ara ma'ifu, mamagõlõ ndra niha Yahudi ba wamunu Saulo.
24 Ba hiza i'ila ni'era'era dõdõra. Sara luo sara mbongi latarogõ ia ba mbawa gõli ba wamunu ya'ia.
25 Samuza mbongi, lahalõ Zaulo ira nifahaõnia, ladada ia baero gõli mbanua faoma ragaraga.
26 Numalõ Zaulo ba Yeruzalema ba itandraigõ wefao khõ ndra solo'õ khõ Yesu. Ba hiza ata'u ira khõnia, bõrõ me lõ faduhu dõdõra wa sindruhundruhu no tobali solo'õ Yesu ia.
27 Mõi khõnia Mbaranaba, ba i'ohe ia khõ ndra sinenge. Itutunõ Baranaba hewisa me i'ila Zo'aya ba dalu lala Saulo, ba hewisa wehede Zo'aya khõnia. I'ombakha'õ gõi Baranaba hewisa wa'abarani Zaulo wamahaõ ba Ndramaseko ba dõi Yesu.
28 Torõi awõra Zaulo ba fahuhuo ia si fao fa'abarani ba zi sagõrõ Yeruzalema ba dõi Zo'aya.
29 Fahuhuo ba ifadaõ li ndra niha Yahudi samake li Yunani, ba hiza omasi ira labunu ia.
30 Me la'ila samati bõ'õ da'õ, la'ohe Zaulo ba Kaizarea, aefa da'õ lafatenge ia ba Daresu.
31 Sahono tõdõ mbanua Yesu ba zi sagõrõ Yudea, Galilea ba Samaria. Faoma fatolosa Geheha Lowalangi, itugu abõlõ ba itugu ato mbanua Yesu andrõ, bõrõ me la'ata'ufi Lowalangi ba wa'aurira.
32 Idõrõdõrõi mbanua Yesu gofu heza Fetero. Samuza ma'õkhõ i'ondrasi mbanua Zo'aya ba Lida.
33 Falukha ia ba da'õ samõsa zotõi Enea, si no ombuyumbuyu ba si tebai maoso moroi ba nahia wemõrõnia no w̃alu fakhe wa'ara.
34 Muhede Wetero khõ Genea imane, "He Enea, Ifadõhõ ndra'ugõ Yesu Keriso. Faoso ba ehao naha wemõrõmõ." I'anema'õ maoso Genea.
35 Lafaigi Genea fefu sowanua ba Lida awõ Zarona, ba faduhu dõdõra khõ Zo'aya.
36 Ba Yofe, so ndra alawe sotõi Tabita. No samati khõ Yesu ia. (Tõinia ba li Yunani ya'ia Doreka eluahania bõhõ.) Lõ mamalõ ilau halõw̃õ si sõkhi ba itolo niha si numana.
37 Me inõtõ da'õ mofõkhõ ia ba mate. Me no aefa mufemondri mbotonia, labe'e ia ba mbate'e tanõ si yaw̃a.
38 Lõ arõu Yofe andrõ moroi ba Lida. Ba me larongo ira solo'õ khõ Yesu so Wetero ba Lida, ba lafatenge darua niha we'amõi khõ Wetero, lafaogõ goroisa lamane, "Alio'õ ae'e ba da'e."
39 I'anema'õ maoso Wetero i'o'õ ira. Me irugi da'õ, ba la'ohe ia ba mbate'e tanõ si yaw̃a. Lahurufai Wetero ira lakha mbanua ba da'õ, lalau me'e ba la'oroma'õ nukha awõ mbaru sebua nitagu Doreka khõra me auri nasa ia.
40 Ifofanõ ira baero fefu, ba ibalõduhini zalo wangandrõ. Aefa da'õ i'otahõgõ mboto Doreka ba imane, "He Tabita, faoso!" Ibokai hõrõnia Doreka, ba me i'ila Wetero ilau mudadao.
41 Igogohe dangania Fetero ba itolo ia wezizio. Aefa da'õ ikaoni Fetero niha samati si so ba da'õ awõ ndra lakha mbanua andrõ, ba ibe'e khõra Doreka si no ifuli auri andrõ.
42 Ba tehõngõ duria andrõ ba zi sagõrõ Yofe, irege ato zi faduhu tõdõ khõ Yesu si tobali Razo Sangorifi khõra.
43 Torõi Wetero mato ha'uga ngaluo ba da'õ ba nomo tuka guli sotõi Simoni.
sabda_ylsa
Yayasan Lembaga SABDA
sabda_ylsa
Selengkapnya
SABDA Alkitab
Podcast SABDA
Slideshare SABDA