Alkitab Karaoke

Loading audio...

Catatan: Perhitungan audio timestamp (ketepatan waktu antara audio dan teks) berdasarkan perhitungan mesin / algoritma.

¹ Sementara ano Saulus terus gaoh mirak ngancam rik ngebunuh jelma-jelma sai nutuk Tuhan Isa. Ia mik jama imam agung,

² rik ngilu surat kuasa untuk mik jama jelma-jelma sai mimpin lamban-lamban ibadah ulun Yahudi di Damsyik, in kik ia ngehalu di dudi jelma-jelma sai percaya jama Isa, ia dapok nangkok tian rik ngusung tian mik Yerusalem.

³ Sementara mik nuju Damsyik, waktu radu redik jama kota udi, tiba-tiba suatu sinar jak langit memancar di keliling Saulus.

⁴ Ia tumbak mik tanoh raduni ngedengi suara cawa jama ia, "Saulus, Saulus! Api sebabni niku nganiaya Nyak?"

⁵ "Sapa Niku, Tuan?" Saulus betanya. Suara udi ngejawab, "Nyakdo Isa, sai niku aniaya.

⁶ Kidang tano minjakdo rik kuruk mik kota. Di dudi haga dikeni pandai jama niku api sai harus niku lakuko."

⁷ Jelma-jelma sai nutuk jama-jama Saulus tekanjat hingga mak dapok besuara; mani tian ngedengi suara udi kidang mak ngeliak sai jelma pun.

⁸ Raduni Saulus cecok rik ngebuka matani, kidang matani radu mak ngeliak api-api lagi. Jadi tian nyating culukni rik nuntun ia kuruk mik Damsyik.

⁹ Telu rani sakani ia mak dapok ngeliak rik selama ano ia mak nganik atau nginum sama sekali.

¹⁰ Di Damsyik wat sai jelma sai nutuk Tuhan Isa gelarni Ananias. Di delom suatu pengliakan, Tuhan cawa jama ia. Tuhan cawa, "Ananias!" Ananias ngejawab, "Sayo, Tuhan."

¹¹ Tuhan cawa, "Ayu berangkat tano. Mikdo di lamban Yudas di Renglaya Lurus. Tanyako di dudi jelma sai gelarni Saulus sai asal jak kota Tarsus. Jelma udi sedang bedua,

¹² rik di delom suatu pengliakan ia ngeliak sai bakas, gelarni Ananias, ratong jama ia rik ngepikko culuk di atasni in ia dapok ngeliak lagi."

¹³ Ananias ngejawab, "Tuhan, nyak radu ngedengi lamon jelma cawa mengenai jelma inji, terutama mengenai penganiayaan-penganiayaan sai ia lakuko tehadap umat-Mu di Yerusalem.

¹⁴ Rik tano ia radu ratong mik dija seizin jak imam-imam kepala untuk nangkok sunyinni jelma sai percaya jama Niku."

¹⁵ Kidang Tuhan cawa jama Ananias, "Mikdo gaoh! Mani Nyak radu milih ia beguai untuk Nyak, in ia ngabarko tentang Nyak jama bangsa-bangsa bareh sai mak beragama Yahudi rik ia jama raja-raja rik jama umat Israel juga.

¹⁶ Rik Nyak tenggalan haga nunjukko jama ia sunyinni penderitaan sai harus ia alami ulihni Nyak."

¹⁷ Maka Ananias pun mikdo di lamban udi rik ngepikko culukni di atas Saulus. "Puari Saulus," ani Ananias, "Tuhan Isa sai Puari liak di tengah renglaya waktu Puari sedang mik dija, Iado sai ngayun nyak ratong in Puari dapok ngeliak luot rik dikuasai ulih Ruh Allah."

¹⁸ Saat seno juga sai hal sai injuk henak iwa telepas jak mata Saulus rik ia dapok ngeliak luot. Maka ia pun minjak, terus dibaptis.

¹⁹ Rik radu jak mengan, ia jadi kuat lagi. Saulus tinggal di Damsyik jama jelma-jelma sai nutuk Isa pira-pira rani sakani.

²⁰ Ia langsung mik lamban-lamban ibadah rik mulai ngabarko bahwa Isa udido Anak Allah.

²¹ Sunyinni ulun hiran ngedengi Saulus. Tian cawa, "Bukankah ia sai di Yerusalem radu ngebunuh sunyinni jelma sai percaya jama Isa? Ia ratong mik dija justru untuk nangkok rik ngusung tian jama imam-imam kepala!"

²² Kidang Saulus makin kuat pengaruhni. Bukti-bukti sai ia kemukako mengenai Isa ngeyakinko nihan bahwa Isa anodo Raja Penyelamat, sampai jelma-jelma Yahudi sai tinggal di Damsyik mak dapok lagi ngebantah.

²³ Radu jak liwat pira-pira waktu sakani ulun-ulun Yahudi sepakat untuk ngebunuh Saulus.

²⁴ Kidang rencana tian kepandaian jama ia. Di rani di bingi tian nunggu di rangok gerbang kota untuk ngebunuh ia.

²⁵ Kidang di sai bingi, jelma-jelma sai nutuk Saulus ngakuk ia, raduni ngeregahko ia di delom sai keranjang ngeliwati sesai kota.

²⁶ Saulus mik Yerusalem, rik di dudi ia berusaha begabung jama jelma-jelma sai nutuk Isa. Kidang tian rabai jama ia, mani tian mak percaya bahwa ia benor-benor radu jadi jelma sai nutuk Isa.

²⁷ Kak raduni Barnabas ratong jama ia, raduni ngusung ia mik jama-jama rasul-rasul. Barnabas nyeritako jama tian injuk repa Saulus ngeliak Tuhan di tengah renglaya rik injuk repa Tuhan cawa jama ia. Barnabas ngeni pandai muneh tentang injuk repa banini Saulus ngajar di Damsyik jama gelar Isa.

²⁸ Maka jak seno Saulus tinggal jama tian, rik bani nihan bekhotbah di seluruh Yerusalem atas gelar Tuhan.

²⁹ Ia cawa rik bedebat juga jama ulun-ulun Yahudi sai bebahasa Yunani, kidang tian berusaha ngebunuh ia.

³⁰ Waktu ulun-ulun percaya barehni pandai tentang hal udi, tian ngusung Saulus mik Kaisarea, kak raduni ngirim ia mik Tarsus.

³¹ Maka jemaah di seluruh Yudea, Galilea rik Samaria jadi tenteram. Dibantu ulih Ruh Allah, rabai jama Tuhan, jemaah-jemaah udi betambah kuat rik betambah lamon.

³² Petrus mik dipa-dipa napol jemaah-jemaah. Suatu rani ia napol umat Tuhan sai tinggal di Lida.

³³ Di disan ia betungga jama sai jelma bakas gelarni Eneas, sai lumpuh rik radu mak minjak-minjak lagi jak rang pedomni walu tahun sakani.

³⁴ Petrus cawa jama Eneas, "Eneas, Isa Almasih ngunyaiko niku. Minjakdo rik uyunko rang pedommu." Waktu seno juga Eneas minjak.

³⁵ Sunyinni penduduk di Lida rik Saron ngeliak Eneas, raduni tian sunyinni percaya jama Tuhan.

³⁶ Di Yope wat sai jelma bebai gelarni Tabita. Ia jelma sai percaya jama Isa. (Gelarni di delom bahasa Yunani iado Dorkas sai retini rusa.) Ia risok nihan ngelakuko hal-hal sai betik rik nulung jelma-jelma mejerih.

³⁷ Waktu seno ia meruyuh raduni mati. Radu jak mayatni dimandiko, ia dipikko di kamar sai di atas.

³⁸ Yope mak sepira jaoh jak Lida. Jadi waktu jelma-jelma sai nutuk Isa di Yope ngedengi Petrus wat di Lida, tian ngutus rua jelma mik jama Petrus jama luhot injuk reji, "Geluk-gelukdo ratong mik dija."

³⁹ Petrus langsung minjak rik nutuk tian. Sesampaini di dudi, ia diusung mik kamar sai di atas. Sunyinni randa di dudi ngerumuni Petrus sambil miwang rik nunjukko jama ia kawai-kawai rik jubah-jubah sai diseruk Dorkas untuk tian waktu ia masih hurik.

⁴⁰ Petrus ngayun tian sunyinni luah, raduni ia belutut rik bedua. Radu jak seno ia ngehadap mayat Dorkas rik cawa, "Tabita, minjak!" Maka Dorkas ngebukak mata, rik waktu ia ngeliak Petrus, ia mejong.

⁴¹ Raduni Petrus nyating culukni rik nulung ia cecok. Kak raduni Petrus ngurau jelma-jelma percaya di dudi jejama randa-randa udi, raduni nyerahko Dorkas sai radu hurik udi jama tian.

⁴² Kabar tentang kejadian udi tesebar mik seluruh Yope, hingga lamon jelma percaya jama Isa sebagai Raja Penyelamat tian.

⁴³ Petrus tinggal di dudi pepira rani lagi di lamban sai jelma penyamak bawak sai gelarni Simon.

Kisah Para Rasul

Video Kisah Para Rasul 9

Ikuti Kami:

KONTAK | PARTISIPASI | DONASI