Alkitab Karaoke

Loading audio...

Catatan: Perhitungan audio timestamp (ketepatan waktu antara audio dan teks) berdasarkan perhitungan mesin / algoritma.

¹ 'O Petrus de 'o Yohanes kayobi-bicarasi 'o nyawa-nyawaka go'ona, de 'o 'imam ma sae-saeke de ma Jou wi Woa ma jo-jaga manga balusu, de mita 'o Sadukioka yaino 'o Petrus de 'o Yohanesino.

² 'Ona posironga yongamoka sababu 'o Petrus de 'o Yohanes yongose 'o nyawa-nyawaka 'ato 'o Yesus wosongenukou ma kawomomioka de ge'ena ma nyo-nyata 'ato 'o nyawa yosonge-songenoka dua yomomikoli.

³ So yakitagoko 'o su-suloko yamididi go'ona de yakisingosama 'o buika. De 'iobirokau so 'ona yakitahanuku ge'enaka sigado ma ngorumika 'asa yaki'urusu.

⁴ Ma 'o nyawa yo'ise-'isenokau 'o su-suloko go'ona manga do-dotoko, manga gudai yongaku. So 'ona kayodogo monga sigado poilia yacaana motoakau.

⁵ Ma bibinie de 'o 'Agamaka ma Hakimi, 'o Yahudioka manga balu-balusu, de 'o 'agamaka ma guru-guru yomalomu 'o Yerusalemuoka.

⁶ 'Ona yomalomu de ma 'Imam ma Amoko 'o Hanas, 'o Kayafas, 'o Yohanes, 'o Aleksander de 'o nyawa 'iodumu gee manga 'asali 'o 'Imam ma Amokino.

⁷ 'O Petrus de 'o Yohanes yaki'asa yakisitaari 'onaka, ge'enaka de 'ona yosano, "Kokia ma do-dagi ngini winisi'aiki 'o nyawa wolugu-lugu gu'una? De 'okia ma guata bolo de to nagu'una wi kuasa niodiai ne'ena?"

⁸ 'O Petrus gee 'o Ngomasa 'Itebi-tebini wiparetano wosango, "Dea-dea 'o Yahudioka ma balu-balusu, de 'o 'Agamaka ma Hakimi!

⁹ Ne'ena ma wange ngini mini'urusu sababu miadiai yaowa-owa, ge'ena la miriwo wimoi wolugu-lugu. De sababu ngini niomau nianako kokia sigado 'o nyawa gu'una kowoluguwau,

¹⁰ so ngini, Dea-dea de mita nioodumu 'o Israel ma nyawa, salingou nianako, 'o nyawa nu'una ne'ena nia bionoka woma'okode de wi roese 'isa-sanangi, sababu de ma Yesus Kristus 'o Nazaretino 'awi kuasa de wi pareta. Ngini winisidelokau 'o Yesus gu'una, duga ma Jo'oungu ma Dutu wisimomikokali.

¹¹ 'O Yesusikau ma dumutu 'o Buku 'Itebi-tebini ma bo-bulaka ne'ena 'ingose, ''O teto gee ngini 'o woa niodi-diai koniapake-pakewau, ge'enau 'idadi ma woa ma ba-bangini ma guata.'

¹² Ka 'o Yesus duga 'idadi 'o nyawa wosilaha. Sababu 'o nyawa 'iregu koi'iwa yamake 'o kuasa ma Jo'oungu ma Dutuno ma ngale 'inasilaha."

¹³ Yo'uru-'urusu yomalomu-lomuno go'ona yoherangi yakimake 'o Petrus de 'o Yohanes koge'ena manga moroini, 'ifoloiosi 'ona yanako 'ato 'o su-suloko yamididi go'ona ka 'o nyawa biasa, manga sekolah koikurutiewa. Ge'enaka 'asa de yanako 'ato 'o su-suloko yamididi 'ona ge'ena yomote-moteke de 'o Yesus.

¹⁴ De 'ona koyakia-kiawau yobicara, sababu 'o nyawa gee wisi'aiokau wi lugu 'una ge'enaka manga bionoka woma'okode de 'o Petrus de 'o Yohanes.

¹⁵ So 'ona yosuloko 'o su-suloko yamididi go'ona yosupu ge'ena yaki'uru-'urusu ma ngiioka, ge'enaka de 'ona yomasikadibangi.

¹⁶ 'Ona yomakadongose konee, "'O nyawa yamididi no'ona salingou kokia pakidiai? 'O Yerusalemuoka yoodumu yanakokau 'o no-nako 'ihera-herangi ge'ena 'ona yodiai. Ngone koidadiwau posipongono ge'ena.

¹⁷ Ma tanu ge'ena 'uwau 'o nyawa kaikudai monga yo'isene, so nou, ngone pakingamo pakisimodo-modongo yamididi go'ona la 'uwau yobi-bicara ma ngale 'o Yesus ka moika ma."

¹⁸ So ge'enaka de yaki'asoko 'o su-suloko yamididi go'ona yowosamoli, de yakidongose 'ato, "Ka ma eta ma koidadiwau niatesongo bolo niodotoko de 'o Yesus wi ronga."

¹⁹ Ma 'o Petrus de 'o Yohanes yosango, "Nginiou ma sirete niatibangi ka'ena yadaene ma Jo'oungu ma Dutu wi bionoka: Miamoteke to ngini, Dea-dea, nia pareta bolo miasingounu ma Jo'oungu ma Dutu 'awi pareta.

²⁰ Sababu koidadiwa mimaogoro miosidemo 'okia naga gee ngomi ma sirete miamakekau de mio'isenokau."

²¹ Yo'uru-'urusu go'ona ka moi ma koyodamakewa ma sababu ma ngale yakihukumu 'o Petrus de 'o Yohanes. So yakingamo 'ifoloiosi yakidukuata 'o su-suloko yamididi go'ona de yakipidilikau, ngano yododato sababu 'o nyawa yoku-kudai go'ona ma Jo'oungu ma Dutu wisiare-arene sababu 'okia naga gee 'idadiokau wolugu-luguoka gu'una.

²² 'Una wolugu kawosidoboanosi de 'awi 'umuru 'o taunu nagi soata 'ipaili de 'i'aiki sababu 'o no-nako 'ihera-herangi.

²³ 'O Petrus de 'o Yohanes yakisisupuno de yolio manga ma-manaika. Yaika de yosijarita 'iodumu gee 'o 'imam ma sae-saeke de 'o Yahudioka ma balu-balusu yongose-ngose 'onaka.

²⁴ Manga ma-manai go'ona yo'isenoka ge'ena, de 'ona yomarimoi yolahidoa ma Jo'oungu ma Dutuka konee, "Jou noku-kuasa, ngona nosidadi 'o diwanga, 'o tonaka, 'o ngooto de 'o sagala moi-moi 'iodumu.

²⁵ De 'ani Ngomasa 'Itebi-tebini ngona nosidemokau 'amia edete de mia dotumika 'o Dautika, to ngona 'ani gilaongo konee: ''Ido'oa so 'o nyawa gee ma Jou kowinako-nakowa yakito'otasa; 'ido'oa so 'o soa-soana manga singinaka yodiai 'okia naga gee ma faedaa koi'iwa-'iwa ma ngale ma Jou wilawani?

²⁶ 'O duniaka ma koa-koana yomadudu-duanga ma ngale yokudoti, de 'o nyawa yola-laagomo yomarimoi wilawani ma Jou de ma Koana Wiiri-iriki 'o Nyawa Wosilaha-laha!'

²⁷ So Jou, sababu ma goungu 'o Herodes de 'o Pilatus yakitoomuokau 'o nyawa gee koninako-nakowa de mita 'o Israel ma nyawa 'o kotaka ne'ena. 'Ona yomalomu ma ngale wilawani 'o Yesus 'ani Ro-riwo wotebi-tebini gu'una, gee ngona wonigoraokau wodadi 'o Koana 'o Nyawa Wosilaha-laha.

²⁸ 'Ona yomarimoi yadiai 'okia sonaa moi-moi, gee ka ma sirasi ngona nositatapuokau 'ato ge'ena dua 'idadi. De ngona nositatapu ge'ena moteke to ngona ma sirete 'ani pareta de 'ani mau.

²⁹ Jou, ne'ena minilega kokia ngomi misimodo-modongo. Minikulano 'o moroini ngomino 'ani gilaongo ne'ena, la 'uwa miododato miositotara 'ani demo.

³⁰ Noriwo la 'o nyawa manga panyake 'i'aiki de nodiai 'o no-nako 'ihera-herangi de mita 'o hali 'ila-laagomo de 'o Yesus 'ani Ro-riwo wotebi-tebini gu'una 'awi kuasa."

³¹ 'Ona yomalahidoa 'iduangino de 'o ngii gee yomalomu-lomunoka 'igiwi. 'Ona yoodumu 'o Ngomasa 'Itebi-tebini yakipareta so 'ikurue 'ifoloi yomoroini yobi-bicara ma ngale 'o Habari ma Jo'oungu ma Dutuno.

³² 'O nyawa yongaku-ngaku yoodumu go'ona yo'ahu ka 'o singina moi. 'Onaka naga komoiwa moi yatibangi 'ato 'okia naga gee to 'ona ge'ena ka to 'onau. 'Okia sonaa moi-moi 'onaka naga ge'ena kayoripake.

³³ De 'o kuasa ma amoko, 'o su-suloko go'ona yosisakisii ma ngale 'o Yesus wowangokauoli. So ma Jo'oungu ma Dutu 'ifoloi wakisibarakati.

³⁴ De komoiwa moi naga 'onaka yakisidukurangi 'o kianikia sababu godagee de manga tonaka de manga woa, ge'ena 'ijaga yawukunu manga tonaka bolo manga woa ge'ena; deika ma 'ija ge'ena ya'asa de yokula 'o su-sulokika. 'Asa deika ma pipi ge'ena yosibula-bula kiaka naga gee yoparaluu.

³⁵ (4:34)

³⁶ Koge'enali mita 'o Yusuf. 'Una mita 'awi tonaka wawukunu, de ma tonaka ma 'ija ge'ena wa'asa wokula 'o su-sulokika. 'O Yusuf 'una 'awi 'asali 'o Lewino, 'o Siprus ma nyawa. 'Una 'o su-suloko wisironga mita 'o Barnabas, ma ngale, 'o Nyawa Woaru-aru la manga Singina 'Ikuata.

³⁷ (4:36)

Kisah Para Rasul

Video Kisah Para Rasul 04

Ikuti Kami:

KONTAK | PARTISIPASI | DONASI