¹ Hwena ansa emki enlala gwe-gwibin: Aumwa hap de yaklana an zen angkam lwa seꞌan, dekam okamana an serkam tangan sa karek gwe zaher.
² Sap dekam zini beyakam sa anakan lowehe gwer: zere en mo timsi de ngalap gwe-gwibin, te-alasa de ensa lwa gweblan, zere en mo bosesa de mam gul gwen, serkam de zena-zena gwe-gwen, aha zisi de lamang ta gwibin, an-bi zemka bejen betek gwizimdin, Alapsa bejen enlala gwe-gweblan, wal bose zemka bejen anakan gublun, “Ema tol asa sam tala.”
³ Hen bejen kwasang gwibiridan, zi bosyan hap de jalsa lam gul gweblan, boton ol gol halada gwen, wal bosyansa de golegu gwen, darak soson, zenaka bejen zerinik gwen, dawem enlalasa bejen zer irin, bolte-bolte enlala enkam de gwe gwen, totore-totorekam de gwe gwen, syan-syan enkam de lowehe gwen, hwena Alapsa bejen enna lwablan.
⁴ (3:3)
⁵ Kire zini zen ek enkam anakan egu gwenan, “Ëe an Kristen zi.” Hwena zen man baes ta gwenan– Alap de zere mo sosonkam zeno mae mo lowe hensa li yul sone gwizimdin hipye. Zep kirekam de zisi emki langa tasik gwibin.
⁶ Ahakon hen we walsya gol-gol san aningkim yasik da gwibirin. Zen anakare we walsya karek san dep titi da gwibirin: enlala sin-sin wenya, enlala hole-hle beya wenya, hen kirekam-kirekam karek hap de enlala edowe hanan wenya.
⁷ Kirekam de we walya man esam gwesik gwenan– ol esesa de esane gwe-gwen hapye. Hwena zen bejen anakan klis gun, “An eiwa dena. An boton.”
⁸ Men kirekam orep Yanes Bak ne Yambres Bak ne Musasa tru-tru ul gweblaka, zep yasik tabin hip de zini in hen kirekam angkam eiwa de tawa tabin nik tru-tru nul gweꞌan. Zen mes enlala nakon ehai gwek. Zen mes tangan Kristen zi mo taiblibin nikon elanga gwesik, hwena totore tawa tabinsi daibli gwibirin.
⁹ Hwena kire zisi molya holokam ang neibirida gwek. Sap nabakam sa anakan dam dasik gwibir, “An enlalana joblo-topna,” – men kirekam hen orep de auyan-azana zi darena insa dam nosusukke.
¹⁰ Hwena Timotius Bak, em ano tawa tabinni tawana– hen ano gwenna, hen ano dwam gwibinni dekam de enho kles gwesin sremkam gwe gwen hap denaye. Hen em mese asa anakan tame taka, “Zen Biansa de taibliblannak tatem zauk gwenda. Wal bose wal zemka de kwasang gwibirida gwen hap alp gwe-gwenda, hen nabakam hom jal gwe-gwenda.”
¹¹ Asa kim Yesussu de taibliblan srem wenya ena Antiokiak, Ikoniumk, hen Listrak karek da gwek, dekam em hen zewe gweꞌanka. Zep em mese dekam asa anakarekam kara ta gweka, “Zen sap kareksa goltowe gwenda, hwena nama tatetekam zauk gwenda.” Hendep dekam man Bian tingare abe hap de jal zi mo taha nakon asa zeser sone gweka.
¹² Asa en molya kirekam ne gweblak. Hwena tingan men zen Kristus hon de etal gwesin hip edwam gwe-gweꞌan, desa hen kirekam sa karek da gwibir.
¹³ Hwena enlala karek zini hen yasik tabin hip de zini sa etan zere mae mo karek-karekna esek nulse zahe gwer. Zen sap aha zisi yasik da gwibirin, hwena zena hen hom anakan tame nul gwenan, “Hare ee an syauk sun dep am gwe haꞌan.”
¹⁴ Zep tane tol, men desa emsa tawa da gwek, em mese hendep dawemkam taiblibirki. Zep zen zewe en tatem zauk. Sap ee in zen emsa tawa la gwek, em mese dawemkam asa tame tabirki.
¹⁵ Em betek nakone Alap mo ola tame gulku. Alap mo ola, zen dekon zep enlala blala hata gwenda, dekam zep zini engaya gwen hap de orana dam dasik gwenan– Kristussu de taibliblankam.
¹⁶ Sap Alap mo ola mensa ale nuk, zen kitak Alap zere mo Enho nakore naka. Hen zen dawem tanganna– dekam de tawa ta gwibin hip, oto tasik gwibin hip, halen ta gwibin hip, hen ora dawem san dikim dam tasik sone gwibin hipye.
¹⁷ Alap mo nganak de syal ta gwen zini, nen de desa enhonak lone gwenkam, dekam esa anakan tame ul gwer, “Ëe kirekam asa syal gwe-gwer.” Hen banakare maesa de goltowe gwenkam, dekam neno mae mo enlala blala sa sowehe gwera.