Loading audio...
Error: Maaf, audio tidak dapat diputar.
(It seems your browser does not support HTMLMediaElement.playbackRate, so you will not be able to change the speech rate.)
Catatan: Perhitungan audio timestamp (ketepatan waktu antara audio dan teks) berdasarkan perhitungan mesin / algoritma.
1 Kekipedneh, O kinanak-kinanakku, do' muyuh sembayang kuan kai, pad bala Tuhan temubu' idi uen ngerayeh, mepad kudeng luk mangun arang muyuh teh.
2 Sembayang kuan kai pad kai miak uen muit ratnan lemulun luk melalid idi luk dat, ngaceku baken amung-amung lemulun manu.
3 Iamo' Tuhan lutep maya' jani'. Ieh miak ngeraben nemuyuh idi matar nemuyuh ratnan Lemulun luk Dat ineh.
4 Idi bang Tuhan kai merapet nemuyuh, pad muyuh nganau' idi miak nganau' luk duken kai nemuyuh.
5 Idi do' Tuhan ngeruid niat muyuh pad muyuh ngalap awa Allah idi ulai niat Keristus ineh.
6 O kinanak-kinanakku, kai periteteng nemuyuh dengan ngadan Tuhan tau Yésus Keristus, ngado burur muyuh ratnan anid-anid kinanak luk na petulu kekamenneh, idi luk na maya' bada' luk ilapneh rat nekai.
7 Ngaceku muyuh sebuleng kali' kudeng apeh muyuh miak maya' lawé kai, ngaceku kai na nenganau' luk na petulu arang muyuh.
8 Na kai nekuman luk kenen dengan na raga. Iamo' kai mekél idi merur bang kekamen kai tebaco kedangan, pad kai na ngesusa' seburur pana' arang muyuh.
9 Kai nenganau' kudeng ineh, baken ngaceku kai na miak mutuh pedengan rat nemuyuh, iamo' pad kai mangun ku aceh luk pinginud kuan muyuh.
10 Ngaceku kareb kai tudo dengan muyuh, kai neperiteteng nemuyuh kudeng ini: Kudeng idé-idé luk na sikal ngakem, aleg ieh kuman.
11 Kai mala kudeng ineh ngaceku kai ninger ratnan tuda'-tuda' burur arang muyuh luk mekupé. Na ideh ngakem, iamo' semuet bang gayam lun baken mo'.
12 Idi bang ngadan Tuhan Yésus Keristus kai periteteng nedeh idi mada' nedeh: do' ideh ngakem dengan na ria' idi kuman luk lapendeh sebuleng.
13 Iamo' muyuh ini, O kinanak-kinanakku, aleg muyuh musam nganau' luk do'.
14 Kudeng idé-idé na maya' bala kai luk bang surat ini, do' muyuh nier lemulun ineh idi aleg perurum neneh, pad ieh migu'.
15 Aleg muyuh ngerawé neneh mangun ku bunu', iamo' mada' neneh mepad kudeng seburur kinanak.
16 Do' Tuhan sebuleng luk lawa amung-amung awang megéi' maré awang kuan muyuh bang luk amung-amung. Idi do' Tuhan ngedengan amung-amung muyuh.
17 Dengan ticu'ku sebuleng ui ngayud ini: Tabi' rat negku Paulus. Kudeng ini lawéku nén anid-anid suratku. Kudeng ini ayudku.
18 Do' katu ratnan Tuhan tau Yésus Keristus ngedengan amung-amung muyuh.
sabda_ylsa
Yayasan Lembaga SABDA
sabda_ylsa
Selengkapnya
SABDA Alkitab
Podcast SABDA
Slideshare SABDA