Loading audio...
Error: Maaf, audio tidak dapat diputar.
(It seems your browser does not support HTMLMediaElement.playbackRate, so you will not be able to change the speech rate.)
Catatan: Perhitungan audio timestamp (ketepatan waktu antara audio dan teks) berdasarkan perhitungan mesin / algoritma.
1 Dob ai marpesta Paskah ma si Josia hubani Jahowa i Jerusalem, anjaha isayat sidea ma biribiri Paskah bani ari sapuluh ompat bulan sada.
2 Ihatahon raja ai ma malim ai mangkorjahon jabatan ni sidea, anjaha ipatenger ma uhur ni sidea mangkorjahon horja i Rumah ni Jahowa
3 Anjaha ihatahon do homa hubani halak Levi, siajari ganup Israel, anjaha na dob pinapansing ai bani Jahowa, “Nahkon nasiam ma poti na mapansing in hubagas rumah na dob pinajongjong ni si Salomo, anak ni si Daud, raja ni Israel; seng pala be boratan abara nasiam mangusung in. Halani ai, balosi nasiam ma Jahowa, Naibata nasiam, ampa bangsa-Ni halak Israel.
4 Sirsir ma nasiam marugas mangihutkon horin nasiam, mar sasaompung romban hubani aturan ni si Daud, raja ni Israel, ampa si Salomo anakni ai.
5 Anjaha jongjong ma nasiam ibagas ianan na mapansing ai romban hubani parbanjei ni ginompar ni sanina nasiam humbani bangsa ai, anjaha mardomu hubani parbanjei ai homa halak Levi mar sasaompung.
6 Dob ai sayat nasiam ma biribiri Paskah ai, manguras ma nasiam, pasirsir nasiam ma bani sanina nasiam, bahen nasiam ma romban hubani hata ni Jahowa marhitei si Musa.”
7 Dob ai ilayak-layakkon si Josia ma hubani halak na mabuei ai anak ni biribiri pakon anak ni hambing, gabe galangan Paskah bani ganup jolma na ijai, tolu puluh ribu bueini ampa tolu ribu lombu; ganupan ai humbani arta ni raja ai do.
8 Kopala-kopalani pe sirsir do mamberehon hubani bangsa ai, hubani malim ampa hubani halak Levi. Si Hilkia, si Sakarya ampa si Jehiel, kopala bani rumah panumbahan ai, ibere sidea do bani malim bahen galangan Paskah dua ribu onom ratus biribiri ampa tolu ratus lombu.
9 Si Kananya pe, si Semaya pakon si Netaneel, saninani ai, pakon si Hesabya, si Jehiel ampa si Josabad, kopala ni halak Levi, ibere do hubani halak Levi bahen galangan Paskah lima ribu biribiri ampa lima ratus lombu.
10 Sonai ma pangaturni bani horja ai: Jongjong ma malim bani ianan ni sidea, sonai homa halak Levi mar sasahorin, romban bani parentah ni raja ai.
11 Dob ai isayat sidea ma biribiri Paskah ai, anjaha ipispiskon malim ai ma daroh na jinalo ni sidea ai hubani tangan ni sidea; anjaha halak Levi ai mambobaki galangan Paskah ai.
12 Dob ai ipalegan sidea ma galangan situtungon ai, laho mambagihon ai mangihutkon banjei-banjei ni halak na mabuei mar sasaompung, laho manggalangkon ai bani Jahowa, songon na tarsurat bani buku ni si Musa. Sonai do homa ibahen sidea hubani lombu ai.
13 Dob ai ipanggang sidea ma biribiri Paskah ai bani apuy mangihutkon aturan, anjaha ilompah sidea ma anggo galangan na mapansing ai ibagas hudon, serek pakon balanga, dob ai iboan ma ai podas hubani halak na mabuei ai.
14 Dob ai ipasirsir sidea ma bani sidea sandiri ampa bani malim ai; ia malim ai, ai ma ginompar ni si Aron, pongut do sidea manggalangkon galangan situtungon ai ampa taboh-taboh ai ronsi bodari; halani ai ipasirsir halak Levi ai ma bani sidea sandiri ampa bani malim, anak ni si Aron ai.
15 Ia sipandoding, ai ma ginompar ni si Asap, jongjong do bani ianan ni sidea bei, romban hubani aturan na binahen ni si Daud, si Asap, si Heman pakon si Jedutun, halak na marpanonggoran bani raja ai; halak sijaga horbangan, manjaga bani ganup horbangan. Seng pala misir sidea humbani horjani bei, ai sanina ni sidea, halak Levi ai do na pasirsirhon bani sidea.
16 Atur do parugason bani Jahowa sadarini ai, ai ma na marpesta Paskah ai ampa na manggalangkon galangan situtungon ai bani anjapanjap ni Jahowa, romban hubani na pinarentahkon ni raja Israel.
17 Jadi marpesta Paskah ma halak Israel, na adong ijai, ampa marpesta ruti na so niigaran, pitu ari dokahni.
18 Seng dong ongga pesta Paskah na sonai ipamasa i Israel, olat ni panorang ni si Samuel; seng dong ongga ope pesta Paskah na sonai ai ipamasa raja-raja ni Israel, songon na pinamasa ni si Josia, malim, halak Levi, haganup Juda ampa Israel na ijai, ronsi pangisi ni Jerusalem.
19 Pasapuluhualuh-tahunkon dob manrajai si Josia, ijai ma masa pesta Paskah ai.
20 Dob salpu haganupan ai, dob iumban si Josia rumah panumbahan ai, tangkog ma si Neko, raja ni Masir, sihol marporang dompak Karkemis, na bani Bah Eprat. Jadi bingkat ma si Josia manjumpahkonsi.
21 Tapi isuruh ma suruhanni manjumpahkon si Josia, nini ma, “Aha adong paharanta, ham raja ni Juda? Seng sihol mandorab ham ahu sadari on, tapi mandorab ginompar ni munsuhku, na mamunsuhi ahu do; anjaha Naibata do na mamarentahkon mangoloskon ai. Parontihon ma mangimbang Naibata, na mangkasomani ahu, ase ulang magou ham bahenonni.”
22 Age pe sonai seng ra si Josia surut humbani, tapi iboranihon ma dirini laho marporang dompaksi. Seng ra ia manangihon hata ni si Neko; na marharorohan humbani pamangan ni Naibata do hape ia, gabe saud ma na marporang ai i Pamah Magiddo.
23 Jadi ipanah siparsior ma Raja Josia, dob ai nini raja ai ma dompak juakjuakni, “Boan nasiam ma ahu hunjon, ai parah tumang do ugahku.”
24 Dob ai iangkat juakjuakni ma ia hun gareta porang, anjaha inahkon ma ia hubani gareta na legan, anjaha iboan ma ia hu Jerusalem. Dob ai matei ma ia, anjaha itanom ibagas tanoman ni ompungni. Pusok do ganup uhur ni Juda ampa Jerusalem halani parmatei ni si Josia.
25 Si Jeremia pe ibahen do sada doding tangis-tangis bani si Josia; anjaha ganup pandoding dalahi age pandoding naboru manaringati si Josia ibagas doding tangis-tangis ni sidea ronsi sadari on. Gabe aturan do ai i Israel, tonggor ma, tarsurat do ai ibagas Buku Tangis-tangis.
26 Barita na legan ai ope pasal si Josia ampa hadaulaton ni uhurni, na domu hubani na tarsurat ibagas Buku Titah ni Jahowa,
27 ampa pambahenanni, na parlobei pakon na parpudi, tonggor ma, tarsurat do ai ibagas Buku ni Raja-raja Israel ampa Juda.
sabda_ylsa
Yayasan Lembaga SABDA
sabda_ylsa
Selengkapnya
SABDA Alkitab
Podcast SABDA
Slideshare SABDA