Loading audio...
Error: Maaf, audio tidak dapat diputar.
(It seems your browser does not support HTMLMediaElement.playbackRate, so you will not be able to change the speech rate.)
Catatan: Perhitungan audio timestamp (ketepatan waktu antara audio dan teks) berdasarkan perhitungan mesin / algoritma.
1 Nampa nasuarri Yosia Allo Lompo Paskaya ri Yerusalem untu’ ampakala’biriki Batara. Gimbala’ untu’ anjo allo lompoa nipolommi ri tanggala’ 14 bulang se’re.
2 Nabagemi Yosia tugasa’na sikamma imanga massing lanajamaya ke’nanga lalang ri Balla’Na Batara, siagang napakainga’ ke’nanga sollanna massing nagaukang baji’ jama-jamanna ke’nanga.
3 Sikamma tu Lewi le’baka nitangkasi untu’ Batara, siagang a’jari guru-gurua ri tu Israel anggappai parenta kamma anne battu ri Yosia, "Boliki anjo Patti Parjanjiang matangkasaka lalang ri Balla’Na Batara nabangunga Karaeng Salomo ana’ bura’nena Daud. Tea’ mako palesso’-lessoki pole ri batena. Layani Karaeng Allata’alanu siagang bansa Israel umma’Na.
4 Pasadiami kalennu ri Balla’Na Batara situru’ massing regunu, siagang situru’ pambageang tugasa’ le’baka nipattantuangko ri Karaeng Daud siagang Karaeng Salomo ana’ bura’nena.
5 Atoro’ bajiki massing regunu, sollannu tuli sadia ngaseng untu’ antulungi sikamma kalompo’na tu Israel ri Balla’Na Batara.
6 Musti ammolongko gimbala’ untu’ Allo Lompo Paskaya. Lanri kammana anjo massing pasadiai kalennu, sollannu siratang anynyomba mae ri Batara; kammayatompa appasadiako koro’bang-koro’bang eroka nipassareang mae ri Batara, sollanna tu Israel maraengannaya akkulle tongi nagaukang apa Naparentakanga Batara tete ri Musa."
7 Sollanna akkulle assare koro’bang Paska sikamma tau hadereka ri anjo Allo Paskaya, assare tommi Karaeng Yosia sumbangang olo’-olo’ piara kalenna iamintu 30.000 gimbala’, ana’ gimbala’ siagang bembe rungka, kammayatompa 3.000 sapi laki.
8 Manna sikamma pagawe-pagawena Yosia assare tongi sumbangang untu’ imang-imanga siagang tu Lewia battu ri sikontu ra’yaka. Pagawe-pagawe nisare tugasa’ untu’ Balla’Na Batara, iamintu Imang Lompo Hilkia, Zakharia siagang Yehiel, sipattallui assare tongi mae ri imanga iamintu 2.600 ana’ gimbala’ siagang bembe rungka, kammayatompa 300 sapi laki untu’ passare mae ri anjo allo passua’-suarranga.
9 Sikamma pamimpinna tu Lewi iamintu: Konanya, Semaya siagang Netaneel sari’battanna, Hasabya, Yeiel, siagang Yozabad, assare tongi mae ri tu Lewi 5.000 ana’ gimbala’ siagang bembe rungka, kammayatompa 500 sapi laki untu’ passare mae ri anjo passua’-suarranga.
10 Ri wattunna sadia kabusu’mo untu’ kasuarranna Allo Paskaya, massing mangemi ri tampa’na sikamma imanga siagang regu-reguna tu Lewia, sangkamma le’baka naparentakang karaenga.
11 Nampa napolommo ke’nanga olo’-oloka untu’ ampakalompoi anjo Allo Paskaya; tu Lewi ampasuluki kukkulu’na siagang imang-imanga amparacciki cera’na anjo olo’-oloka nai’ ri tampa’ pakkoro’bangnganga.
12 Tunggala’ kalompo’ kaluarga niaka hadere’ anjoreng massing anggappai tassikayu battu ri anjo koro’bang nipassareanga salaku koro’bang nitunu. Jari akkullemi ke’nanga assare koro’bang situru’ paratorang niaka tattulisi’ lalang ri kitta’ Hukkung Napassareanga Musa.
13 Nampa nalangga tu Lewi anjo koro’bang Paskaya irate ri pepeka, situru’ paratoranga; siagang napallui koro’bang-koro’bang nisa’laka lalang ri pamaja’, lalang ri uring lompo, lalang ri uring butta, nampa nibage linta’ dagenna mae ri taua.
14 Le’baki anjo nampami tu Lewi napasadia tawana todong ke’nanga siagang untu’ tawana sikamma imang jari-jarina Harun. Nasaba’, sa’genna bangngi anjo sikamma imanga tena nammari-mari anjama untu’ ampassareangi koro’bang nitunua siagang antunui jannana anjo koro’bang-koro’banga.
15 Sikamma pakarena musika battu ri passilokoang bijanna Asaf ri suku Lewi, niaki ri tampa’ tugasa’ le’baka natantukang Karaeng Daud untu’ ke’nanga. Iaminne areng-arenna ke’nanga: Asaf, Heman, siagang Yedutun tau anjamaya untu’ karaenga. Sikamma pangawala’na pakke’bu’ lompoa tena naparallu ambokoi tampa’na ke’nanga, lanri akkulle tonji nagaukang anjo Allo Lompo Paskaya ri massing tampa’na ke’nanga nibantu ri tu Lewi maraengannaya.
16 Anjo alloa nagaukang kabusu’mi ke’nanga sikontu apa naparentakanga Karaeng Yosia untu’ kasuarranna anjo Allo Paskaya, kammaya ngaseng anjo passare-passare ri tampa’-tampa’ pakkoro’bangnganga.
17 Tuju alloi sallona sikontu ra’ya’ Israel niaka hadere’ anjoreng ansuarri Allo Lompo Paskaya siagang Allo Lompo Roti Tenaya Nammake Pa’gambang.
18 Anjo Allo Paska kammaya tena le’bakapi nisuarrai baku’na jammang attallasa’na Na’bi Samuel. Tenapa manna sitau battu ri karaeng-karaeng rioloangannaya le’ba’ anggaukangi anjo passua’-suarrang Allo Lompo Paskaya sangkamma nisuarria anjo
19 lalang ri taung makasampulo assagantuju ammarentana Yosia; kalenna Karaeng Yosia siagang imang-imanga, sikamma tu Lewia, tu Yehuda siagang tu Israel, kammayatompa pandudu’na Yerusalem anggaukangi anjo passua’-suarranga.
20 Le’baki nagaukang kabusu’ Karaeng Yosia anjo sikammaya untu’ Balla’Na Batara, ero’mi Nekho karaeng Mesir mange ampimpingi pasukanna untu’ a’lampa a’bundu’ ri Karkemis ri ampi’na Binanga Efrat. Ero’mi Yosia ampisangkai Nekho,
21 mingka akkirimmi pasang Nekho mae ri Yosia angkana, "Anne bunduka teai urusannu, karaeng Yehuda! Erokka’ battu teai ikau lakuagang a’bali a’bundu’, passangalinna untu’ angngewai musu-musungku, siagang Nasuroa’ Allata’ala akkaro-karo a’gio’. Agang mae ri nakke Allata’ala, lanri kammana anjo teako rompaia’, gassingka ikau sallang niancuru’."
22 Mingka kammaji lompona pattujunna Yosia untu’ angngewa, siagang taerokai appilangngeri Yosia ri apa Napaua Allata’ala tete ri Karaeng Nekho. Ammake palusu’mi Yosia nampa antama’ ri pa’bundukanga ri lappara’ rawana Megido.
23 Lalang anjo pa’bundukanga nitabami ri pana Karaeng Yosia. Nampa naparentakang ata-atanna sollanna nierang assulu’ battu ri pa’bundukanga lanri sanna’na loko’na.
24 Niangka’mi ri ke’nanga battu ri karetana nampa nipalette’ ri kareta maraeng niaka anjoreng, nampa nierang mange ri Yerusalem. Anjoremmi mate nampa nitarawang ri pa’jerakkanna sikamma karaenga. Susa kabusu’mi tu Yehuda siagang Yerusalem lanri anjo kamateanna.
25 Appareki Na’bi Yeremia se’re kelong karru’ untu’ Karaeng Yosia. Sa’genna kamma-kamma anne anjo kelonga nipakei ri Israel ri pakelonga, baji’ bura’ne kammayatompa baine, lalang pangngu’rangi kasusaang mae ri kamateanna Yosia. Anjo kelonga nipantamaki ri passe’reanna kelong-kelong karruka.
26 Pau-pau maraengannaya ri passala’na Yosia, ri passala’ pangngaina mae ri Batara, siagang antekamma mannurukinna mae ri hukkung-hukkunNa Batara,
27 bodona kana, ri passala’ sikontu pau-pau katallassanna battu ri pakaramulana sa’genna kala’busang, niaki nicata’ lalang ri kitta’ Pau-pauanna Sikamma Karaeng Israel siagang Yehuda.
sabda_ylsa
Yayasan Lembaga SABDA
sabda_ylsa
Selengkapnya
SABDA Alkitab
Podcast SABDA
Slideshare SABDA