Loading audio...
Error: Maaf, audio tidak dapat diputar.
(It seems your browser does not support HTMLMediaElement.playbackRate, so you will not be able to change the speech rate.)
Catatan: Perhitungan audio timestamp (ketepatan waktu antara audio dan teks) berdasarkan perhitungan mesin / algoritma.
1 Dob ai ibuat ganup bangsa Juda ma si Usia, marumur sapuluh onom tahun ope, anjaha ipabangkit sidea ma ia gabe raja, gantih ni si Amasia, bapani ai.
2 Ia do na patoguhkon huta Elat, anjaha mulak bani Juda ibahen, dob modom raja ai rap pakon ompungni.
3 Marumur sapuluh onom tahun do si Usia, sanggah na bangkit raja ia, anjaha lima puluh dua tahun do dokahni manrajai Jerusalem; goran ni inangni si Jekolia do, hun Jerusalem.
4 Ihorjahon do rosuh ni Jahowa, songon na binahen ni si Amasia, bapani ai.
5 Sai iporluhon uhurni do mangindahi Jahowa sadokah manggoluh si Sakaria, na mangajarisi marhabiaran bani Naibata, anjaha sadokah ipindahi Jahowa, itumpak Naibata do ia.
6 Ai bingkat do ia marporang dompak halak Palistim, anjaha irumbakkon do tembok ni huta Gat, tembok ni huta Jabne ampa tembok ni huta Asdod; anjaha itombei ma huta-huta i tanoh inggot ni Asdod pakon bani ianan na legan i tanoh ni halak Palistim.
7 Itumpak Naibata do ia mangimbang halak Palistim ampa halak Arab, na marianan i Gur-Baal ampa mangimbang halak Maoni.
8 Manggalar sohei do halak Ammon hubani si Usia, gabe tarambilan ma goranni das hu Masir, ai lambin margogoh do ia.
9 Ambahni ai ipauli si Usia do menara i Jerusalem, i atas ni Horbangan Parsuhi-suhi, i atas ni Horbangan Habungan ampa bani ganup suhi-suhi, anjaha ipatoguh ma ai.
10 Ipauli do homa menara i halimisan anjaha ihurak buei parigi, ai buei do pinahan i tanoh bornoh ampa i pamah, ambahni ai adong do bani parhorja i juma ampa i pohon anggur, i tanoh dolog ampa i tanoh na lambutan, ai rosuh do uhurni marjuma-juma.
11 Ambahni ai buei do bala ni si Usia na tarlatih marporang, na bingkat hu parporangan marbanjei-banjei mangihutkon buei ni bilangan ni sidea, na tinontuhon ni si Jehiel, jurutulis ai ampa si Maseya panuturi ai, na binobahon ni si Hananya, sada humbani kopala-kopala ni raja ai.
12 Bilangan ni ganup kopalani mar sasaompung, humbani puanglima dua ribu onom ratus halak do.
13 Sidea do mambobahon bala, tolu ratus pitu ribu lima halak bueini, na gopas marporang anjaha gogoh tumang, laho mangurupi raja ai mangimbang munsuh.
14 Ihatahon si Usia ma paulihon bani haganup bala ai gantar-gantar, tanja, tangkuluk, baju partahanan, panah pakon batu ni umbalang.
15 Ipauli do homa i Jerusalem parugas porang, na tinukangan ni halak na pandei-pandei, na ninahkon hubani menara ampa hubani suhi-suhi, laho manembakkon panah ampa batu bolon. Jadi tarambilan tumang ma ia das hubani na daoh, ai dapotan pangurupion na tarsulur do ia, gabe markuasa tumang ma ia.
16 Tapi dob markuasa ia, gijang ma uhurni gabe hamagouanni; ai mardousa do ia dompak Jahowa, Naibatani, ai imasuki do Rumah ni Jahowa, laho manutung dahupa i atas anjapanjap pardahupaan.
17 Iirikkon Malim Asarya do ia namin hubagas rap pakon ualuh puluh malim ni Jahowa na markuasa.
18 Ilanglangi sidea do Raja Usia, nini sidea ma bani, “Ham Usia! Seng patut ham manutung dahupa bani Jahowa, tapi pitah malim, anak ni si Aron do, na dob niuras hubani horja on. Luar ma ham humbani ianan na mapansing on, ai na salah do na binahenmu in. Seng tumaram marmulia ham bahenon ni Naibata Jahowa marhitei in.”
19 Dob ai manggila ma si Usia, anjaha ijolom ma batil pardahupaan ai ibagas tanganni laho manutung dahupa. Tapi sanggah manggila ope ia dompak malim ai, tubuh ma gadam i pardompakanni i lobei ni malim-malim ai ibagas Rumah ni Jahowa i lambung ni anjapanjap pardahupaan ai.
20 Dob ai marhusor ma Sintua ni malim Asarya ampa haganup malim ai mandompakkonsi, hape, tonggor ma, domma gadamon ia bani pardompakanni. Jadi tarolos ma sidea palahohonsi hunjai; ia pe tarolos ma laho hu darat, halani na dob nilonsing ni Naibata ia.
21 Jadi lanjar gadamon ma Raja Usia das hubani parmateini, gabe punjung ma ia marianan ibagas sada rumah halani na gadamon ai, ai ipabali do homa ia hun Rumah ni Jahowa. Jadi si Jotam, anakni ai ma haondosan ni rumah ni raja ai, pakon na manguhum ganup bangsa na i tanoh ai.
22 Barita na legan ai ope humbani si Usia, humbani mungkahni das hubani ujungni, Nabi Jesaya, anak ni si Amos do manuratkon.
23 Dob ai modom ma si Usia rap pakon ompungni, anjaha itanom sidea ma ia rap pakon ompungni i juma pananoman ni raja-raja, ai nini sidea do, “Na gadamon do ia.” Jadi si Jotam, anakni ai ma bangkit raja manggantihsi.
sabda_ylsa
Yayasan Lembaga SABDA
sabda_ylsa
Selengkapnya
SABDA Alkitab
Podcast SABDA
Slideshare SABDA