Loading audio...
Error: Maaf, audio tidak dapat diputar.
(It seems your browser does not support HTMLMediaElement.playbackRate, so you will not be able to change the speech rate.)
Catatan: Perhitungan audio timestamp (ketepatan waktu antara audio dan teks) berdasarkan perhitungan mesin / algoritma.
1 Saellana Amaziya seda, ra’yat Yehuda padha mele Uziya, pottrana, epagante jumenneng rato. E bakto jareya yuswana Uziya nem bellas taon. Ebuna iya areya Yekholya, babine’ dhari Yerusalim. Uziya marenta e Yerusalim saeket dhuwa’ taon abidda. Uziya jareya se arebbu’ kottha Elot, se pas laju epaddek pole.
2 (26:1)
3 (26:1)
4 Uziya jareya padha ban ramana, alampa’agi pa-apa se masenneng panggaliyanna PANGERAN.
5 Panasehat rohanina iya areya Zakhariya. Saabidda Zakhariya gi’ odhi’, Uziya esto abakte ka PANGERAN, daddi bi’ PANGERAN eberkadi.
6 Uziya aperrang ban oreng Filistin. Dhung-geddhungnga kottha Gat, Yabne ban Asdod epagujur, saellana jareya laju maddek tha-kottha se abinteng e seddi’na Asdod ban e dhaera laenna e Filistin.
7 Allah nolonge Uziya makala oreng Filistin, ban oreng Arab se badha e Gur-Ba’al sarta oreng Meunim.
8 Oreng Amon majar pesse opet ka Uziya. Kakobasa’anna sajan raja sampe’ asmana kasohor napa’ ka Messer.
9 Kaangguy makowat kottha Yerusalim, Uziya maddek manara e Labang Saketheng Paddu, ban e Labang Saketheng Cora ban e luk-biluganna geddhungnga kottha.
10 Laen dhari jareya Uziya maddek keya ra-manara se abinteng e dhaera se bannya’ talonna, ban ngale somor sabannya’na sabab ebinna ce’ bannya’na se badha e tana tenggi sarta e tana rendha e bagiyan bara’. Sarrena Uziya jareya terro mamajuwa partaneyan, daddi laju malako oreng sabannya’na epamokka’ bun-kebbun anggur e dhaera pagunongan, ban epagarap tana e ra-dhaera se landhu.
11 Uziya kaagungan tantara bannya’ se to-sabakto bisa epamangkat aperrang. Tantara jareya ebagi daddi kasatuwan-kasatuwan se bannya’na ecathet bi’ sekettarissa rato se kadhuwa, iya areya Yeiyel ban Ma’aseya, se epimpin Hananya, sala settong e antarana ponggabana rato.
12 Angkadan perrang jareya bannya’na badha tello ratos pettong ebu lema ratos parjurit se epimpin dhu ebu nem atos parwira. Tantara jareya kabbi padha ce’ penterra aperrang, nolonge rato makala mosona.
13 (26:12)
14 Tantara jareya bi’ Uziya epaneggu’i tameng, tombak, songko’ baja, kalambi besse, gandhiba ban pana, sarta tale se ekenneng peddel epangontallagi bato.
15 E Yerusalim para ahli sanjatana nyepta’agi pakakas se eangguy ngocol pana ban to-bato se raja dhari dhalem manara ban du-padduna geddhungnga kottha. Uziya kasohor e man-dhimman, ban kakobasa’anna talebat rajana, sabab etolong bi’ Allah.
16 Saellana kowat, Rato Uziya laju angga’, ban jareya se daddi lantaranna ancorra. Papakonna PANGERAN ta’ etoro’, sabab Uziya jareya maso’ ka Padalemman Socce ngobbara dupa e attassa mezba dupa.
17 Tape Imam Azarya ebanto ballung polo oreng imam laenna se wat-kowat ban bangalan,
18 ta’ narema lalakonna rato jareya. Ca’na mam-imam jareya, "Guste Se Molja! Junandalem ta’ kaagungan ha’ ngobbar dupa se eatorragi ka PANGERAN. Gapaneka lalakonnepon mam-imam toronanna Harun, sabab namong toronanna Harun se malolo epassrae lalakon gapaneka. Ngereng junandalem kasokana adinggallagi kennengngan se socce ka’dhinto! Junandalem ta’ atoro’ ka dhabuna PANGERAN, sarengngan ta’ kaparengan berkat pole."
19 E bakto jareya Uziya teppa’na ngadek e seddi’na mezba dupa e Padalemman Socce ngastane padupa’an. Salerana duka ka mam-imam jareya, ban o-tao laju kalowar panyaket kole’ se nako’e e dhaina.
20 Azarya ban mam-imam laenna ngoladi ka salerana, kabbi padha ce’ takerjadda; rato jareya laju epaksa kalowar dhari Padalemman Socce. Uziya duli kalowar sabab PANGERAN la apareng okoman ka salerana.
21 Sampe’ pasedana, panyakedda Rato Uziya jareya ta’ endha’ baras. Salerana esaba’ e settong bengko epajau dhari oreng laen, ban ta’ eedine maso’ ka Padalemman Socce pole. Salerana ebebassagi dhari lalakonna, sarta ebakkele pottrana, iya areya Yotam, se marenta ra’yat.
22 Careta laenna parkara pamarenta’anna Rato Uziya, la ecathet bi’ Nabbi Yesaya pottrana Amos.
23 Saellana seda, Uziya esareyagi e tana se badha e seddi’na pasareyanna to-rato, tape banne e makamma to-rato, sabab nyandhang panyaket kole’na se nako’e jareya. Yotam pottrana agante ramana jumenneng rato.
sabda_ylsa
Yayasan Lembaga SABDA
sabda_ylsa
Selengkapnya
SABDA Alkitab
Podcast SABDA
Slideshare SABDA