Loading audio...
Error: Maaf, audio tidak dapat diputar.
(It seems your browser does not support HTMLMediaElement.playbackRate, so you will not be able to change the speech rate.)
Catatan: Perhitungan audio timestamp (ketepatan waktu antara audio dan teks) berdasarkan perhitungan mesin / algoritma.
1 Matenamo Amazia, nipilemi ana’ bura’nena niarenga Uzia ri sikontu ra’ya’ Yehuda, a’jari karaeng. Anjo wattua umuru’na 16 taung. Amma’na niarengi Yekholya, baine battu ri Yerusalem. Niaki 52 taung sallona ammarenta Uzia ri Yerusalem. Naallei siagang nabangungi ammotere’ kota Elot.
2 (26:1)
3 (26:1)
4 Sangkamma todong manggena, nagaukang tongi Uzia apa Nangaia Batara.
5 Zakharia a’jari gurunna ri passala’ katappakkanna mae ri Batara. Lalang attallasa’na ija Zakharia, majarreki tappa’na Uzia siagang anynyombai ri Batara sa’genna nibarakkaki ri Batara.
6 A’bunduki Uzia sipa’bali tu Filistin. Naruntungi tembo’-tembo’na kota Gat, Yabne, siagang Asdod, nampa ambangung kota-kota niaka pattahanganna ri ampi’na Asdod siagang ri daera maraengannaya ri Filistin.
7 Nitulungi ri Allata’ala nanabeta tu Filistin, tu Arab niaka ammantang ri Gur-Baal siagang tu Meunim.
8 Assarei doe’ pa’bayara’ tu Amon mae ri Uzia. Pila’ makoasami sa’genna masahoro’ arenna sa’genna mange ri Mesir.
9 Ambangungi Uzia menara ri Pakke’bu’ Lompo Panyingkulu’, ri Pakke’bu’ Lompo Ka’bung Lappara’, siagang pa’bilukang tembo’, untu’ ampakajarreki kota Yerusalem.
10 Kammayatompa ambangungi menara-menara niaka pattahanganna ri daera paranga, siagang angngekei jai bungung, baji’ ri tampa’ tinggia kammayatompa ri tampa’ rawaya ri bageang ilau’. Lanri naparhatikanna jama-jamang pamarria, jaimi tau napajama untu’ appare’ koko-koko anggoro’ ri daera monconga, siagang najama buttaya ri daera-daera copponga.
11 Nia’ tantarana Uzia sannaka jaina siagang tuli sadiaya a’bundu’. Anjo ke’nanga nibagei lalang pasukang-pasukang nicataka siapa jaina ri jurutulisi’na karaenga, iamintu Yeiel siagang Maaseya, nipimpinga ri Hananya, kalase’renna pagawe kantoro’na karaenga.
12 Kabusu’na anjo tantaraya iamintu 307.500 tantara nipimping ri 2.600 perwira. Kabusu’na ke’nanga kassa’ ngasengi untu’ a’bundu’ siagang untu’ ambantui karaenga ambetai musua.
13 (26:12)
14 Napassangkaki Uzia anjo tantarana siagang pannangkisi’, poke, topi baja, baju bassi, anrong pana siagang pana, kammayatompa batu patte’.
15 Sikamma tucara’de’na appare’ sanjata ri Yerusalem le’baki appare’ sanjata akkullea nipake ammana siagang ammatte’ battu lalang ri menaraya siagang panyingkulu’-panyingkulu’na kotaya. Masahoroki arenna kemae-kemae, siagang sanna’mo lompona koasana lanri nitulungi ri Allata’ala.
16 Ri wattunna kassa’mo Uzia, a’jari tampomi, siagang iami anjo a’jari saba’ naancuru’. Nadakkai parentaNa Karaeng Allata’alana lanri antamaki ri Balla’Na Batara untu’ attunu dupa irate ri tampa’ pakkoro’bangngang dupaya.
17 Mingka nipinawangi ri Imang Asarya siagang 80 imang maraeng kassaka siagang barania ngaseng
18 untu’ ampisangkai appanggaukang kamma. Nakana ke’nanga, "Karaeng mala’biri’! Tena nakisiratang attunu dupa untu’ Batara. Anjo kammaya tugasa’na imang-imang jari-jarina Harun, lanri iami ke’nanga le’ba’ nitangkasi untu’ jama-jamang kammaya anjo. Kibokoi laloi anne tampa’ matangkasaka! Angngewa maki’ antu ri Karaeng Allata’ala, siagang tenamo nakianggappa barakka’Na."
19 Anjo wattua sitabangi Uzia ammenteng ri ampi’na tampa’ pakkoro’bangngang dupaya ri Balla’Na Batara, anna’gala’ pattunuang dupa. Larroi mae ri anjo imang-imanga, siagang ti’ring nia’mo garring kodi ammumba ri abanna.
20 Sanna’mi ta’bangkana Azarya siagang imang-imang maraenga anciniki anjo kammaya, nampa pila’ nasuromo Uzia sollanna nabokoi Balla’Na Batara. Akkaro-karomi Uzia assulu’ lanri nihukkummi ri Batara.
21 Sa’genna mate Uzia tena le’bakai ammolle anjo garrinna. Nisa’la’mi pammantanganna ri se’reang balla’ siagang tenamo nipa’biangi antama ri Balla’Na Batara. Tenamo nipassareangi anggaukangi tugasa’na, siagang ana’na mami niarenga Yotam ammarenta ri ra’yaka sa’laku wakkele’na.
22 Pau-pau maraengannaya ri passala’ pamarentahanna Karaeng Uzia, le’baki nicata’ ri Na’bi Yesaya ana’na Amos.
23 Ri wattuna mate, nitarawangi Usia ri ampi’na pa’jerakkanna sikamma karaenga, mingka tena nanjoreng kalenna, lanri natabana garring kodi. Nampa ana’ bura’nena niarenga Yotam ansambeangi a’jari karaeng.
sabda_ylsa
Yayasan Lembaga SABDA
sabda_ylsa
Selengkapnya
SABDA Alkitab
Podcast SABDA
Slideshare SABDA