Loading audio...
Error: Maaf, audio tidak dapat diputar.
(It seems your browser does not support HTMLMediaElement.playbackRate, so you will not be able to change the speech rate.)
Catatan: Perhitungan audio timestamp (ketepatan waktu antara audio dan teks) berdasarkan perhitungan mesin / algoritma.
1 Dob ai modom ma si Abia rap pakon ompungni, anjaha itanom ma ia i huta ni si Daud; jadi si Asa, anakni ai ma bangkit raja gantihni.
2 Ihorjahon si Asa do na dear jaha na hinarosuhkon ni Jahowa, Naibatani ai.
3 Ipadaoh do anjapanjap panggalangan bani naibata na legan pakon panumbahan na bani buntu-buntu, ibolahi do gana-gana anjaha irobohi do tiang sisombahon.
4 Iparentahkon ma halak Juda mangindahi Jahowa, Naibata ni ompung ni sidea, anjaha mangkorjahon titah-Ni pakon tonah-Ni.
5 Ipadaoh do homa humbani ganup huta ni Juda sagala panumbahan na bani buntu-buntu pakon tiang sisombahon. Jadi sonang ma harajaon ai ibagas panrajaionni.
6 Ipauli do huta na marbatar-batar i Juda, halani sonang do tanoh ai, anjaha seng masa hamunsuhon dompaksi bani tahun-tahun ai, ai itumpak Jahowa do ia marsonang-sonang.
7 Ai nini raja ai do dompak halak Juda, “Pauli hita ma huta on anjaha patoguh hita tembokni inggot anjaha marmanara, marhorbangan pakon marpating-pating, ai hita ope simada tanoh on. Halani ipindahi hita do Jahowa, Naibatanta, gabe ipindahi do hita, gabe ibere do banta damei inggot.” Jadi ipungkah sidea ma, anjaha manjadi do.
8 Adong do bani si Asa bala tolu ratus ribu halak humbani Juda, na margantar-gantar ampa na martanja, pakon dua ratus ualuh puluh ribu halak humbani Benjamin, na margantar-gantar pakon siparpanah; ganupan ai halak siparmunsuh na borani do.
9 Dob ai bingkat ma mandorab sidea si Sera, halak Etiopia ai, rap pakon balani sajuta halak pakon tolu ratus gareta porang, pala das ia hu Maresa.
10 Jadi bingkat ma si Asa manjumpahkonsi, anjaha ipaodor ma balani i pamah Sepata dohorhon Maresa.
11 Dob ai dilo-dilo ma si Asa hubani Jahowa, Naibatani, nini ma, “Ham Jahowa, seng dong sobali Ham, na boi mangurupi halak na so margogoh marimbang halak na gogoh. Sai urupi Ham ma hanami, Ham Jahowa, Naibatanami; ai marpangunsandeian Bamu do hanami, anjaha mangunsagahkon goran-Mu do hanami bingkat mangimbang halak na mabuei on. Ham Jahowa, Ham do Naibatanami, ise pe lang jolma na margogoh mangimbang Ham.”
12 Dob ai italuhon Jahowa ma halak Etiopia ai i lobei ni si Asa pakon Juda, gabe maporus ma halak Etiopia ai.
13 Ipardakdak si Asa pakon bangsa hasomanni ai ma sidea das hu Gerar, anjaha sonai ma bueini halak Etiopia radag, gabe sada pe lang dong tading manggoluh; ai marosak do sidea i lobei ni Jahowa pakon i lobei ni balani ai. Buei tumang do taban-taban jumpah halak Juda.
14 Italuhon sidea do homa ganup huta inggot ni Gerar, ai sogop do biar humbani Jahowa bani sidea. Irampas sidea do ganup huta; buei tumang do taban-taban ijai.
15 Sonai homa lampolampo ni siparpinahan iparreong sidea do, gabe ibuat sidea ma buei tumang biribiri pakon unta; dob ai mulak ma sidea hu Jerusalem.
sabda_ylsa
Yayasan Lembaga SABDA
sabda_ylsa
Selengkapnya
SABDA Alkitab
Podcast SABDA
Slideshare SABDA