Loading audio...
Error: Maaf, audio tidak dapat diputar.
(It seems your browser does not support HTMLMediaElement.playbackRate, so you will not be able to change the speech rate.)
Catatan: Perhitungan audio timestamp (ketepatan waktu antara audio dan teks) berdasarkan perhitungan mesin / algoritma.
1 Matenamo Karaeng Abia siagang le’ba’namo nitarawang ri pa’jerakkanna sikamma karaenga ri Kota Daud, nisambeammi ri ana’ bura’nena niarenga Asa. Lalang ammarentana Asa, amangi pa’rasangang Yehuda sampulo taung.
2 Sannangi nyawaNa Karaeng Allata’ala ri Asa, lanri nagaukanna Asa kaadelanga siagang kabajikanga.
3 Napakabellai tampa’-tampa’ pakkoro’bangnganna bansa maraenga siagang tampa’-tampa’ panynyombanga mae ri barhalaya. Tembo’-tembo’ patung rewataya naancuruki, siagang benteng-bentenna patung Dewi Asyera narumbangi.
4 Nasuroi ra’ya’ Yehuda attallasa’ situru’ ero’Na Batara, Allata’alana boe-boena ke’nanga, kammayatompa naturuki ajarang-ajaranNa siagang parenta-parentaNa.
5 Sikontu tampa’ panynyombanga mae ri barhalaya siagang tampa’ pattunuang dupaya napakabella kabusuki battu ri kota-kotana Yehuda. Na’jari sannammo anjo kakaraenganga irawangang pamarentahanna,
6 sa’genna akkulle ambangung kota-kota niaka pattahanganna ri Yehuda. Pirangtaung arei tena kajariang pa’bundukang lanri nisarena kasannangngang ri Batara.
7 Nakanamo Asa ri ra’ya’ Yehuda, "Bajiki punna nipakajarre’ kota-kotaya nanibangungi tembo’ ri tammulilina, nipaentengi menara-menara siagang nipapparekangi pakke’bu’-pakke’bu’ lompo niaka balo’-balo’ panjolina. Nikoasaimi anne pa’rasanganga lanri niturukimi ero’Na Karaeng Allata’alata. Ia amparakaiki’ siagang anjagaiki’ nakiamang ri sikontu pa’rasanganta." Jari appakkaramulami ke’nanga ambangung nampa napa’jari anjo bangunanga siagang baji’.
8 Tantarana Karaeng Asa iamintu nia’ 300.000 tu Yehuda ammakea poke siagang pannangkisi’, siagang 280.000 tu Benyamin ammakea sanjata pana, anrong pana siagang pannangkisi’. Kabusu’na ke’nanga sangnging tantara barani siagang le’ba’ nilati.
9 Ri se’reang wattu nia’ se’re tau battu ri Sudan niareng Zerah battu ambunduki tu Yehuda. Angngerangi pasukang 1.000.000 tantara siagang 300 kareta bundu’. Majui ke’nanga sa’genna narapi’ Maresa bellana.
10 Jari assulu’mi Asa andallekangi Zerah, siagang para naatoro’mi massing barisanna ri Lappara’ Zefata ri ampi’na Maresa.
11 Nampa appala’ doang Asa ri Karaeng Allata’alana, nakana, "O Batara, iKatteji bawang akkulle ambantui tau lammaya andallekangi tau kassaka. Kitulung laloi ikambe kamma-kamma anne, o Karaeng Allata’alana ikambe! Ri Katteji bawang tanjeng ikambe, siagang lanri arenTa bawang nassulu’ anne ikambe untu’ angngewai anne pasukang sannaka lompona. O Batara, iKatteji bawang Allata’alana ikambe. TeaKi’ pa’biangngi KalenTa nibeta ri se’reang rupatau."
12 Nampa majumo Asa siagang tantara Yehuda ambunduki tantara Sudan. Nabetami Batara anjo tantara Sudan sa’genna lari kabusu’mo ke’nanga.
13 Majumi Asa siagang tantarana angngondangi ke’nanga sa’genna mange ri Gerar bellana. Jai sikali tantarana tu Sudan mate sa’genna tenamo kagassinganna ke’nanga lanri niancuruki ri Batara, kammayatompa jai sikalimi barang-baranna ke’nanga nirampasa’ ri tantara Yehuda. Nampa naancuru’ tantara Yehuda kota-kota niaka ri ampi’na daera Gerar, lanri nipa’jari malla’na pandudu’na ri Batara. Narampasaki tantara Yehuda sikontu anjo kotaya siagang sanna’ jaina barang-barang nagappa ke’nanga.
14 (14:13)
15 Nabunduki tongi ke’nanga pakkemaanna sikamma pakalawakia, siagang jai gimbala’ siagang unta nalaling ke’nanga. Le’baki anjo ammotere’mi ke’nanga mange ri Yerusalem.
sabda_ylsa
Yayasan Lembaga SABDA
sabda_ylsa
Selengkapnya
SABDA Alkitab
Podcast SABDA
Slideshare SABDA