Loading audio...
Error: Maaf, audio tidak dapat diputar.
(It seems your browser does not support HTMLMediaElement.playbackRate, so you will not be able to change the speech rate.)
Catatan: Perhitungan audio timestamp (ketepatan waktu antara audio dan teks) berdasarkan perhitungan mesin / algoritma.
1 Mate Raja Abiya emaka ikuburken i bas kuburen raja-raja i Kota Daud. Anakna Asa nggantiken ia jadi raja. Janah i bas pemerentahen Asa, lit sepuluh tahun dekahna dame negeri e.
2 Ilakoken Asa kai si bujur dingen mehuli, emaka ngena ate TUHAN Dibatana man bana.
3 Iaguina batar-batar bangsa si deban ras ingan-ingan ersembah kalak perbegu, ibulakkenna tugu batu si isembah kalak perbegu, janah itabanna gana-gana Dewi Asera.
4 Iperentahkenna rayat Juda ngelakoken si ngena ate TUHAN, Dibata nini-ninina, dingen ngikutken pengajaren ras perentah-perentah TUHAN.
5 Erkiteken imasapkenna i bas kerina kota-kota Juda ingan-ingan ersembah dingen batar-batar ingan kalak perbegu nutung kumenen, emaka kerajan e dame i teruh pemerentahenna.
6 I bas paksa e ibahanna benteng kota-kota Juda. La lit perang piga-piga tahun dekahna erkiteken ibereken TUHAN man bana kedamen.
7 Nina man kalak Juda, "Marilah sibahan benteng kota enda alu erbahan dingding beton ras menara, dingen erbahan pintu gerbang si banci ipintu ras ieruk. Negeri enda banci sikuasai sabap nggo silakoken kai si ngena ate TUHAN Dibatanta. IkawaliNa kita dingen IberekenNa man banta keamanen i belang-belang negeri." Emaka ipantekina benteng-benteng e, seh dung ibahanna.
8 Tentera Raja Asa lit 300.000 kalak i Juda nari, ipersenjatai alu ampang-ampang ras lembing dingen 280.000 kalak i Benyamin nari, ipersenjatai alu ampang-ampang ras panah. Kerina tentera e kalak si mbisa dingen cukup latihenna.
9 Sekalak bangsa Sudan gelarna Sera, iperangna Juda alu sada juta kalak tentera dingen 300 gereta perang jenari maju ia seh i Maresa.
10 Ndarat Asa ngelawan Sera emaka duana ia muat ingan petala-tala i Baluren Sepatah deher Maresa.
11 Ertoto Asa man TUHAN Dibata nina, "O TUHAN, banci kap IsampatiNdu subuk tentera si la megegeh ntah pe tentera si megegeh. Sampatilah kami genduari O TUHAN Dibata kami, sabap Kam kap penalemen kami, dingen i bas GelarNdu kami ndarat erperang ngelawan tentera si nterem enda. O TUHAN, Kam kap Dibata kami; la lit kalak si ngasup naluken Kam."
12 Italuken TUHAN tentera Sudan e asum ia iserang Asa ras tentera Juda e. Lompat kalak Sudan e,
13 emaka ielis Asa ras pasukenna seh ku Gerar. Nterem kal tentera Sudan e mate ibunuh, emaka lanai ia banci ngelawan, erkiteken ia ikernepken TUHAN ras tentera Juda. Emaka melala kal ibuat tentera Juda barang rampasen.
14 Kenca bage bangsa Juda ngkernepken kota-kota i sekelewet daerah Gerar, sabap penduduk si i je nggirgir kerina i adep-adepen TUHAN. Irampasi tentera Juda kerina kota-kota e jenari ibuatna melala barang-barang rampasen.
15 Iperang tentera Juda pe piga-piga perkemahen kalak permakan. Ibuatna melala biri-biri ras unta. Kenca bage mulih ia ku Jerusalem.
sabda_ylsa
Yayasan Lembaga SABDA
sabda_ylsa
Selengkapnya
SABDA Alkitab
Podcast SABDA
Slideshare SABDA