Loading audio...
Error: Maaf, audio tidak dapat diputar.
(It seems your browser does not support HTMLMediaElement.playbackRate, so you will not be able to change the speech rate.)
Catatan: Perhitungan audio timestamp (ketepatan waktu antara audio dan teks) berdasarkan perhitungan mesin / algoritma.
1 Dob ai laho ma si Rehabeam hu Sikem, ai domma roh ganup halak Israel hu Sikem sihol manrajahonsi.
2 Jadi dob ibogei si Jerobeam, anak ni si Nebat barita ai, (ai i Masir do ia, hujai do ia maporus halani Raja Salomo), gabe mulak ma ia hun Masir;
3 ai domma isuruh sidea hinan suruhanni mandilosi. Dob ai roh ma si Jerobeam rap pakon ganup Israel, marsahap ma sidea rap pakon si Rehabeam, nini ma,
4 “Borat do pasangannami ibahen bapanta. Ai pe pahampung ham ma rodi na borat, na binahen ni bapanta ai pakon pasangan na borat, na tinampeihonni ai bennami, ase ra hanami unduk bamu.”
5 Tapi nini ma dompak sidea, “Roh ma nasiam hu bangku tolu ari nari.” Jadi laho ma bangsa ai.
6 Dob ai manriah raja Rehabeam rap pakon partua-partua, hasoman ni si Salomo, bapani ai, sapanriahan, sanggah bani goluhni, nini ma, “Naha do podah nasiam bangku, laho mambalosi bangsa on?”
7 Jadi nini sidea ma hu bani, “Anggo basar ham bani bangsa on anjaha ihatahon ham hata na lamlam bani sidea, jadi pambalosi ma sidea bamu sadokah ham manggoluh.”
8 Tapi seng itangihon podah, na pinodahkon ni partua-partua ai bani, jadi laho ma ia manriah rap pakon halak siposonan, hasomanni magodang, na marugas i lobeini.
9 Dob ai nini ma dompak sidea, “Aha do podah nasiam, bahen balosta hubani bangsa on, na mangkatahon bangku, ʻPahampung ham ma pasangan, na tinampeihon ni bapanta bannami?ʼ”
10 Jadi nini halak siposonan, hasomanni magodang ai ma bani, “Sonon ma hatahon ham hubani bangsa on, na mangkatahon bamu: Borat do pasangan, na binahen ni bapanta bannami, pahampung ham ma ai hubannami, ʻBanggalan do didihilhu ase haehae ni bapa.
11 Borat pe pasangan na tinampeihon ni bapa bani nasiam, lambin boratni ope ai bahenonku; ia bapa lonsing-lonsing do ibahen maminsang nasiam, tapi anggo ahu gansip golang do bahenonku maminsang nasiam.ʼ”
12 Jadi patolu-arihon roh ma si Jerobeam rap pakon ganup bangsa ai marayak si Rehabeam, songon na hinatahon ni raja ai hinan, “Roh ma nasiam use hu bangku patolu-arihon.”
13 Jadi koras ma balos ni raja ai bani sidea; seng ibalosi raja ai podah ni partua-partua ai,
14 tapi ihatahon ma bani sidea romban hubani podah ni halak siposonan ai, “Borat pe pasangan na tinampeihon ni bapa bani nasiam, tapi lambin boratni ope ai bahenonku; ia bapa lonsing-lonsing do ibahen maminsang nasiam, tapi anggo ahu gansip golang do bahenonku maminsang nasiam.”
15 Ase seng ibalosi raja ai pangindoan ni bangsa ai; ai sonai do panaktakkon ni Naibata, ase ipasaud Jahowa hata-Ni, na dob hinatahon-Ni marhitei si Ahia, na hun Silo, hubani si Jerobeam, anak ni si Nebat.
16 Jadi dob iidah ganup Israel, na so binalosan ni raja ai pangindoan ni sidea, nini bangsa ai ma mambalosi raja ai, “Aha ma rupeita bani si Daud? Seng dong siteanonta humbani anak ni si Isai. Laita, alo Israel, ganup mulak hu lampolamponi bei! On pe, rumahmu sandiri ma paingat-ingat, alo Daud!” Dob ai mulak ma ganup Israel, hu lampolamponi bei.
17 Tapi halak Israel, na marianan i huta Juda, si Rehabeam do manrajai sidea.
18 Sanggah isuruh si Rehabeam si Adoram, kopala ni sipatumpu guguan, ipargijig halak Israel ma ia matei bani batu; tarolos ma Raja Rehabeam naik hubagas garetani, laho maporus hu Jerusalem.
19 Sonai ma parbalik ni Israel humbani ginompar ni si Daud ronsi sadari on.
sabda_ylsa
Yayasan Lembaga SABDA
sabda_ylsa
Selengkapnya
SABDA Alkitab
Podcast SABDA
Slideshare SABDA