Loading audio...
Error: Maaf, audio tidak dapat diputar.
(It seems your browser does not support HTMLMediaElement.playbackRate, so you will not be able to change the speech rate.)
Catatan: Perhitungan audio timestamp (ketepatan waktu antara audio dan teks) berdasarkan perhitungan mesin / algoritma.
1 Lawes Rehabeam ku Sikem. I je nggo pulung kerina kalak Israel si arah Utara guna nangkuhken ia jadi raja.
2 Tupung Jerobeam anak Nebat, lompat ku Mesir nelamatken bana i bas Salomo nari, megi kerna si enda, mulihken ia ku Israel.
3 Itenahken suku Israel si arah Utara, jenari ras ia kerina ndahi Rehabeam nina,
4 "Bapandu nggo ngampeken baban si mberat man kami. Adi ipenahangindu baban e dingen ibahanndu kami nggeluh tersenangen, kami jadi suruh-suruhenndu."
5 Nina Rehabeam njabapsa, "Bereken man bangku telu wari mpertimbangken pemindonndu e. Kenca bage reh kam mulihi." Emaka lawes rayat e.
6 Isungkuni Raja Rehabeam kalak si nggo metua eme penasehat bapana Salomo nai. Nina nungkun, "Kai nasehatndu man bangku si man katankenku man rayat e?"
7 Nina tua-tua e njabapsa, "Adi kam mehuli man rayat e dingen icubakenndu erbahan meriah iakapna alu mereken jabapen ate si mekuah, ia tetap jadi suruh-suruhenndu si setia."
8 Tapi ipersilahangna nasehat kalak si nggo metua e. Lawes ia man kalak si nguda si sebekbek ras ia si genduari nggo jadi penasehatna.
9 "Kai nasehatndu man bangku?" nina nungkunsa. "Uga ningku njabap rayat e? Pemindonna eme gelah ipenahangi babanna."
10 Nina penasehatna e njabapsa, "Bagenda nindu man bana, 'Anak jaringku belinen asangken awak bapangku.'
11 Kataken man bana bagenda, 'Itamaken bapangku baban si mberat, terberaten denga ka asang si e kutamaken man bandu. Iligasna kam salu purih, kuligas kam salu cambuk kuda!'"
12 Kenca nggo telu wari, Jerobeam ras kerina rayat e ndahi Raja Rehabeam mulihi sue ras si nggo iperentahkenna man bana kerina.
13 Ipersilahang raja e nasehat kalak si nggo metua ndai, emaka kasar pengeranana man rayat e,
14 sue ras nasehat kalak si nguda denga. Nina Rehabeam, "Nggo itamaken bapangku baban si mberat i babondu tapi kubahan maka babanndu e beraten denga ka asa si e. Iligasna kam salu purih, aku kuligas kam salu cambuk kuda!"
15 Kai si ibahan raja e, sue ras sura-sura TUHAN Dibata guna nggenepi KataNa si nggo IbelaskenNa kerna Jerobeam anak Nebat erkelang-kelangken nabi Ahiya i Silo nari. Eme sabapna maka la diate raja pe man rayat e.
16 Kenca ieteh jelma si nterem maka ia la ibegiken raja, isurakina raja nina, "Labo man kade kami Daud ras keluargana. Kai kin si nggo pernah ibahanna man banta? O kalak Israel, ota kita mulih! Pelepas Rehabeam pekena bana!" Dage berontak bangsa Israel.
17 Alu bage kalak si ringan i daerah Juda nari ngenca Rehabeam iakui jadi raja.
18 Kenca bage isuruh Raja Rehabeam si Adoniram kepala kerja paksa lawes njumpai kalak Israel, tapi ibenterina alu batu seh mate. Nangkih Rehabeam ku das gereta kudana jenari lompat ia ku Jerusalem.
19 Mulai paksa e kalak Israel si arah Utara tetap berontak ngelawan kesusuren Daud.
sabda_ylsa
Yayasan Lembaga SABDA
sabda_ylsa
Selengkapnya
SABDA Alkitab
Podcast SABDA
Slideshare SABDA