Loading audio...
Error: Maaf, audio tidak dapat diputar.
(It seems your browser does not support HTMLMediaElement.playbackRate, so you will not be able to change the speech rate.)
Catatan: Perhitungan audio timestamp (ketepatan waktu antara audio dan teks) berdasarkan perhitungan mesin / algoritma.
1 Salomo ana’ bura’nena Karaeng Daud a’jarimi karaeng kassa’ empoanna lalang ri kakaraengang Israel. Nibarakkaki ri Karaeng Allata’alana, siagang nipa’jari sannaki lompona kakoasanna.
2 Sikontu komandang pasukang 1.000 siagang komandang pasukang 100, sikontu tau anna’galaka pamarentahang, kammayatompa sikontu kapala kaluargana tu Israel niparentakangi ri Karaeng Salomo
3 untu’ a’lampa siagang ia mange ri tampa’ panynyombanga ri Gibeon, lanri anjoremmi ammantang KemaNa Batara nipareka ri Musa atanNa Batara ri wattunna nia’ ri parang lompoa.
4 (Mingka Patti ParjanjianNa Batara niaki riYerusalem, lalang ri kema nabangunga Daud untu’ anjo Pattia ri wattunna napalette’ battu ri Kiryat-Yearim.)
5 Tampa’ pakkoro’bangngang tambaga napareka Bezaleel ana’na Uri, cucunna Hur, nia’ tongi ri Gibeon, ri dallekanna KemaNa Batara. Karaeng Salomo siagang sikontu ra’yaka anynyombami ri Batara anjoreng.
6 Ri dallekanna anjo Kemaya assaremi karaenga, iamintu irate ri tampa’ pakkorobangngang tambagaya, 1.000 kayunna olo’-olo’ salaku koro’bang nitunu untu’ Batara.
7 Anjo bangngia Napappicinikangi KalenNa Allata’ala mae ri Salomo nampa nakana, "Salomo, pala’mi apa nukaerokia nampa Kusareangko!"
8 Appialimi Salomo angkana, "O Allata’ala, le’ba’mi Kipa’nyata angkanaya sanna’ Kikamaseanna manggeku Daud, siagang le’ba’ma’ Kiangka’ a’jari karaeng untu’ ansambeangi.
9 Kamma-kamma anne, o Karaeng Allata’ala, poro Kirupai laloi janjinTa mae ri manggeku. Le’ba’ma’ Kiangka’ a’jari karaeng mae ri anne bansa lompoa, tenaya nakkulle nirekeng siapa jaina.
10 Lanri kammana anjo, poro Kisare laloa’ kacara’dekang baji’ siagang pangngassengang kuparalluanga untu’ ampimpingi ke’nanga. Punna tena nakamma, antemi kamma bateku lakulle amparentai anne ummatTa lompo kammaya?"
11 Appialimi Allata’ala ri Salomo angkana, "Anjo pappala’nu bajiki. Teai kakalumanynyangngang yareka pa’barang-barangngang yareka areng baji’ yareka kamateanna musunnu yareka umuru’ la’bu untu’ kalennu nupala’, passangalinna kacara’dekang baji’ siagang pangngassengang untu’ ammarenta ri ummakKu Kupappirannuanga mae ri kau.
12 Lanri kammana anjo laKusareko kacara’dekang baji’ siagang pangngassengang. Pantaranganna anjo laKupa’jari coppongi katallassannu, la’bi kalumanynyang siagang la’bi masahoro’ na karaeng maraengannaya, baji’ karaeng allaloa kammayatompa karaeng labattua."
13 Nampa nabokoi Salomo anjo tampa’ panynyombanga ri Gibeon napammantangia KemaNa Batara, nampa ammotere’ mange ri Yerusalem. Battu anjoremmi napajappa pamarentahanna mae ri tu Israel.
14 Napassangkaki tantarana siagang 1.400 kareta bundu’ siagang 12.000 jarang pa’bundukang. Nia’ sipa’gang naboli’ ri Yerusalem, na pantarangannaya ri kota-kota maraengannaya.
15 Ri wattu pamarentahanna Salomo, anjo bulaenga siagang peraka sanrapanji barang biasa ri Yerusalem, sangkamma batu; siagang kayu camaraya ri Libanon teai sipato’ jaina sangkamma kayu ara biasaya.
16 Tete ri padanggang-padanggang ambantuai karaenga, nierangi jaranga battu ri Mesir siagang Kewe,
17 kammayatompa kareta-kareta bunduka nipabattui battu ri Mesir, nampa nikiring pole assulu’ mange ri karaeng Het siagang karaeng-karaeng Siria; ballinna punna nibalukangi anjo jaranga 150 doe’ pera’ sikayu, nampa kareta bunduka 600 doe’ pera’ tasse’re.
sabda_ylsa
Yayasan Lembaga SABDA
sabda_ylsa
Selengkapnya
SABDA Alkitab
Podcast SABDA
Slideshare SABDA