Loading audio...
Error: Maaf, audio tidak dapat diputar.
(It seems your browser does not support HTMLMediaElement.playbackRate, so you will not be able to change the speech rate.)
Catatan: Perhitungan audio timestamp (ketepatan waktu antara audio dan teks) berdasarkan perhitungan mesin / algoritma.
1 Salomo anak Daud nggo paguh kuasana i bas kerajan Israel dingen TUHAN Dibatana masu-masu ia. IbahanNa maka tuhu-tuhu mbelin kal kuasana Salomo.
2 Iperentahken Raja Salomo kerina kepala pegawai pasuken seribu ras seratus, kerina pegawai pemerentah, kerina kepala keluarga (dingen kerina rayat)
3 gelah lawes radu ku ingan pertoton i Gibeon. Lawes ia kerina ku jah sabap i jah kap ingan Kemah Perjumpan ras TUHAN. Musa, suruh-suruhen TUHAN, nai erbahan Kemah e i bas taneh si mesawang.
4 (Tapi Peti Perpadanen nggo isimpan i Jerusalem i bas kemah si nggo ipajekken Daud sanga Peti Perpadanen e ibaba i Kiryat Jearim nari.)
5 Batar-batar tembaga si ibahan Besalel anak Uri kempu Hur pe i Gibeon nge. Inganna i lebe-lebe Kemah Perjumpan ras TUHAN. Raja Salomo ras kerina bangsa e ersembah man TUHAN i jah.
6 I lebe-lebe Kemah e ersembah raja man TUHAN alu mpersembahken persembahen i babo batar-batar tembaga e. Igelehna seribu asuh-asuhen jenari itutungna kerina i babo batar-batar e.
7 I bas berngi e icidahken Dibata BaNa man Salomo nina, "Kai atendu Kubereken man bandu?"
8 Nina Salomo, "Gelgel nari tetap IcidahkenNdu keleng AteNdu man bapangku Daud, janah genduari nggo IbereNdu aku nggantiken ia jadi raja.
9 O TUHAN Dibata, sehken dage padan si nggo IbahanNdu man bapangku. Nggo IbahanNdu aku jadi raja nandangi bangsa si teremna bali ras abu taneh.
10 Emaka bereken man bangku kepentaren ras pemeteh si kuperluken guna ngerajai ia kerina. Adi la bage kutera aku ngasup ngerajai BangsaNdu si mbelin enda?"
11 Nina Dibata man Salomo, "Nggo payo pilihenndu e. La ipindondu erta ntah kebayaken, kemulian ntah kematen musuh-musuhndu, bage pe labo ipindondu maka kam cawir metua, tapi si ipindondu eme kepentaren ras pemeteh gelah alu bage ngasup kam ngerajai bangsangKu, i ja kam nggo Kubahan jadi raja.
12 Emaka genduari Kubereken man bandu kepentaren ras pemeteh. Janah tambahenna, Kubereken man bandu tole erta ras kebayaken dingen kemulian lebih asangken kerina raja si nggo leben ntah pudin asa kam jadi raja."
13 Emaka berkat Salomo i Gibeon nari, ingan Kemah Perjumpan ras TUHAN, jenari mulih ia ku Jerusalem. I je ia jadi raja Israel.
14 Itambahina gegeh tenterana alu pepulung 1.400 gereta kuda dingen 12.000 tentera si erkuda. Deba itamana i Jerusalem dingen si tadingna itamakenna i kota-kota si deban.
15 I bas paksa pemerentahenna, pirak ras emas bali buena ras batu i Jerusalem janah kayu aras bali ras batang ara.
16 Suruh-suruhen raja ngkuasai perbinagan kuda si rehna i Musri ras Kilikia nari,
17 dingen gereta kuda si rehna i Mesir nari. Kuda ras gereta kuda si iperluken raja Heti ras Siria, Raja Salomo ngelitkenca. Man raja-raja e sada gereta kuda idayakenna alu erga 600 duit pirak, dingen kuda alu erga 150 duit pirak.
sabda_ylsa
Yayasan Lembaga SABDA
sabda_ylsa
Selengkapnya
SABDA Alkitab
Podcast SABDA
Slideshare SABDA