Loading audio...
Error: Maaf, audio tidak dapat diputar.
(It seems your browser does not support HTMLMediaElement.playbackRate, so you will not be able to change the speech rate.)
Catatan: Perhitungan audio timestamp (ketepatan waktu antara audio dan teks) berdasarkan perhitungan mesin / algoritma.
1 Siapa are sallona ribokoanganna Karaeng Daud nabundukimi pole tu Filistin. Nabetami ke’nanga siagang naallemi buttana ke’nanga.
2 Nabeta tommi Daud tu Moab. Nasuroi ke’nanga attinro ri buttaya, nampa nabuno ta’rua lalang tattallua tau. Jari, tundu’mi tu Moab mae ri Daud siagang a’bayara’mi passare ke’nanga mae ri ia.
3 Nampa nabeta Daud Karaeng Hadadezer ana’na Rehobot ammarentaya ri Zoba, iamintu se’re kakaraengang ri ampi’na kota Damsyik. Anjo wattua sitabangi lalang jappana Hadadezer ero’ ampakajarreki ammotere’ kakoasanna mae ri daera niaka ri ampi’na ulunna Binanga Efrat.
4 Natahangi Daud nia’ 1.700 tau tantara a’jarang siagang 20.000 tau tantara a’jappa bangkeng. Napesoki kabusu’mi sikontu jaranga, pantaranganna siapa are jaina, anggannaka untu’ sibilangngang kareta pa’bundukang.
5 Tu Siria battua ri Damsyik akkiringi tantara untu’ ambantui Karaeng Hadadezer. Mingka nabetai Daud ke’nanga siagang nabunoi nia’ 22.000 jaina tau battu ri ke’nanga.
6 Nampa ambangung Daud pakkemaang-pakkemaang tantara lalang ri daerana ke’nanga, siagang tundu’mi ke’nanga kammayatompa a’bayara’ passare mae ri ia. Nisarei Daud ri Batara pammetang manna pole kemae napa’bunduki.
7 Sikamma pa’lapa’ barambang bulaeng napakea tantarana Hadadezer nirampasaki ri Daud nampa naerang mange ri Yerusalem.
8 Pantaranganna anjo jai sikali todong tambaga naalle Daud battu ri Betah siagang Berotai, iamintu kota-kota nakoasaia Hadadezer riolo.
9 Karaeng Tou battu ri Hamat nalangngereki angkanaya le’ba’mi nabeta Daud sikontu tantarana Hadadezer.
10 Jari nakirimmi ana’ bura’nena niarenga Yoram untu’ ampabattui sallanna mae ri Karaeng Daud siagang appabattu salama’ lanri anjo pammetanna; lanri anjo Karaeng Hadadezer masarroi a’bundu’ siagang Tou. Battui Yoram mange ri Daud siagang angngerangi hadia ga’ga iamintu bulaeng, pera’ siagang tambaga.
11 Napassareang kabusuki Daud anjo sikontu hadiaya mae ri Batara untu’ nipake lalang ri upacara sambayanga. Kammatommi anjo nagaukangi sikamma barang-barang bulaenga siagang pera’ le’baka narampasa’ battu ri Hadadezer siagang bansa-bansa nabetaya, iamintu bansa Edom, Moab, Filistin siagang Amalek.
12 (8:11)
13 A’jari pila’ katambammi masahoro’na arenna Daud ri wattunna ammotere’ siagang le’ba’na nabuno tu Edom 18.000 jaina ri Ka’bung Asin.
14 Ambangummi pakkemaang-pakkemaang tantara ri sikontu Edom, na anjo sikontu tu Edom tundu’mi mae ri ia. Nisarei Daud pammetang ri Batara manna pole kemae napa’bunduki.
15 Kammaminjo batena Daud ammarenta ri sikontu Israel siagang najagai sollanna nigau’ adele’ siagang baji’ ra’yaka.
16 Iaminne areng-arenna sikamma tau tinggia pangka’na naangkaka Daud: Panglimana tantaraya iamintu Yoab ana’na Zeruya; Jurutulisi’na balla’ kakaraenganga: Yosafat ana’na Ahilud; Imang-imanga: Zadok ana’na Ahitub siagang Ahimelekh ana’na Abyatar; Jurutulisi’na pa’rasanganga: Seraya
17 (8:16)
18 Kapala pangawala’ kalenna karaenga: Benaya ana’na Yoyada; Imang-imang balla’ kakaraenganga: ana’-ana’ bura’nena Daud.
sabda_ylsa
Yayasan Lembaga SABDA
sabda_ylsa
Selengkapnya
SABDA Alkitab
Podcast SABDA
Slideshare SABDA