Loading audio...
Error: Maaf, audio tidak dapat diputar.
(It seems your browser does not support HTMLMediaElement.playbackRate, so you will not be able to change the speech rate.)
Catatan: Perhitungan audio timestamp (ketepatan waktu antara audio dan teks) berdasarkan perhitungan mesin / algoritma.
1 Jadi dob salpu ai, isungkun si Daud ma Jahowa, nini ma, “Bulih do ahu tangkog bani sada huta i Juda?” Dob ai nini Jahowa ma hu bani, “Laho ma ho!” Nini si Daud ma, “Hu huta ja do ahu laho?” Nini ma mambalosi, “Hu Hebron.”
2 Jadi tangkog ma si Daud hujai rap pakon parinangonni na dua halak ai, si Ahinoam na hun Jesreel, pakon si Abigail, parinangon ni si Nabal hinan, na hun Karmel.
3 Iboan si Daud ma homa hasomanni na rap pakonsi ai, ganup rap pakon rumah tanggani bei, jadi marianan ma sidea i dusun-dusun ni Hebron.
4 Dob ai roh ma halak Juda, iminaki sidea ma ijai si Daud gabe raja ni marga Juda. Dob ipatugah sidea hu bani si Daud, “Halak Jabes na i Gilead do na mananom si Saul.”
5 Isuruh si Daud ma suruhanni hu bani halak Jabes na i Gilead, mangkatahon hu bani sidea, “Sai dapotan pasu-pasu ma nasiam halani idop ni uhur, na dob binahen nasiam hu bani si Saul, tuan nasiam, anjaha itanom nasiam ia.
6 Sai ibere Jahowa ma idop ni uhur-Ni pakon habonaron-Ni bani nasiam; anjaha ahu pe bahenonku do na madear bani nasiam, halani pambahenan nasiam ai.
7 Antong patotap nasiam ma uhur nasiam, anjaha patuduhkon nasiam ma haboranion nasiam; ia si Saul raja nasiam ai domma matei, anjaha domma iminaki halak Juda ahu gabe raja ni sidea.”
8 Tapi roh ma si Abner, anak ni si Ner, pambobai ni bala ni si Saul, ibuat ma si Isboset, anak ni si Saul, anjaha iboan ma ia hu Mahanaim;
9 anjaha irajahon ma ia manggomgomi Jesreel, Efraim, Benjamin pakon ganup Israel.
10 Ompat puluh tahun do umur ni si Isboset, anak ni si Saul ai, sanggah na bangkit ai ia manggomgom Israel, anjaha dua tahun do ia manrajai; pitah marga Juda do na mangirikkon si Daud.
11 Ia dokah ni si Daud raja i Hebron manggomgom marga Juda pitu tahun onom bulan do.
12 Bingkat ma si Abner, anak ni si Ner rap pakon juakjuak ni si Isboset, hun Mahanaim laho hu Gibeon.
13 Bingkat ma homa si Joab, anak ni si Seruya rap pakon juakjuak ni si Daud, gabe pajumpah ma sidea i bongbongan Gibeon; jadi marsaran ma sidea, na sada hampit lopah on na sada nari hampit lopah na sada nari ni bongbongan ai.
14 Nini si Abner ma dompak si Joab, “Mahua ma jongjong bei anak parana in anjaha marsilajouan sidea i lobeita!” Nini si Joab ma, “Dear!”
15 Dob ai jongjong bei ma sidea, bilanganni sapuluh dua halak Benjamin hun bani si Isboset, anak ni si Saul, anjaha sapuluh dua halak hun bani si Daud.
16 Dob ai ganup ma marsitangkap ulu ni imbangni, anjaha marsitobakkon podangni hu bani tonton ni imbangni; jadi rap matei dabuh ma sidea. Halani ai do ase igoran ianan ai, na dohor hu Gibeon ai, Helkat-Hasurim (ladang pisou).
17 Jobu tumang do parporangan ai sadari ni ai; jadi talu ma si Abner pakon halak Israel ibahen juakjuak ni si Daud.
18 Adong do tolu anak ni si Seruya ijai, ai ma si Joab, si Abisai pakon si Asahel, na lingkat mardalan songon balua na i ladang.
19 Jadi sai ipardakdak si Asahel ai do si Abner, seng ra ia manilah hu siamun barang hu sambilou, sai torus do ipardakdak si Abner.
20 Mangkawah ma si Abner dompak pudi, dob ai nini ma, “Ai lang ham do in Asahel?” Nini ma mambalosi, “Ahu ma da!”
21 Dob ai nini si Abner ma hu bani, “Manilah ma ham hu siamun barang hu sambilou anjaha tangkap ma sada hun bani anak parana in, anjaha buat ma sinjatani ai!” Tapi seng ra si Asahel manlembang hun pudi ni.
22 Iulaki si Abner ma use marsahap hu bani si Asahel, “Manlembang ma ham hun pudingku! Mase ma maningon bunuhonku ham tompas hu tanoh? Sonaha pangkawahkonku bani si Joab saninamu ai?”
23 Tapi manjua do ia laho manlembang, halani ai itobakkon si Abner ma ujung ni tanjani ai hu boltokni, pala tolpus; jomba ma ia ijai, lanjar matei. Anjaha ganup halak na das bani parjombaan pakon parmateian ni si Asahel ai marsaran ma.
24 Tapi sai inunut si Joab pakon si Abisai do mangayak si Abner ai; anjaha sanggah na laho sundut mata ni ari, das ma sidea hu buntu-buntu Amma, na patontang pakon Gia, bani dalan na laho hu halimisan Gibeon.
25 Dob ai martumpu ma halak Benjamin mangirikkon si Abner, gabe sada hulanan, anjaha jongjong ma sidea bani sada buntu-buntu.
26 Dob ai nini si Abner ma dompak si Joab, “Sai nunuton ni podang in ope manraseihon? Ai lang ibotoh ham paet do hadobanni in? Sadia dokah nari, ase parentahkononmu bani bangsa in maronti hun bani na mardakdak saninani?”
27 Dob ai nini si Joab ma, “Songon sintongni manggoluh Jahowa, ambit lang ihatahon ham sonai, das ronsi patar seng maronti halak na mabuei in hun bani na mardakdak saninani.”
28 Jadi isompul si Joab ma tarompet, gabe maronti ma bangsa ai ganupan, seng be ipardakdak halak Israel, seng iporang be.
29 Ia si Abner pakon hasomanni ai mardalan ma sidea torus sabornginni ai manlopusi hanopan ai; idipari sidea ma Bah Jordan, ibontas ma habungan Biteron, dob ai das ma sidea hu Mahanaim.
30 Mulak ma si Joab hun bani na mardakdak si Abner; dob ipatumpu bangsa ai ganup, moru ma hun bani juakjuak ni si Daud sapuluh siah halak ambah ni si Asahel.
31 Tapi adong do tolu ratus onom puluh halak ibunuh juakjuak ni si Daud hun bani halak Benjamin pakon hasoman ni si Abner.
32 Iusung sidea ma si Asahel anjaha itanom ma ia i tanoman ni bapani i Betlehem. Dob ai mardalan ma si Joab pakon hasomanni ai torus sabornginni ai; siangkonsi ari das ma sidea i Hebron.
sabda_ylsa
Yayasan Lembaga SABDA
sabda_ylsa
Selengkapnya
SABDA Alkitab
Podcast SABDA
Slideshare SABDA