Loading audio...
Error: Maaf, audio tidak dapat diputar.
(It seems your browser does not support HTMLMediaElement.playbackRate, so you will not be able to change the speech rate.)
Catatan: Perhitungan audio timestamp (ketepatan waktu antara audio dan teks) berdasarkan perhitungan mesin / algoritma.
1 Kenca si e nungkun Daud man TUHAN nina, "Arus kin maka aku lawes ngkuasai sada i bas kota-kota Juda?" "Ue," nina TUHAN njabapsa. "Si apai?" nina Daud nungkun. "Hebron," nina TUHAN.
2 Emaka lawes Daud ku Hebron, ikut ras ia duana ndeharana: Ahinoam i Jesreel nari, ras Abigail, janda Nabal i Karmel nari.
3 Ibabana pe anak buahna, ras keluargana, emaka ringan ia i bas kota-kota kelewet Hebron.
4 Kenca bage reh rayat Juda ku Hebron itangkuhkenna Daud jadi raja Juda. Kenca ibegi Daud maka Saul nggo ikuburken kalak Jabes i daerah Gileat,
5 isuruhna piga-piga anak buahna ku jah alu tenah, "TUHAN si masu-masu kam, sabap icidahkenndu kesetianndu man rajandu alu ngkuburken Saul.
6 Emaka icidahken TUHANlah KiniulinNa ras KesetianNa man bandu. Aku pe si mehuli kubahan man bandu perbahan kai si nggo ibahanndu e.
7 Jadilah megegeh janah ula mbiar! Rajandu Saul nggo mate janah aku nggo itangkuhken kalak Juda jadi rajana."
8 Abner anak Ner puanglima tentera Saul, nggo lompat maba Isboset anak Saul ngepari Lau Jordan ku Mahanaim.
9 I jah Isboset ijadiken Abner jadi raja daerah Gileat, Aser, Jesreel, Eperaim ras Benyamin, janah si tuhuna ia jadi raja kerina i daerah Israel.
10 Sanga ia jadi raja Israel umurna nggo empat puluh tahun, janah lit dua tahun dekahna ia jadi raja. Tapi suku Juda tetap setia man Daud,
11 emaka ia merentah Juda i Hebron lit pitu tahun enem bulan dekahna.
12 Abner ras anak buah Isboset lawes i Mahanaim nari ku kota Gibeon.
13 Joap, gelar nandena eme si Seruya, ras anak buah Daud si deban jumpa ras pihak Isboset i kolam Gibeon. Kundul ia kerina i tepi kolam e, sada terpuk arah tepi si enda, janah sada terpuk nari arah tepi si deban.
14 Nina Abner man Joap, "Buat piga-piga anak perana i bas kam nari gelah si adu rubat make senjata ras anak perana si ras aku enda." "Banci," nina Joap njabapsa.
15 Emaka ku lebe me sepulu dua kalak wakil suku Benyamin si arah Isboset ngelawan sepulu dua kalak anak buah Daud.
16 Sekalak-sekalak nangkap takal ras nebakken pedangna ku awak imbangna, emaka dua pulu empat kalakna guling ras mate. Erkiteken si emaka ingan e ibahan gelarna "Juma Pedang".
17 Jenari jadi me perang si mesangat janah italuken tentera Daud si Abner ras bangsa Israel.
18 Anak Seruya si telu kalak e lit i je eme: Joap, Abisai ras Asahel. Asahel si ngasup kiam bali pedasna ras belkih ketang,
19 pinter ngayaki Abner.
20 Itulihken Abner ku pudi janah nina, "Kam nge, Asahel?" "Ue," nina Asahel njabapsa.
21 "Ulanai ayaki aku!" nina Abner. "Ayaki sekalak tentera ena, jenari buat si lit i bas ia." Tapi la iayaki Asahel.
22 Nina Abner sekali nari man Asahel, "Ulanai aku ayaki! Ngkai maka ipaksandu aku munuh kam? Uga kari ningku ncidahken ayongku man seninandu Joap?"
23 Tapi Asahel tetap la nggit ngadi emaka ipantemken Abner lembingna ku beltek Asahel, janah telpus arah gurungna. Guling si Asahel mate. Emaka kalak si mentas arah inganna terdang e, ngadi janah tedis i je.
24 Tapi Joap ras Abisai ngayaki Abner, janah kenca ben wari seh ia ku uruk Amma, i Timur Giah, i bas dalin ku gurun pasir Gibeon.
25 Tentera i bas suku Benyamin nari pulung ka i kelewet Abner janah ertahan ia i datas sada uruk-uruk.
26 Ilebuh Abner si Joap nina, "Arus kin terus kita erperang rasa lalap? Ma ietehndu nge maka si pagitna ngenca pagi kedungenna? Kami pe teman sebangsandu nge. Asa kai nari dekahna isuruhndu tenterandu ngayaki kami?"
27 "Ersumpah aku i bas gelar Dibata si nggeluh," jabap Joap, "maka adi la kam ndai ngerana tetap kam iayaki tenterangku seh ngayak pagi erpagi-pagi."
28 Kenca bage iembus Joap terompet jadi tanda man tenterana maka ngadi ngayaki bangsa Israel. Emaka nggo ngadi peperangen e.
29 I bas gedang-gedang berngi e, Abner ras tenterana terus erdalan arah Baluren Jordan. Ikeparina Lau Jordan, janah kenca erdalan erpagi-pagi nari, seh ia i Mahanaim kenca ciger.
30 Kenca nggo ngadi Joap ngayak-ngayak, ipepulungna kerina tenterana. Lit sepulu siwah kalak si bene seakatan Asahel.
31 Tentera Daud nggo munuh 360 kalak tentera Abner i bas suku Benyamin nari.
32 Ilegi Joap ras tentera mait Asahel, ikuburkenna i kuburen keluargana i Betlehem. Jenari erdalan ia gedang-gedang berngi e, janah nandangi terang wari seh ia i Hebron.
sabda_ylsa
Yayasan Lembaga SABDA
sabda_ylsa
Selengkapnya
SABDA Alkitab
Podcast SABDA
Slideshare SABDA