Loading audio...
Error: Maaf, audio tidak dapat diputar.
(It seems your browser does not support HTMLMediaElement.playbackRate, so you will not be able to change the speech rate.)
Catatan: Perhitungan audio timestamp (ketepatan waktu antara audio dan teks) berdasarkan perhitungan mesin / algoritma.
1 Adong ma na patugahkon hu bani si Joab, “Tonggor ma, sai tangis anjaha mandoruhi do raja ai halani si Absalom.
2 Ase gabe pusok ni uhur do hamonangan bani na sadari ai bani ganup bangsa ai; ai sar do ibogei bangsa ai bani na sadari ai: Pusok do uhur ni raja ai halani anakni ai.”
3 Ase marponop-ponop ma halak na mabuei ai bani na sadari ai masuk hu huta, songon parmasuk ni halak na maila, na maporus hun parporangan.
4 Pala do irongkob raja ai bohini anjaha ipagogoh sorani tangis-tangis, “Alo ambia Absalom! Absalom! Anakku! Anakku!”
5 Dob ai laho ma si Joab marayak raja ai hu rumahni, nini ma, “Bador do ibahen ham sadari on bohi ni juakjuakmu, na paluahkon hosahmu pakon hosah ni anakmu, borumu, pakon hosah ni nasipuang.
6 halani na hinaholonganmu jolma na mangkagigihon ham, anjaha ihagigihon ham halak na mangkaholongi ham. Ai ipatidak ham do sadari on, na so parduli do ham bani sipambobai pakon bani juakjuak; ai torang do huidah sadari on, asal manggoluh si Absalom, age matei hanami ganup sadari on, malas do uhurmu.
7 On pe, jongjongkon ham ma, luar ma ham, anjaha marsahap ma ham otik pamalas uhur ni juakjuakmu; ai hubijahon ma hu bani Jahowa, anggo seng luar ham, sahalak pe lang tumaram na ra tading mangkasomani ham saborngin on; jadi hasedaon banggal ma in bamu, parahan hun bani hasedaon na dob mangonai bamu hun bani sietek-etekonmu nari das hu bani sonari.”
8 Jadi ijongjongkon raja ai ma laho hundul hu horbangan. Dob ai tarbogei ma hu bani ganup simbuei ai, “Tonggor ma, hundul do raja i horbangan.” Jadi roh ma ganup simbuei ai hu bani raja ai. Tapi maporus do halak Israel ganup hu rumahni bei.
9 Dob ai marsisolsolan ma ganup halak simbuei ai i tongah-tongah ni ganup marga ni halak Israel, nini sidea ma, “Raja ai do na paluahkon hita hun bani munsuhta, anjaha ia do na paluahkon hita hun bani tangan ni halak Palistim, hape maningon maporus ia nuan hun tanohta on halani si Absalom.
10 Ia si Absalom, na dob iminaki hita manggomgomi hita, domma matei i parporangan. Ai pe mase ma malang-malang hita mangkatahon ase mulak raja ai?” Das ma sahap-sahap ni ganup halak Israel ai bani raja ai.
11 Dob ai isuruh Raja Daud ma suruhanni marayak si Sadok pakon si Abyatar malim ai, mangkatahon hu bani sidea, “Hatahon nasiam ma hu bani pangintuai ni halak Juda, ʻMase ma parpudi nasiam laho mangalop raja in mulak hu rumah?
12 Saninangku do nasiam, sisada holi-holi pakon sisada daging do hita. Antong mase ma nasiam parpudi mangalopi raja in mulak?ʼ
13 Hu bani si Amasa pe hatahon nasiam ma, ʻAi lang sisada holi-holi pakon sisada daging do ho pakon ahu?ʼ Maningon sonai do bahenon ni Naibata hu bangku, tambah ope hunjai tene, anggo seng ho pambobai ni balangku hu lobeian on gantih ni si Joab.”
14 Jadi hona ma uhur ni ganup halak Juda, sauhur ma sidea marsuruh na mangkatahon hu bani raja ai, “Mulak ma ham pakon ganup juakjuakmu.”
15 Mulak ma raja ai, anjaha das ma ia hu Bah Jordan; anjaha halak Juda pe laho ma hu Gilgal mangalo-alo raja ai, laho padiparhon raja ai bani Bah Jordan.
16 Sonai homa si Simei, anak ni si Gera, halak Benjamin ai, na hun Bahurim, juakjuak ni ginompar ni si Saul, rap pakon anakni sapuluh lima halak pakon jabolonni dua puluh halak, gabe das ma sidea hu Bah Jordan ai, i lobei ni raja ai; tarolos ma ia tuad rap pakon halak Juda ai manjumpahkon raja ai.
17 Adong do saribu halak Benjamin hasomanni, ambah ni ai si Siba.
18 Idipari sidea ma pandiparan ai, laho padiparhon sinrumah ni raja ai, laho mambuat uhurni. Dob ai roh ma si Simei, anak ni si Gera, manrogop hulobei ni raja ai, sanggah na laho mandipari Bah Jordan ai ia,
19 anjaha nini ma hu bani raja ai, “Sai ulang ma ihira tuannami hajahaton ai atap ipaingat ham hasalahan na binahen ni jabolonmu on, sanggah na luar tuannami hun Jerusalem, anjaha ulang ma iparimbagaskon raja in hata ai ibagas uhurni.
20 Ai domma torang iahap jabolonmu on, na dob mardousa ahu ijai; halani ai, tonggor ma, ahu do na parlobei roh tuad sadari on hun bani ganup ginompar ni si Josep, laho mangalo-alo tuannami.”
21 Dob ai nini si Abisai, anak ni si Seruya ma mambalosi, “Mintor lang ma talup marutang hosah si Simei halani on, ai domma pala iburai na mininakan ni Jahowa?”
22 Tapi nini si Daud ma, “Ai aha do partalianku bani nasiam, alo anak ni si Seruya, ase gabe sibolis nasiam bangku sadari on? Tor bulih ma matei sada halak Israel sadari on? Ai hubotoh, sabonar sadari on do ahu bangkit jadi raja manggomgom Israel.”
23 Dob ai nini raja ai ma hu bani si Simei, “Seng bulih ho matei!” Pala marbija raja ai bani.
24 Si Mepiboset pe, pahompu ni si Saul, tuad do mangalo-alo raja ai; seng iburihi naheini, seng isuhur gumisni anjaha seng itaptapi paheianni olat ni parporus ni raja ai, das hu bani parmulakni mardamei-damei.
25 Sanggah roh ia hu Jerusalem laho manjumpahkon raja ai, jadi nini raja ai ma hu bani, “Mase ma lang dihut ho laho rapkon ahu alo Mepiboset?”
26 Nini ma mambalosi, “Ham tuannami anjaha rajanami, ioto-otoi juakjuakku do ahu; ai ningku do namin hu bani, ʻPalanai ma sada halode in bahen ajakanku, ase laho ahu rap pakon raja ai.ʼ Ai na repat do jabolonmu on,
27 tapi domma ipasambor-sambor homa jabolonmu on i lobei ni tuannami anjaha rajanami. Tapi usih songon malekat ni Naibata do tuannami; halani ai bahen ham ma aha na dear, nini uhurmu.
28 Ai jolma na patut marutang hosah do namin ganup ginompar ni bapa i lobei ni tuannami, raja in; hape ibahen ham do jabolonmu on hu tongah-tongah ni halak na sapanganan pakon ham. Aha be dong hak bangku padas pangindoanku bani raja in?”
29 Dob ai nini raja ai ma hu bani, “Mase sonin sahap-sahapmu ope? Domma huputuskon, ho pakon si Siba marbagi tanoh ai.”
30 Nini si Mepiboset ma hu bani raja ai, “Age pe ibuat ganupan ai, asal ma mulak tuannami mardamei-damei hu rumahni.”
31 Si Barsilai ai pe, halak Gilead ai, tuad do hun Rogelim; laho do ia pakon raja ai hu Jordan, laho manaruhkonsi hu dipar ni Bah Jordan ai, lanjar marsirang ijai.
32 Halak na dob matua tumang do si Barsilai ai, ualuh puluh tahun ma umurni; ia do na marmuduhon raja ai, sadokah marianan ia i Mahanaim, ai halak na bayak tumang do ia.
33 Nini raja ai ma hu bani si Barsilai, “Maningon ham do hasomanku laho, ase huparmudu-mudu ham i lambungku i Jerusalem.”
34 Nini si Barsilai ma hu bani raja ai, “Sadiha dokah nari tumaram manggoluh ahu, ase pala tangkog ahu rap pakon raja in hu Jerusalem?
35 Marumur ualuh puluh tahun ma ahu sadari on; sonaha ma pambahenku manirang na madear hun bani na masambor? Sonaha be tarbahen juakjuakmu on mandai na pinanganni barang na niinumni? Tor tarpatangi-tangi ahu be sora ni pandoding dalahi barang pandoding naboru? Ambahni ai mase ma gabe siporsanon ope jabolonmu on bani tuannami, raja in?
36 Sihol do taruhkonon ni juakjuakmu otik raja in hu dipar ni Bah Jordan. Mase ma pala sonai pambalas ni raja in hu bangku?
37 Palopas ham ma mulak juakjuakmu on, ase matei ahu ibagas hutangku, i lambung tanoman ni bapa pakon inang. Tapi tene, tonggor ma, ijon do juakjuakmu si Kimham, ia ma rahanan mandipar rap pakon tuannami, anjaha bahen ham ma bani barang aha rosuh ni uhurmu.”
38 Jadi nini raja ai ma, “Antong si Kimham ma hasomanku mandipar, ase hubahen bani barang aha na pinarsinta ni uhurmu; anjaha sagala na pinangindo ni uhurmu hun bangku, sai na bahenonku do bamu.”
39 Jadi idipari halak simbuei ai ma Bah Jordan. Anjaha dob mandipar homa raja ai, isummah ma si Barsilai anjaha ipasu-pasu, dob ai mulak ma ia hu hutani.
40 Raja ai pe inunut ma dalanni hu Gilgal, anjaha si Kimham do hasomanni; ganup halak Juda pakon satongah halak Israel dihut manaruhkon raja ai.
41 Dob ai roh ma ganup halak Israel hu bani raja ai, nini ma hu bani, “Mase ma ra ham tangkoon ni saninanami halak Juda anjaha ipadipar raja in pakon parrumahni ampa ganupan juakjuakni hu dipar ni Bah Jordan?”
42 Jadi nini ganupan halak Juda ma mambalosi halak Israel, “Halani dohoran raja in bennami. Mase ma manggila nasiam halani ai? Ongga ipangan hanami atap aha hun bani raja in? Atap adong sibere-bereni bannami?”
43 Tapi nini halak Israel ma mambalosi halak Juda, “Sapuluh hali bueinan haknami bani raja in, hanami do sikahanan; mase ma mapas uhur nasiam mangidah hanami? Ai lang hanami do parlobei mansahapkon ase mulak naboan rajanta? Tapi korasan do halak Juda marsahap hun bani halak Israel.”
sabda_ylsa
Yayasan Lembaga SABDA
sabda_ylsa
Selengkapnya
SABDA Alkitab
Podcast SABDA
Slideshare SABDA