Alkitab Karaoke

Loading audio...

Catatan: Perhitungan audio timestamp (ketepatan waktu antara audio dan teks) berdasarkan perhitungan mesin / algoritma.

¹ Yowab narema kabar ja’ Rato Daud terros molar sarta sossa polana Absalom.

² Daddi kamennangan se ekaolle e are jareya pas aoba daddi kasossa’an ka sakabbinna tantarana Daud sabab tantarana jareya padha ngedhing ja’ rato terros molar polana pottrana se seda.

³ Tantara jareya kabbi padha mole ka kottha ta’ asa’-kasa’, akantha tantara se arassa todhus polana buru dhari paperrangan.

⁴ Rato notobi raena sambi molar epakaja, "Adhu, na’! Tang ana’ Absalom! Absalom, tang ana’!"

⁵ Yowab ngadhep ka rato, pas mator, "E are mangken ka’dhinto junandalem matodhusan sadajana tantaraepon junandalem, guste, mangkana reng-oreng gapaneka malopot junandalem dhari pate, kadi ka’dhinto jugan pottra sareng pottreepon junandalem, ji-rajina sareng ler-sellerrepon junandalem.

⁶ Junandalem taresna ka oreng se baji’ ka junandalem, namong junandalem baji’ ka sadajaepon oreng se taresna ka junandalem! Junandalem noduwagi ce’ terrangnga ja’ sadajaepon parwira sareng pangerengngepon junandalem tadha’ artena monggu ka junandalem. La’-mala’ katonnepon junandalem tanto senneng manabi e are mangken ka’dhinto Absalom gi’ odhi’ sareng sadajaepon pangerengnga junandalem padha mate!

⁷ Ngereng junandalem meyos kalowar maayem atena reng-oreng se ngereng junandalem. Abdidalem asompa’a kalaban asmaepon PANGERAN, manabi junandalem ta’ kalowar manggi’i reng-oreng ka’dhissa’, malem mangken jugan ta’ kera badha oreng se asarengngana junandalem. Manabi kalakon kadi gapaneka, tadha’ bidana sareng manabi junandalem manggi mosiba paleng raja, se bakal etanggunga junandalem saomorra."

⁸ Saellana jareya rato pas ngadek, terros meyos ka lowar, laju alenggi e seddi’na labang saketheng. Tantara ban pangerengnga ngedhing ja’ Daud badha e jadhiya, daddi kabbi pas padha nyander ngadhep ka ratona. Sabatara jareya pasukan Isra’il la padha buru kabbi, padha mole ka bengkona bang-sebang.

⁹ Reng-oreng Isra’il padha acekcok. Ca’na reng-oreng jareya, "Rato Daud la masalamet sengko’ ban ba’na kabbi dhari oreng Filistin ban so-moso laenna; tape sateya Daud la buru ajauwi Absalom nyengla dhari nagara reya.

¹⁰ Absalom la elanti’ epadaddi rato bi’ sengko’ ban ba’na kabbi, tape sateya la seda e paperrangan. Arapa me’ padha tadha’ se aehteyara ngeba’a abali Rato Daud?"

¹¹ Ca’-oca’ jareya epeyarsa keya bi’ Rato Daud. Daddi Daud pas makon Imam Zadok ban Imam Abyatar atanya kantha reya ka para pamimpin Yehuda, "Arapa ba’na me’ dhi-budhi kadibi’ narema ban ngerengngagi rato abali ka karatonna?

¹² Ba’na reya guta’ tang bala? Me’ ba’na dhi-budhi kadibi’ se ngajak sengko’ mole?"

¹³ Salaenna jareya, imam se kadhuwa jareya bi’ Daud epakon adhabu kantha reya ka Amasa, "Ba’na reya guta’ tang bala? Molae sateya ba’na bi’ sengko’ epadaddiya panglimana tang tantara agante Yowab. Mandar sengko’ epamateya bi’ Allah mon sengko’ ta’ ajalannagi jareya!"

¹⁴ Daddi Daud ahasel ngala’ atena reng-oreng Yehuda sampe’ reng-oreng jareya apessennan ka Daud sopaja abali ka karaton abareng ban ba-ponggabana kabbi.

¹⁵ Rato pas meyos sampe’ gan Songay Yordan, sabatara jareya oreng Yehuda se la napa’ ka Gilgal ngamba’a ban ngawala rato se alengka’a Songay Yordan jareya.

¹⁶ Sabatara jareya, Simei ana’na Gera, oreng dhari suku Benyamin, ngeba oreng suku Benyamin saebu oreng, ban duliyan abareng ban oreng Yehuda entar ngamba’ rato. Bariya keya Ziba, dunorra kalowargana Saul abareng ban ana’ lalake’anna se bannya’na lema bellas oreng ban nor-dunorra se bannya’na dhu polo oreng.

¹⁷ (19:16)

¹⁸ Reng-oreng jareya nolonge kalowargana rato alengka songay sarta ajalannagi pa-apa se epakonnagi rato. E bakto rato alengka songay, Simei asojud e ajunanna sambi ngoca’,

¹⁹ "Adhu, guste, moga junandalem kasokana maelang kasala’an abdidalem. Ja’ kaemodi pa-ponapa se ampon elakone abdidalem e bakto junandalem adinggallagi Yerusalim.

²⁰ Abdidalem apangrasa, ja’ abdidalem ka’dhinto dusa, daddi ka’dhinto sabappepon e antarana ku-suku se badha e dhaera bagiyan dhaja se gi’ odhi’, abdidalem se dha’-adha’ kadibi’ ngamba’ junandalem ka ka’dhinto."

²¹ Ngedhing oca’na Simei jareya Abisai, ana’na Zeruya ngoca’, "Salerressepon Simei ka’dhinto kodu eokom mate sabab abasto rato peleyannepon PANGERAN."

²² Tape Daud adhabu ka Abisai ban ka Yowab, kaka’na, "Ella ba’na ja’ ro’-noro’. Arapa ba’na me’ marepoda sengko’? Are teya sengko’ daddi rato Isra’il pole, ban ta’ olle badha oreng Isra’il se eokom mate e are teya."

²³ Rato pas asompa ka Simei, "Sengko’ ajanji ka ba’na ja’ ba’na ta’ eokoma mate."

²⁴ Bariya keya Mefiboset bajana Saul, noro’ entar ngamba’ rato. Padana ta’ ebaccowe, janggu’na ta’ ecokor, rasoganna ta’ esassa molae bakto Rato Daud nyengla dhari Yerusalim sampe’ salamet abali pole.

²⁵ E bakto Mefiboset rabu dhari Yerusalim ngamba’a rato, rato adhabu, "Mefiboset, arapa ba’na sabbanna me’ ta’ noro’ sengko’?"

²⁶ Saodda, "Adhu, Guste Se Molja, junandalem ngagali ja’ abdidalem ka’dhinto dippang. Abdidalem makon kabula abdidalem mobuwagi pa-kapa ka hemar, etompa’a abdidalem ngerenga junandalem. Namong abdidalem ekiyanadi sareng kabula gapaneka.

²⁷ La’-mala’ abdidalem epetenna ka junandalem. Namong junandalem padha sareng malaekattepon Allah. Daddi, ponapa se eanggep sae sareng junandalem, ngereng lampa’agi.

²⁸ Sadajaepon kalowargana rama patot eokom mate sareng junandalem, namong abdidalem ka’dhinto sareng junandalem ampon eedine neddha e karaton. Daddi samangken ka’dhinto abdidalem ta’ bangal nyo’on pa-ponapa pole dhari junandalem."

²⁹ Saodda rato, "Ba’na ta’ osa ca’-ngoca’ pa-apa pole. Sengko’ la motossagi magiya sakabbinna dhi’-andhi’na Saul ka ba’na ban Ziba."

³⁰ "Diggal parengngagi ka Ziba sadaja saos," ca’na Mefiboset. "Abdidalem ampon senneng sabab junandalem ampon salamet gubar ka ka’dhinto."

³¹ Barzilai oreng Gileyad rowa dhateng keya dhari Rogelim ngerengngagiya rato alengka’a Songay Yordan.

³² Barzilai la ce’ towana, omorra ballung polo taon. Orengnga ce’ sogina ban e bakto rato badha e Mahana’im, Barzilai jareya se nyadhiya’agi dha’arra rato.

³³ Dhabuna rato, "Mara, ba’na noro’ sengko’ ka Yerusalim, neng e dhissa’ sakabbinna kabutowanna ba’na bi’ sengko’ esadhiya’agiya kabbi."

³⁴ Tape Barzilai nyaot, "Abdidalem ta’ kera abit pole odhi’ e dunnya ka’dhinto. Daddi ponapa gunana ngerenga junandalem ka Yerusalim?

³⁵ Omor abdidalem ampon ballung polo taon, sarengngan tadha’ pole se masenneng ate abdidalem. Abdidalem ampon ta’ bisa pole ngarassa’agi nyamanna teddha’an sareng nom-enoman, sareng ta’ mereng sowaraepon oreng ngejung. Abdidalem namong badhi marepot ka junandalem.

³⁶ Abdidalem ta’ patot narema opa se saka’dhinto rajaepon. Abdidalem namong terro ngerengngagiya junandalem satendak otaba dhu tendak saos dhari bara’na Songay Yordan.

³⁷ Saamponnepon ka’dhinto, abdidalem palemana ka compo’, mateya e seddi’annepon koburanna oreng towa abdidalem. Namong ka’dhinto Kimham budhu’ abdidalem. Manabi ekasokane sareng junandalem, diggal me’ olle ngereng junandalem, epakadi ponapa’a saos kasokanna junandalem. Ponapa se eanggep sae sareng junandalem, eatore."

³⁸ Dhabuna rato, "Kimham bi’ sengko’ egiba’a, bi’ sengko’ eorosa noro’ pangaterrona ba’na, ban pa-apa se daddi pamentana ba’na bi’ sengko’ ekabbulana."

³⁹ Saellana jareya Daud ban sakabbinna pangerengnga alengka Songay Yordan. Samarena jareya Daud pas nyeyom Barzilai, laju amet. Barzilai pas mole ka bengkona.

⁴⁰ Sakabbinna pasukan Yehuda ban saparona pasukan Isra’il ngerengngagi rato alengka Songay Yordan. Sanapa’na ka bara’ songay, rato terros ka Gilgal, Kimham ngereng rato jareya.

⁴¹ Saellana jareya reng-oreng Isra’il pas ngadhep ka rato, pas mator kantha reya ka rato, "Guste, aponapa tan-taretan abdidalem reng-oreng Yehuda, me’ apangrasa gadhuwan ha’ abakta sareng ngawal junandalem sakalowarga sareng sadajana pangerengngepon junandalem ka temorra Songay Yordan?"

⁴² Saodda oreng Yehuda, "Tanto bai, sabab rato reya balana oreng Yehuda. Arapa ba’na me’ peggel? Kabutowanna oreng Yehuda ta’ etanggung rato, bariya keya rato ta’ apareng persen pa-apa ka oreng Yehuda."

⁴³ Saodda oreng Isra’il, "Oreng Isra’il andhi’ ha’ sapolo kale alebbiyan dhari ha’na oreng Yehuda, maske rato tamaso’ balana oreng Yehuda. Arapa ba’na me’ ngababa’agi oreng Isra’il? Ja’ kaloppae ja’ oreng Isra’il se dha’-adha’ ngusullagi ngeba’a mole rato." Tape oreng Yehuda lebbi kerras dhari oreng Isra’il, padha ta’ endha’ ngala.

2 Samuel

Video 2 Samuel 19

Ikuti Kami:

KONTAK | PARTISIPASI | DONASI