Alkitab Karaoke

Loading audio...

Catatan: Perhitungan audio timestamp (ketepatan waktu antara audio dan teks) berdasarkan perhitungan mesin / algoritma.

¹ Nggo ituriken man Joap maka Raja Daud ngandung erceda ate sabap Absalom.

² Emaka keriahen kemenangen tentera Daud salih jadi ceda ate. Sabap ibegi tenterana raja rate ceda erkiteken anakna.

³ Mulihken ia ku kota alu sinik-sinik, desken tentera si mela iakapna, kiam i bas pertempuren nari.

⁴ Itutupi raja e ayona janah megang sorana serko, "O anakku! Anakku Absalom! Absalom anakku!"

⁵ Idahi Joap ku rumah raja nina "Sendah nggo peterukndu si ngikutken kam, kalak si nggo nelamatken geluhndu, kegeluhen kerina anakndu dilaki ras diberu, ndeharandu ras gundikndu.

⁶ Ilawanndu kalak si rate keleng janah ikelengindu kalak si rate nembeh man bandu! Tangkas ibahanndu maka pegawaindu ras kalak si ngikut ras kam la kai pe ertina man bandu. Kueteh maka meriah kal iakapndu adi Absalom nggeluh denga wari enda janah kerina kami nggo mate.

⁷ Genduari, to petetaplah ukur anak buahndu kerina. Ersumpah aku i bas gelar TUHAN adi la kin ipetetapndu, pagi erpagi-pagi sekalak pe lanai ngikutken kam. Eme cilaka si mbelinna kal si inanamindu kidekah geluhndu."

⁸ Kenca bage keke raja lawes ia kundul deher gerbang kota. Ibegi kalak ndai kerina maka ia i jah, emaka pulung ia ngkeleweti raja. Paksa si kerina bangsa Israel nggo kiam ku kutana.

⁹ Belang-belang negeri, rayat mulai erjengili sapih-sapih ia nina, "Raja Daud nelamatken kita i bas musuh-musuhta nari. Ipulahina kita i bas bangsa Pilisti nari, tapi genduari ia nggo kiam i bas Absalom nari janah itadingkenna negeri enda.

¹⁰ Sitangkuhken Absalom, tapi ia nggo mate i bas pertempuren. Dage ngkai maka la lit ise pe si maba Raja Daud mulih?"

¹¹ Berita kerna kai si ikataken bangsa Israel e seh man Raja Daud. Emaka isuruhna Imam Sadok ras Abiatar nungkun peminpin Juda, "Ngkai maka kam si perpudina nampati raja maba mulih ku istana?

¹² Kam kerina keluargangku, dareh dagingku jine. Ngkai maka arus kam si perpudina maba aku mulihken?"

¹³ Isuruh Daud pe kalak e ngataken man Amasa, "Kam keluargangku. Genduari kuangkat kam jadi puanglima perang nggantiken Joap. Dibatalah si ngukum aku adi la kulakoken e!"

¹⁴ Alu ranan si bage ibuat Daud ukur kerina kalak Juda, emaka itenahkenna kata man Daud gelah ia mulih ras kerina pegawaina.

¹⁵ I bas perdalanenna mulih ngalo-ngalo kalak Juda i tepi Lau Jordan. Kalak Juda reh ku Gilgal ngarakken Daud ngkepari lau e.

¹⁶ I bas paksa e Simei anak Gera i Bahurim nari, pedas-pedas ku Jordan njumpai Raja Daud.

¹⁷ Ikut ras ia 1.000 kalak dilaki i bas suku Benyamin nari. Bage pe Siba, pelayan keluarga Saul reh ras sepulu lima anakna dilaki ras dua puluh suruh-suruhenna. Seh ia kerina i Jordan i lebe-lebe raja.

¹⁸ Ikepari kalakna lau e ngarakken rombongen raja janah ndahiken kai saja ate raja. Sanga raja muat ngepar erjimpuh Simei i lebe-lebena,

¹⁹ nina, "O Tuanku Raja ngarap aku maka ilupakenndu kerina kesalahen si kubahan sanga kam nadingken Jerusalem. Ula min itak-takindu kesalahenku, ulanai min ingetndu si e kerina.

²⁰ Nggo kueteh lepakku Tuan. Janah eme sabapna aku si lebena i bas suku i Utara nari reh ngalo-ngalo kam, o Tuanku Raja."

²¹ Ngerana Abisai anak Seruya nina, "Simei arus ibunuh sabap isumpahina kalak si nggo ipilih TUHAN jadi raja."

²² Tapi nina Daud man Abisai ras seninana Joap, "Kai man campurenndu e? Ngkai maka igulutindu ukurku? Sendah aku nggo ka jadi raja Israel, emaka la lit sekalak pe bangsa Israel si ibunuh i bas wari enda."

²³ Jenari nina Daud man Simei, "Ersumpah aku maka la kam ibunuh."

²⁴ Mepiboset kempu Saul reh njumpai raja. Kidekah raja nadingken Jerusalem seh mulih alu kemenangen, Mepiboset la pernah murihi nahena, janggutna la icukurna, pakenna la itaptapina.

²⁵ Sanga Mepiboset reh i Jerusalem nari njumpai raja nungkun raja man bana, "Ngkai maka la kam mbarenda ikut ras aku, Mepiboset?"

²⁶ Ngaloi Mepiboset, "Bagi ietehndu o Raja, aku kalak cempang. Kusuruh mbarenda suruh-suruhenku make pelana keledengku, gelah kuersak ngikutken kam, tapi ihianatina aku.

²⁷ Ikatakenna kata guak kerna aku. Tapi kam desken Malekat Dibata, emaka lakokenlah kai akapndu payo.

²⁸ Kerina keluarga bapangku patut tiukum mate i bas Tuanku Raja nari, tapi iberendu maka aku banci man ras kam. Lanai lit hakku mindo tole perkuah atendu."

²⁹ Erjabap raja, "Lanai lit kai pe si man katakenndu. Nggo kuputusken maka kam ras Siba erbagi tading-tadingen Saul."

³⁰ "Bereken gia man bana kerina," nina Mepiboset. "Nggo malem ateku erkiteken Tuanku Raja nggo mulih alu mejuah-juah."

³¹ Barsilai i Gileat nari pe reh i Rogelim nari ngarakken raja ku lepar Jordan.

³² Barsilai nggo seh kal tuana, umurna nggo waluh puluh tahun. Ia sekalak si seh kal bayakna, janah nggo isikapkenna pangan raja kidekah raja tading i Mahanaim.

³³ Nina raja man Barsilai, "Ota ras kita ku Jerusalem, aku si pekena-kena kam."

³⁴ Tapi nina Barsilai njabapsa, "Lanai bo ndekah aku nggeluh. Dage kai gunana kuikutken kam ku Jerusalem Tuanku Raja?

³⁵ Umurku nggo waluh puluh tahun, janah lanai kai pe banci erbahanca aku senang. Lanai tercecap aku kai si kupan ras kai si kuinem, lanai kubegi sora kalak rende. Jadi babandu saja nge ngenca aku pagi, o Raja.

³⁶ Lanai aku patut ndatken pemere si bage belinna, emaka kutaruhken saja kam terjeng ngepari Lau Jordan.

³⁷ Jenari pelepaslah aku mulih janah mate deherken kuburen orang tuangku. Enda anakku Kimham, jadi suruh-suruhenndu. Baba ia ras kam, janah uga akapndu si mehulina bage lah bahan man bana."

³⁸ Erjabap raja, "Kubaba dage ia ras aku janah kubahan man bana rikutken sura-surandu. Janah kai atendu minter kubahan."

³⁹ Kenca bage Daud ras kerina anak buahna ngepari Lau Jordan. Ikatakenna mejuah-juah man Barsilai jenari ipasu-pasuna, emaka mulih Barsilai ku kutana.

⁴⁰ Sanga ngepari Lau Jordan, kerina kalak Juda ras setengah kalak Israel ngarakken raja. Kenca seh i lepar lawes ia ku Gilgal, Kimham pe ikut ras ia.

⁴¹ Kenca bage kerina rayat Israel reh ndahi raja nina man Daud, "O Raja, ngkai maka senina kami kalak Juda erpengakap ia nge si erhak ngalo-ngalo ras ngarakken kam, keluargandu, ras kerina anak buahndu ngepari Lau Jordan?"

⁴² Nina kalak Juda njabapsa, "Ilakoken kami e sabap Raja sada suku ras kami. Dage ngkai maka kam merawa? Labo igalarina nakan kami bage pe labo iberekenna man kami kai pe."

⁴³ Ibalas kalak Israel nina, "Kami sepuluh kali lipat asa si e lit hak kami nandangi Raja Daud aminna pe kam sada suku ras raja. Ngkai maka kitik idahndu kami? Ula lupa maka kami nge si perlebena ncakapken kerna maba raja mulih!" Tapi sekseken kalak Juda asangken kalak Israel.

2 Samuel

Video 2 Samuel 19

Ikuti Kami:

KONTAK | PARTISIPASI | DONASI