Loading audio...
Error: Maaf, audio tidak dapat diputar.
(It seems your browser does not support HTMLMediaElement.playbackRate, so you will not be able to change the speech rate.)
Catatan: Perhitungan audio timestamp (ketepatan waktu antara audio dan teks) berdasarkan perhitungan mesin / algoritma.
1 Yowab ngagali ja’ Daud ce’ kerrongnga ka Absalom,
2 daddi laju makon oreng ngone’e settong babine’ se penter se badha e kottha Tekowa. Sanapa’na babine’ jareya ka jadhiya, Yowab adhabu, "Ba’na kodu tha-kantha sa-masossa; ngangguy kalambi kasossa’an, ban ja’ amennya’ ro’om. Ba’na tha-kantha cara oreng se la abit nangese matena oreng se talebat ekataresnae ba’na.
3 Ba’na pas nyabis ka rato, pas mator kantha reya." Bi’ Yowab babine’ jareya laju eparenge oneng, apa se kodu ekoca’agi.
4 Babine’ jareya laju ngadhep ka rato, asojut ban nyemba sambi mator, "Nyo’ona tolong abdidalem, guste."
5 "Badha apa?" dhabuna rato ka babine’ jareya. Saodda babine’ jareya, "Abdidalem ka’dhinto randha se mesken. Eppa’epon kacong ampon adinggal omor.
6 Abdidalem gadhuwan ana’ lalake’ kadhuwa, e settong are se kadhuwa ka’dhinto atokar e talon; sarrena e ka’dhissa’ tadha’ oreng, daddi se atokar tadha’ se mesa kantos se settong mate epate’e settongngepon.
7 Samangken, abdidalem ekamoso sareng sadajana la-bala abdidalem, sadajana padha maksa sopaja abdidalem massra’agi ana’ se mate’e taretanna ka’dhissa’ ka la-bala abdidalem, sopaja reng-oreng gapaneka kengenga ngokom mate’e ana’ abdidalem lantaran mate’e taretanna. Manabi ana’ gapaneka sareng abdidalem epassra’agi, abdidalem pas kare kadibi’an karathongtheng. La-bala abdidalem bakal mamosna’a pangarebban abdidalem se namong settong sareng daddi lantaranna abdidalem bakal ta’ gadhuwana ana’ lalake’ pole se ebadhiya panerrossa toronanna eppa’epon kacong."
8 "Ella, kassa’ mole," dhabuna rato, "dina sengko’ se ngorosa parkara reya."
9 "Guste Se Molja," atorra babine’ jareya, "ponapa saos se elampa’agiya junandalem, abdidalem sareng kacong se nanggunga; junandalem sareng kalowargaepon ta’ sala."
10 Dhabuna rato, "Mon badha oreng se ngara ba’na, giba ka sengko’, sopaja ba’na saterrossa ta’ ela-salae pole."
11 Atorra babine’ jareya, "Moga junandalem kasokana nyo’onnagi ka GUSTE Allahepon junandalem, guste, sopaja oreng se malessa matena ana’ abdidalem ka’dhissa’ ja’ kantos ngalakone kajahadan se araja’an pole kalaban mate’e ana’ abdidalem se settonganna." Dhabuna Daud, "Bit asmana PANGERAN se odhi’, ana’na ba’na jareya ta’ kera epa-mabaramma maske sakone’a."
12 Babine’ jareya mator, "Guste Se Molja, abdidalem nyo’ona edi tor-matora sakone’ aggi’." "Iya mara," dhabuna rato.
13 Atorra babine’ jareya, "Kalaban dhabuna junandalem ka’dhinto, junandalem ngakone ja’ junandalem dibi’ sala lantaran ta’ ngedine pottraepon junandalem paleman dhari sowakana. Aponapa junandalem me’ abadhi kasala’an kadi ka’dhinto ka ommadda Allah?
14 Sadajana manossa bakal seda’a; manossa ka’dhinto saompama aeng se nompa ka tana, ta’ kengeng epakompol pole. Sanare Allah ta’ kera maodhi’ pole oreng se ampon seda; daddi junandalem kodu aehteyar kadi ponapa carana sopaja oreng buwangan kengenga paleman pole.
15 Abdidalem ngadhep ka junandalem lantaran eara oreng. Abdidalem laju gadhuwan pekkeran langkong sae manabi abdidalem mator ka junandalem kalaban pangarep junandalem ngabbulana se daddi panyo’on abdidalem.
16 Ca’epon pekker abdidalem tantoepon junandalem meyarsa’agi sareng masalamet abdidalem dhari reng-oreng se terro mateyana abdidalem sareng ana’ abdidalem. Reng-oreng ka’dhissa’ amaksod mowanga abdidalem sareng ana’ abdidalem dhari tana paparengnga Allah ka ommattepon.
17 Abdidalem yakin ja’ janji se edhabuwagi junandalem tanto masalamet abdidalem sabab junandalem akadi malaekadda Allah, se oneng abida’agi ka’imma se sae sareng ka’imma se juba’. Moga GUSTE Allahepon junandalem asarengngana junandalem!"
18 Saodda rato, "Sengko’ anya’-tanya’a ka ba’na, saodi pajujur." "Eatore, guste," saodda babine’ jareya.
19 Dhabuna rato, "Ba’na se dha’ enna’ reya esoro Yowab, ya?" Saodda babine’ jareya, "Bit nyabaepon junandalem, abdidalem ta’ oneng se nolaga partanya’annepon junandalem. Pajat lerres guste, Yowab se marenge oneng abdidalem ponapa se kodu elakone sareng ponapa se kodu eatorragi sareng abdidalem.
20 Namong Yowab se makon abdidalem ka’dhinto lantaran terro malastareya parkara ka’dhinto kalaban sae. Junandalem bicaksana akadi malaekadda Allah, ngagali ka sadajana kadaddiyan."
21 Saellana jareya rato adikane Yowab, laja adhabu, "Pangaterrona ba’na jareya bi’ sengko’ ekabbulana. Kassa’ kone’e Absalom pas giba dha’ enna’."
22 Yowab asojud e ajunanna Daud laju mator, "Moga Allah aberkadana junandalem, guste! Samangken abdidalem oneng ja’ junandalem kasokan ka abdidalem lantaran parnyo’onan abdidalem sareng junandalem ekabbuli."
23 Saellana jareya Yowab laju mangkat ka Gesur ngoneyana Absalom egiba’a abali ka Yerusalim.
24 Tape bi’ rato Absalom ta’ eedine alenggi e karaton. "Sengko’ ta’ terro nangaleyana robana," dhabuna rato. Daddi Absalom terros gubar ka compo’na dibi’, ta’ ngadhep ka rato.
25 Absalom ealem oreng polana robana paleng bagus e nagara Isra’il. Tadha’ tandhinganna. Dhari konco’na padana sampe’ ka konco’na rambudda tadha’ calena.
26 Rambudda ce’ gamba’na sampe’ tapaksa eketthok sataon sakaleyan sabab ekarassa ce’ berra’na. Thok-ketthoganna rambut jareya lebbi dhari dhu kilo mon etembang ngangguy tembanganna karaton.
27 Absalom kaagungan pottra lalake’ tatello’ ban pottra babine’ se ce’ raddinna kasorang, asmana Tamar.
28 La dhu taon abidda Absalom badha e Yerusalim, tape gi’ ta’ tapanggi ban rato.
29 Daddi e settong are laju adikane Yowab, epakona ngadhep ka rato, tape Yowab ta’ kasokan rabu. Absalom adikane sakaleyan aggi’, tape Yowab paggun ta’ rabu keya.
30 Absalom pas adhabu ka nor-dunorra, "Ba’na tao teggalla Yowab se badha e erenganna tang teggal se etamenne jaba rowa, ta’ iya? Kassa’, obbar teggal jareya." Nor-dunorra Absalom jareya entar ngobbar teggal jareya.
31 Yowab pas meyos ka compo’na Absalom, laju mareksane kantha reya, "Aponapa nor-dunorra panjennengngan me’ ngobbar teggal abdina?"
32 Saodda Absalom, "Polana sampeyan ta’ poron dhateng e bakto eolok bi’ kaula. Kaula ngotosa sampeyan ka rato manapa’a partanya’an kaula se sapaneka, ‘Ponapa gunana kaula paleman dhari Gesur abali ka ka’dhinto? Anyamanan neng e ka’issa’.’" Absalom pas adhabu pole, "Ehteyarragi sopaja kaula bisa’a ngadhep ka rato, mon pajat kaula gi’ eanggep sala, kaula poron eokom mate."
33 Yowab ngadhep ka Daud manapa’ dhabuna Absalom. Rato laju adikane Absalom, Absalom rabu asojud e ajunanna rato. Bi’ rato etarema sambi eseyom.
sabda_ylsa
Yayasan Lembaga SABDA
sabda_ylsa
Selengkapnya
SABDA Alkitab
Podcast SABDA
Slideshare SABDA