Alkitab Karaoke

Loading audio...

Catatan: Perhitungan audio timestamp (ketepatan waktu antara audio dan teks) berdasarkan perhitungan mesin / algoritma.

¹ Ieteh Joap seh kal tedehna ate raja man Absalom.

² Erkiteken si e itenahkenna sekalak diberu si ringan i Tekoa, si seh kal beluhna. Nina Joap man bana, "Pekulah-kulah bandu sangana erceda ate. Pake paken tanda rate ceda, janah ula suri bukndu. Bahan bagi sekalak diberu si nggo ndekah kal erceda ate.

³ Kenca bage dahi raja janah kataken man bana kai si kukataken man bandu." Emaka ikataken Joap man diberu e kai si man katanken.

⁴ Lawes diberu e ndahi raja nembah seh ku taneh jenari nina, "Sampati aku Tuanku Raja!"

⁵ "Kai atendu?" nina raja nungkun diberu e. "Aku sekalak diberu balu-balu," nina njabapsa. "Perbulangenku ndekah me nggo mate.

⁶ Lit dua kalak anakku dilaki, janah i bas sada wari rubati ia i mbalmbal, erkiteken la lit si naroi mate sekalak ibunuh seninana.

⁷ Janah genduari Tuan kerina keluargangku ngelawan aku. Ituntutna kuendesken anakku e man bana gelah banci ibunuh sabap nggo ibunuhna seninana. Adi ilakokenna e aku nari ngenca pagi tading sisada janah lanai lit anakku. Icedakenna atena pengarapenku si tading, janah masap me gelar perbulangenku la lit sekalak pe anak dilaki nerusken kesusurenna."

⁸ "To mulihken ku rumah," nina raja njabapsa. "Aku ngurussa soal si e."

⁹ "O Raja, kai pe atendu ibahanndu aku nge ras keluargangku si ersalah. Kam ras keluarga kerajanndu sada pe labo ersalah," nina diberu e.

¹⁰ Nina raja ngaloi, "Adi lit kalak si ngancam kam baba man bangku maka ulanai ndigan pe kam igangguna."

¹¹ Nina diberu e, "O Raja, mindo aku gelah itotokenndu man TUHAN Dibatandu, maka keluargangku si nuntut balas i bas kematen anakku, ula munuh anakku si deban." "Erpadan aku i bas gelar Dibata si nggeluh," nina Daud njabapsa, "Maka anakndu la ilukai sitik pe."

¹² "O, Raja ngarap aku gelah iberendu aku ngerana sitik nari," nina diberu e. "Kai kin?" nina raja njabapsa.

¹³ Nina diberu e man Daud, "Ngkai maka nggo bage salahna perbahanenndu man bangsa Dibata? Anakndu jine la ipelepasndu mulih i bas pembuangen nari, emaka kam nggo ersalah alu kai si ikatakenndu ndai.

¹⁴ Kita kerina mate me; kita bali ras lau si mambur ku taneh si lanai nari banci ipepulung. Tapi ikawali Dibata kalak si nggit ndarami dalan gelah kalak si terbuang banci mulihken.

¹⁵ Genduari o Raja, maka aku reh ngerana ras kam erkiteken rayat ngancam aku. Emaka nina ukurku, 'Ngeranalah aku ras Raja alu pengarapen maka ilakokenna kai si kupindo.'

¹⁶ Kuakap ibegiken Raja nge aku janah iselamatkenna aku i bas kalak si ersura-sura aku ras anakku kernep. Ate kalak emaka kami miser i bas taneh si nggo ibereken Dibata.

¹⁷ Padan Raja tentu erbahanca teneng ukurku. Sabap Raja e bali ras Malekat Dibata si ngasup meteh apai si mehuli apai si jahat. TUHAN Dibatandulah si ngarak-ngarak kam!"

¹⁸ Nungkun raja e nina, "Lit sada sungkunenku man bandu, janah arus iturikenndu si tuhuna, ula kam erbuni-buni." "Sungkunlah o Raja," nina diberu e njabapsa.

¹⁹ "Joap kin si nuruh kam ngelakoken si enda kerina?" nina raja nungkun. Nina diberu e njabapsa, "Ersumpah aku erkiteken kegeluhenndu o Raja, maka la lit dalanku nilah njabap penungkunenndu e. Payo maka pegawaindu Joap nge si ngataken man bangku kai si man bahanenku ras kai si man katankenku.

²⁰ Tapi ibahanna e gelah ndungi soal enda alu mehuli. Raja bali kap pentarna ras Malekat Dibata janah meteh kerina kai si jadi."

²¹ Kenca si e nina raja man Joap! "Nggo kuputusken ngelakoken kai sura-surandu. To lawes janah legilah Absalom jenari baba ia mulih ku jenda."

²² Alu mehamat Joap nembah seh ku taneh i lebe-lebe Daud jenari nina, "Dibata si masu-masu kam o Raja! Genduari kueteh maka keleng atendu aku sabap nggo iberekenndu pemindonku."

²³ Jenari ersikap ia lawes ku Gesur janah ibabana Absalom mulih ku Jerusalem.

²⁴ Amin bage pe iperentahken raja maka Absalom la banci tading i istana. "La ateku ngidah ia," nina raja. Emaka i bas rumahna Absalom ringan janah la ia ngadap ku lebe-lebe raja.

²⁵ La lit sekalak pe i Israel si bagi Absalom terberitana erkiteken jilena rupana. Kai pe la lit man pandangen mulai i bas tapak-tapak nahena nari terus ku ujung buk takalna.

²⁶ Bukna mbur kal, janah arus ipangkasna sekali setahun erkiteken nggo gedangsa kal ras mberatca. Buk si ipangkasna e lebih dua kilo beratna rikutken timbangen raja.

²⁷ Anak Absalom lit telu kalak dilaki, janah sekalak anak diberu si seh kal jilena, Tamar gelarna.

²⁸ Nggo dua tahun dekahna Absalom ringan i Jerusalem, tapi lalap ia langa jumpa ras raja.

²⁹ I bas sada wari itenahkenna Joap, mindo gelah idahina min raja. Tapi Joap la nggit reh. Itenahkenna ka Joap sekali nari, tapi la ka nggit reh Joap.

³⁰ Emaka nina Absalom man suruh-suruhenna, "Itehndu maka juma Joap sebaleng ras jumangku, janah jumana e sangana isin dawa. To ciluk!" Emaka lawes kalak ndai nciluk juma Joap.

³¹ Erkiteken si e reh Joap ku rumah Absalom nina, "Ngkai maka iciluk suruh-suruhenndu jumangku?"

³² Ngaloi Absalom, "Sabap la kam nggit reh sanga kam kutenahken. Kusuruh ateku kam ndahi raja lako nehken penungkunenku enda, 'Kai gunana kutadingken Gesur reh ku jenda? Ma kin ulin nge aku tading i jah?'" Janah tole nina Absalom, "Ateku iaturndu gelah banci aku ngadap raja, janah adi ersalah kin aku gelah ibunuhna."

³³ Emaka lawes Joap ndahi Raja Daud janah iturikenna kai si nggo ikataken Absalom. Itenahken raja Absalom. Reh Absalom janah nembah ia seh ku taneh i lebe-lebe bapana. Ideheri raja ia iemana Absalom.

2 Samuel

Video 2 Samuel 14

Ikuti Kami:

KONTAK | PARTISIPASI | DONASI