Loading audio...
Error: Maaf, audio tidak dapat diputar.
(It seems your browser does not support HTMLMediaElement.playbackRate, so you will not be able to change the speech rate.)
Catatan: Perhitungan audio timestamp (ketepatan waktu antara audio dan teks) berdasarkan perhitungan mesin / algoritma.
1 Biasana wattu accu’la’na leko’-leko’ kayua namaju sikamma karaenga a’bundu’. Na ri wattu accu’la’na leko’-leko’ kayua anjo taunga nasuromi Daud anjo Yoab maju a’bundu’ siagang ngaseng sikamma perwiraya siagang sikontu tantara Israel; nampa nabetamo ke’nanga tu Amon siagang nakurummi kota Raba. Mingka Daud ammantangi ri Yerusalem.
2 Ri se’reang karueng, ambangung tinrona Daud, a’jappa-jappai irate ri pattongko’ lappara’na balla’ kakaraenganga. Battu anjoreng nia’mo sitau baine sitabang a’je’ne’, na teai sipato’ ga’gana anjo bainea.
3 Na nasuro pakkuta’nangngammo Daud angkana inai anjo bainea. Nipauammi angkanaya anjo bainea niarengi Batsyeba. Manggena niarengi Eliam siagang bura’nenna niarengi Uria tu battu ri Het.
4 Nasuro allemi Daud anjo bainea. Na battuna mange ri balla’ kakaraenganga, assikatinroammi siagang Daud. (Silalonna le’ba’ Batsyeba anggaukangi upacara mannangkasi ri kalenna lanri le’ba’na battu bulanna.) Nampa ammotere’ mange ri balla’na.
5 Siapa are sallona ribokoanganna appakkaramulami Batsyeba tianang. Akkirimmi kabara’ mae ri Daud lanri anjo passalaka.
6 Akkirimmi linta’ Daud parenta mae ri Yoab, angkana, "Suroi Uria anjo tu Het battu mae ri nakke." Jari nasuromi Yoab anjo Uria mange assibuntulu’ siagang Daud.
7 Ri wattunna andallekang Uria ri Karaeng Daud, napakkuta’nangngangi karaenga angkana antekamma kaadaanna Yoab siagang pasukang Israel, kammayatompa antekamma jappa-jappana pa’bundukanga.
8 Nampa nakanamo Daud mae ri Uria, "Ammotere’ mako mae ri balla’nu siagang ammari-mari mako sinampe’." Ri wattunna nabokoimo Uria balla’ kakaraenganga, akkirimmi Daud hadia mange ri balla’na Uria.
9 Mingka tammoterai Uria passangalinna attinroi ri dallekanna pakke’bu’ lompona balla’ kakaraenganga siagang ngaseng pangawala’na karaenga.
10 Nipauammi Daud anjo passalaka. Jari akkuta’nammi ri Uria angkana, "Silalonnu ammotere’ battu ri pa’jappang bellaya, angngapa natena nummotere’ mae ri balla’nu?"
11 Appialimi Uria angkana, "Tantara Israel siagang Yehuda sitabangi a’bundu’ tojeng-tojeng siagang nirurungangi ke’nanga ri Patti ParjanjianNa Batara; Yoab panglimana ikambe siagang sikamma perwiraya niaki akkema ri paranga. Angngapa naanne atanta ammotereki mae ri balla’, angnganre angnginung siagang attinro siagang bainenna? Lanri nyawana karaengku siagang lanri nyawana atanta, tena nalanagaukang atanta anjo kammaya!"
12 Nampa nakanamo Daud, "Sudamo, ammari-mari mako pole anne alloa anrinni. Ammukopi bari’basa’ nampa kukellaiko a’lampa." Jari ammantammi Uria ri Yerusalem anjo alloa. Ri allo ammukona nikio’mi ri Daud untu’ sipangnganreang.
13 Jari angnganremi siagang nipainummi jai-jai sa’genna nasa’ring. Mingka anjo bangngia tena tongija nammotere’ Uria mange ri balla’na, passangalinna attinroi a’lapara’ kalimbu’ ilalang ri bili’na pangawala’na balla’ kakaraenganga.
14 Ammukona annulisi’mi sura’ Daud mae ri Yoab, nampa nakiring nasareang Uria angngerangi.
15 Natulisiki lalang sura’ angkana, "Suroi Uria maju ri pa’bundukang kaminang ri dallekanga, ri tampa’ kaminang sarroa pa’bundukanga, nampa ammundurukko kau natena naassengi sollanna mate lalang bundu’."
16 Jari lalang nakurunna Yoab anjo kotaya, nasuromi Uria a’lampa mange ri tampa’ naassenga angkanaya nijagai kassaki ri musua.
17 Ri wattunna assulu’ tantara musua battu ri kotaya siagang namajui pasukanna Yoab, nia’ siapa are perwira pasukanna Daud nibuno, kammayatompa Uria.
18 Nampa akkiring Yoab tunisuro mange ri Daud untu’ ampabattuangi antekamma jappa-jappana anjo pa’bundukanga.
19 Naparentakangi Yoab mae ri anjo tunisuroa angkana, "Punna nalangngere’mo karaenga laporannu ri passala’na jappa-jappana anne pa’bundukanga,
20 gassingka a’jari larroi siagang akkuta’nangi ri kau angkana, ‘Angngapa nu’reppese’ kamma mae ri anjo kotaya? Sai nuassengi angkanaya ma’nassa lammakei pana musua battu rate ri tembo’-tembo’na?
21 Nukaluppaimika antekamma batena Abimelekh ana’na Gideon nibuno ri Tebes? Sai matei lanri nia’na sitau baine appasambila batu pa’giling labu’ battu rate ri temboka mae ri ia? Jari, angngapa nu’reppese’ kamma mange ri anjo temboka?’ Punna akkuta’nang kamma anjo karaenga, paumi ri ia angkana, ‘Uria, perwira tantarana karaengku, mate tongi!’"
22 Na’lampamo anjo tunisuroa andallekang ri Daud siagang napabattumi anjo apa naparentakanga Yoab mae ri ia.
23 Nakanamo anjo tunisuroa, "La’bi kassakangngangi musunna ikambe siagang assuluki ke’nanga battu ri kotaya ammajui ikambe ri paranga. Mingka napakkassakkangi ikambe ampaunduruki ke’nanga ammotere’ sa’genna mange ri pakke’bu’ lompona kotaya.
24 Nampa battu ratemi ri temboka ke’nanga ampanai ikambe, na nia’mo siapa are battu ri perwira pasukanna karaengku mate, kammayatompa Uria mate tommi."
25 Nakanamo Daud ri anjo tunisuroa, "Pakajarreki pa’mai’na Yoab siagang pauangi sollanna tena naca’di pa’mai’na, nasaba’ takkulleai nitappu angkanaya inai lamate lalang ri pa’bundukanga. Pauangi sollanna napakajai siagang la’bi naterassi majua mae ri anjo kotaya sa’genna tundu’ anjo kotaya."
26 Ri wattunna nalangngere’ Batsyeba angkanaya matemi bura’nenna, susa kamateammi.
27 Nampa le’ba’na kasusaanna, nasuro allemi Daud anjo bainea nanierang mange ri balla’ kakaraenganga siagang nabaineammi. Siapa are bulang ribokoanganna allassukammi sitau ana’ bura’ne. Mingka tena nasannang pa’mai’Na Batara mae ri anjo panggaukanna Daud.
sabda_ylsa
Yayasan Lembaga SABDA
sabda_ylsa
Selengkapnya
SABDA Alkitab
Podcast SABDA
Slideshare SABDA