Loading audio...
Error: Maaf, audio tidak dapat diputar.
(It seems your browser does not support HTMLMediaElement.playbackRate, so you will not be able to change the speech rate.)
Catatan: Perhitungan audio timestamp (ketepatan waktu antara audio dan teks) berdasarkan perhitungan mesin / algoritma.
1 To-rato biyasana entar aperrang e mosem semme. Ban e mosem semme taon jareya Daud makon Yowab mangkat aperrang abareng bi’ para parwirana ban sakabbinna tantara Isra’il; e dhalem perrang jareya bangsa Amon epakala ban kottha Raba ekeppong. Tape Daud dibi’ alenggi e Yerusalim.
2 E settong are, e bakto para’ compet are, saellana asaren seyang Daud abungo, pas ongga ka ata’na karaton se rata. Parappa’na lan-jalanan e ata’ se rata jareya Daud ngoladi badha oreng babine’ mandhi. Babine’ jareya ce’ raddinna.
3 Daddi Daud makon oreng atanya’agi sapa babine’ jareya. Ca’na babine’ jareya nyamana Batsyeba; eppa’na nyamana Eliyam ban lakena oreng Het se anyama Uriya.
4 Daud makon oreng ngone’e babine’ jareya; saellana babine’ jareya egiba ka karaton, bi’ Daud ekapolong asaren. (Batsyeba gi’ buru mare ababerse polana buru mare dhateng kotorra.) Samarena jareya Batsyeba pas mole ka bengkona.
5 Ta’ saapa abidda dhari jareya Batsyeba ngandhung, daddi pas asorowan ka Daud ngatore pameyarsa parkara jareya.
6 Daud duli apessennan ka Yowab, dhabuna, "Uriya oreng Het rowa sorowagi dha’ enna’." Daddi bi’ Yowab Uriya esoro nyabis ka Daud.
7 E bakto Uriya napa’ ka karaton, Daud mareksane kabadha’anna Yowab ban pasukanna sarta jalanna paperrangan.
8 Daud pas adhabu ka Uriya, "Kassa’ mole gallu, bu-ambu lesso sakejja’." Saellana Uriya mole dhari karaton, Daud ngeremmagi hadiya ka bengkona.
9 Tape Uriya jareya ta’ mole ka bengkona, pera’ tedhung e labang sakethengnga karaton apolong bi’ pangawalla rato.
10 Kabar parkara jareya epanapa’ ka Daud. Daud laju mareksane ka Uriya, "Ba’na gi’ buru abali dhari parjalanan se jau, arapa me’ ta’ mole ka bengkona?"
11 Saodda Uriya, "Tantara Isra’il sareng Yehuda parappa’epon aperrang sambi abakta Petthe Parjanjiyan; Yowab komandhannepon pasukan abdidalem, sarengngan sadajana parwira akemah e talon. Kadi ponapa abdidalem se palemana ka compo’, dha-neddha sareng nom-ngenom, tedhung sareng raji abdidalem? Abdidalem asompa’a demi nyabaepon junandalem sareng nyaba abdidalem, abdidalem ta’ ngalakonana gapaneka!"
12 Daddi Daud adhabu, "Mon bariya, ba’na neng e dhinna’ bai are teya, lagguna olle mangkat pole." Daddi Uriya neng e Yerusalim e are jareya. Kalagguwanna Uriya eonjang Daud eajak ngakan.
13 Uriya ngakan e jadhiya, eberri’i nom-enoman sabannya’na sampe’ mabu’. Tape e malem jareya Uriya ta’ mole ka bengkona; aba’na tedhung alama’ sapo’na e kennengnganna pangawalla karaton.
14 Kalagguwanna Daud ngeremmagi sorat ka Yowab, epakon giba ka Uriya.
15 Essena sorat jareya kantha reya, "Uriya saba’ e bagiyan adha’, e bagiyan perrang se paleng berra’, ba’na pas nyorot ja’ ala-bala, dina Uriya me’ olle mate."
16 Daddi sabatara Yowab ngeppong kottha jareya, Uriya esoro entar ka kennengngan se noro’ sapangataowanna Yowab ejaga kalaban kowat bi’ moso.
17 E baktona pasukanna moso kalowar dhari kottha ban nyerrang pasukanna Yowab, parwirana Daud badha pan-barampan se mate, tamaso’ Uriya.
18 Yowab pas ngerem otosan se esoro mator ka Daud parkara jalanna paperrangan.
19 Parentana Yowab ka otosan jareya, "Mon rato la narema laporanna ba’na parkara jalanna perrang jareya,
20 olle daddi rato duka sarta mareksane ka ba’na, ‘Arapa ba’na me’ nyander sampe’ ce’ semma’na ka kottha jareya kaangguy nyerrang moso? Apa ba’na ta’ tao ja’ moso tantona ngocol pana dhari attas pagar alassa?
21 Apa ba’na ta’ enga’ baramma Abimelekh ana’na Gideyon se epate’e e Tebes? Matena polana epelpal oreng babine’ ban bato pagilisanna teppong dhari attassa pagar alas? Daddi, arapa ba’na me’ nyander sampe’ ce’ semma’na ka pagar alas jareya?’ Mon rato mareksane kantha jareya, ba’na nyaot kantha reya, ‘Uriya parwiraepon junandalem, seda jugan!’"
22 Otosan jareya pas ngadhep ka Daud sarta manapa’ apa se esoro koca’agi bi’ Yowab.
23 Atorra, "Moso akowadan dhari pasukannepon Yowab. Namong e bakto moso kalowar dhari dhalem kottha nyerrang pasukannepon Yowab e talon, pasukannepon Yowab alaban salar-kellarra; moso terros nyorot kantos gan labang sakethengnga kottha ka’dhissa’.
24 Saamponna ka’dhinto moso pas ngocol pana dhari attassa pagar alassa kottha, pan-saponapan parwiraepon junandalem adinggal omor tamaso’ Uriya."
25 Dhabuna Daud ka otosan jareya, "Tolonge Yowab sopaja atena kowat ban balai soro ja’ kene’ ate, sabab ta’ etemmo sapa se bakal mateya e dhalem perrang. Balai ka Yowab sopaja kottha jareya eserrang pole kalaban kakowadan se araja’an sampe’ kottha jareya atellok."
26 E bakto ngedhing ja’ lakena mate, Batsyeba laju noduwagi kasossa’anna.
27 Saellana la lebat bakto jareya, bi’ Daud Batsyeba epakon giba ka karaton pas epadaddi rajina. Saellana olle pan-barampan bulan dhari jareya, Batsyeba babar lalake’. Tape PANGERAN ta’ kasokan ka tengkana Daud jareya.
sabda_ylsa
Yayasan Lembaga SABDA
sabda_ylsa
Selengkapnya
SABDA Alkitab
Podcast SABDA
Slideshare SABDA