Loading audio...
Error: Maaf, audio tidak dapat diputar.
(It seems your browser does not support HTMLMediaElement.playbackRate, so you will not be able to change the speech rate.)
Catatan: Perhitungan audio timestamp (ketepatan waktu antara audio dan teks) berdasarkan perhitungan mesin / algoritma.
1 Siapa are wattu ribokoanganna matemi Nahas iamintu karaeng Amon, nampa Hanun ana’ bura’nena a’jari karaeng.
2 Nampa nakanamo Daud, "Anjo Nahas agang majarrekku. Jari musti agang tonga’ siagang Hanun ana’na." Lanri kammana anjo akkirimmi Daud tunisuro mange ri pa’rasangang Amon untu’ ansaleori Hanun lanri matena manggena.
3 Ri wattunna battu ke’nanga mange ri Amon, nakanamo sikamma pamimpinna anjo pa’rasanganga mae ri Karaeng Hanun, "Teaki’ angkanai pikkiranta angkanaya nanakiring Daud anjo tunisurona lanri ero’na ampakalompoi manggeta karaeng! Nakiringi anjo taua mae anrinni a’jari mata-mata untu’ ansalidiki anne kotaya, sollanna akkulle naalle."
4 Na najakkala’mo Hanun anjo sikamma tunisurona Daud, nacukkuruki siali janggo’na ke’nanga, napolongi pakeanna ke’nanga sa’genna pungku’na, nampa nasuro ke’nanga a’lampa.
5 Mingka siri’-siriki ke’nanga ammotere’ mange ri pa’rasanganna ke’nanga. Ri wattunna nipabattu mae ri Daud anjo passalaka, akkirimmi pasang sollanna ammantang anjo sikamma tunisuroa ri Yerikho sa’genna attimbo poleang janggo’na ke’nanga.
6 Nampa naassemmo kalenna tu Amon angkanaya anjo panggaukanna ke’nanga a’jari passabakkang nanimusumo ke’nanga ri Daud. Lanri kammana anjo assewami ke’nanga 20.000 jaina tantara tu Siria niaka ammantang ri Bet-Rehob siagang Zoba, siagang 12.000 jaina tantara battu ri Tob, kammayatompa karaenna pa’rasangang Maakha siagang 1.000 tau ana’ buana.
7 Nalangngere’na Daud anjo passalaka, nasuromi Yoab siagang sikontu tantarana maju angngewai musua.
8 Assulu’mi tu Amon siagang naatoro’mi barisanna ri dallekang pakke’bu’ lompona Raba ibukotana pa’rasanganna ke’nanga; nampa tu Siria, tu Tob siagang Maakha naatoroki barisanna ke’nanga ri paranga.
9 Naciniki Yoab angkana niepeki ri pasukanna musua battu ri dallekang siagang battu ri boko. Lanri kammana anjo napileimi tantara Israel kaminang bajika nampa naboli’ assidallekang siagang tantara Siria.
10 La’binnaya battu ri tantara Israel napassareangi mae ri Abisai andi’na, angngatoroki barisanna ke’nanga assidallekang siagang tantara Amon.
11 Nakana Yoab ri anjo andi’na, "Punna tenamo kukkulle attahang andallekangi tantara Siria, akkaro-karoko ambantua’; na kabalekanna, punna tenamo nukkulle attahang andallekangi tantara Amon, labattua’ ambantuko.
12 Pakajarreki nyawanu. Umba kibarjuang siagang barani untu’ bansata siagang untu’ kota-kotaNa Allata’alata. Dasi-dasi naNagaukang Batara apa Nakaerokia."
13 Majumi Yoab siagang pasukanna a’bundu’, sa’genna larimo tantara Siria.
14 Ri wattunna nacini’ tu Amon angkanaya larimi tantara Siria, lari tommi ke’nanga ambokoi Abisai nampa ammunduru’ antama’ ri kotaya. Le’baki nabunduki tu Amon, ammotere’mi Yoab mange ri Yerusalem.
15 Naassemmi kalenna tu Siria angkanaya nibetami ke’nanga ri tu Israel, lanri kammana anjo nakio’mi ke’nanga sikontu pasukanna sollanna a’rappungang ammotere’.
16 Nampa nasuro kio’ Karaeng Hadadezer tu Siria niaka irayanganna Binanga Efrat, sa’genna battumo ke’nanga mange ri Helam nipimping ri Sobakh, panglima tantarana Karaeng Hadadezer battu ri Zoba.
17 Nalangngere’na Daud anjo passalaka, napa’rappungammi linta’ sikontu pasukang Israel, nampa a’limbang ri Binanga Yordan, nampa maju mange ri Helam. Anjorengi naatoro’ tu Siria barisanna ke’nanga nampa maju ambunduki pasukanna Daud.
18 Mingka nitunrungi ri tu Israel tantarana tu Siria. Daud siagang pasukanna nabunoi 700 tau paerang kareta pa’bundukang, siagang 40.000 tau tantara a’jarang; pantaranganna anjo Sobakh, panglima tantarana musua sarring tongi loko’na sa’genna mate ri tampa’ pa’bundukanga.
19 Ri wattunna sikamma karaeng nikoasaia ri Hadadezer nacini’mi angkanaya nibetami ke’nanga ri tantara Israel, napala’mi ke’nanga assibajiki nampa tundu’ mae ri tu Israel. Appakkaramula anjo wattua tenamo nabarani tu Siria ambantui tu Amon.
sabda_ylsa
Yayasan Lembaga SABDA
sabda_ylsa
Selengkapnya
SABDA Alkitab
Podcast SABDA
Slideshare SABDA