Loading audio...
Error: Maaf, audio tidak dapat diputar.
(It seems your browser does not support HTMLMediaElement.playbackRate, so you will not be able to change the speech rate.)
Catatan: Perhitungan audio timestamp (ketepatan waktu antara audio dan teks) berdasarkan perhitungan mesin / algoritma.
1 Lanai ndekah kenca si e mate Nahas raja Amon, janah anakna Hanun jadi raja.
2 Nina Raja Daud, "Arus maka kucidahken kesetianku erteman man Hanun bali ras si ilakoken bapana Nahas man bangku." Emaka isuruh Daud utusen ncidahken maka ia pe ikut rate ceda.
3 Kenca seh utusen e i Amon nina peminpin bangsa Amon man Raja Hanun, "Ula iakapdu maka Daud ngutus persuruhenna ku jenda guna nghamati bapandu! Isuruhna persuruhen e jadi mata-mata mpergermetken kota enda, guna nalukenca!"
4 Itangkap Hanun utusen Daud, icukurna janggutna sembelah, ikeretna uisna ngayak buta-butana, jenari ipelawesna.
5 Mela kal iakap kalak e, emaka la ia pang mulih. Kenca ibegi Daud si nggo jadi, itenahkenna kata maka kalak enda arus tading i Jeriho janah la mulih seh janggutna turah ka.
6 Bangsa Amon nggejap maka ia ermusuhen ras Daud. Emaka isewana 20.000 kalak tentera Siria si ringan i Betrehop ras Sobah 12.000 kalak i Tob nari, ras 1.000 i Maaka nari.
7 Ibegi Daud kerna si e emaka isuruhna Joap ras kerina tenterana ngelawanca.
8 Bangsa Amon maju, inganna i lebe pintun gerbang ibu kotana Raba. Si deban bangsa Siria, kalak i Tob nari ras kalak Maaka muat ingan i bas mbalmbal.
9 Asum idah Joap tentera musuh nandangi nerang i lebe ras i pudi nari, ipilihna tentera Israel si merawana. Iaturna petala-tala ras bangsa Siria.
10 Si lebihna isuruhna ipinpin seninana Abisai, si ngaturkenca petala-tala ras bangsa Amon.
11 Nina Joap man seninana e, "Adi idahndu bangsa Siria mulai naluken aku reh kam janah sampati aku, bage pe adi bangsa Amon mulai naluken kam reh aku nampati kam.
12 Jadilah megegeh janah ula mbiar! Erperanglah kita asa gegehta guna bangsanta ras guna kota-kota Dibatanta. Janah peraten Dibatalah jadi!"
13 Asum Joap ras tenterana maju ngelawan, kiamen bangsa Siria.
14 Kenca idah bangsa Amon maka bangsa Siria nggo kiam, emaka kiam ka bangsa Amon nadingken Abisai mundur ku bas kota. Kenca bage mulih Joap i bas peperangen e nari ku Jerusalem.
15 Ieteh bangsa Siria maka ia nggo italuken bangsa Israel, emaka ipepulungna kerina tenterana.
16 Idilo Raja Hadadeser kalak Siria si ringan arah Timur Lau Eprat, emaka reh kalak ku Helam i teruh pinpinen Sobah, puanglima perang Raja Hadadeser i Sobah nari.
17 Kenca ibegi Daud kerna si e, minter ipepulungna tentera Israel, ikeparina Lau Jordan, jenari erdalan ia ku Helam. I bas ingan eme kalak Siria ngatur barisenna ngalaken Daud. Perang mulai.
18 Emaka iasak Israel tentera Siria mundur, Daud ras tenterana munuh 700 tentera Siria si ergereta perang janah 40.000 tentera si erkuda. Puanglima Sobah luka, jenari mate i bas perang e.
19 Kenca igejap raja-raja si ijajah Raja Hadadeser maka nggo ia italuken Israel ibahanna perdamen, emaka jadi jajahen Israel ia. Jenari lanai pang bangsa Siria tole nampati bangsa Amon.
sabda_ylsa
Yayasan Lembaga SABDA
sabda_ylsa
Selengkapnya
SABDA Alkitab
Podcast SABDA
Slideshare SABDA