Alkitab Karaoke

Loading audio...

Catatan: Perhitungan audio timestamp (ketepatan waktu antara audio dan teks) berdasarkan perhitungan mesin / algoritma.

¹ Appialimi Elisa angkana, "Pilangngeri anne apa Napaua Batara! Ammuko kira-kira ri wattu kamma-kammaya anne, lanri se’reji bawang doe’ pera’ akkullei taua ammali tallu kilo gandung kaminang bajika yareka annang kilo gandung maraengannaya."

² Appialimi pambantuna karaenga angkana, "Kemae lakkulle! Tena nantama ri akkala’ anjo kammaya, manna pole Nappaturung bosi lompo Batara battu ri langika ri kamma-kammaya anne!" Appialimi Elisa angkana, "Sinampe’ nanuciniki kajariang anjo passalaka, mingka ikau tena nalanukasia’ manna sike’de’ anjo kanrea."

³ Anjo alloa nia’ appa’ tau garring sala ri pantaranganna pakke’bu’ lompona Samaria. Sipa’bicarai para ia ke’nanga angkana, "Apa matu-matunta ammantang anrinni antayangi kamateanga?

⁴ Punna antamakki’ ri kotaya, lamate naalleki’ cipuru’; na punna ammantangki’ anrinni lamate tonjaki’. Umba baji’ ki’lampa mange ri pakkemaanna tu Siria. Kaminang bellana nanabunoki’ ke’nanga. Mingka akkulle tongi tenaja naapa-apaiki’."

⁵ Ri wattunna lappakkaramulamo sassang, a’lampami ke’nanga mange ri pakkemaanna tu Siria, mingka tena manna sitau nacini’ ke’nanga anjoreng.

⁶ Nasaba’, nia’mo Napappilangngerang Batara mae ri ke’nanga sangkamma sa’ra gamarrung pasukang lompo a’jarang siagang angngerang kareta maju ero’ ambunduki ke’nanga. Nakapangi tu Siria angkanaya le’baki karaeng Israel ambayaraki karaeng Het siagang Mesir kammayatompa tantarana untu’ ambunduki ke’nanga.

⁷ Lanri kammana anjo ia memang anjo bangngia larimi ke’nanga ampasalamaki kalenna, siagang nabokoimi kemana, jaranna siagang keledaina, nabokoi bawang-bawang kabusuki ri pakkemaanga.

⁸ Anjo appaka tau garring sala battui mange ri birinna anjo pakkemaanga, siagang antama’mi ke’nanga ri kalase’renna kemaya. Angnganre siagang anginummi ke’nanga anjoreng kammayatompa angngallemi ke’nanga bulaeng, pera’ siagang siapa are jaina pakeang nampa a’lampa ke’nanga mange ancokkoi. Le’baki anjo ammotere’mi pole ke’nanga nampa antama ri kema maraenga nampa nagaukammo pole kamma nagaukanga ke’nanga sumpaeng.

⁹ Nakanamo massing para ia ke’nanga, "Kodi anne panggaukanta. Anne kabaraka kabara’ baji’, jari siratanna musti nipaui anne. Punna attayangki’ sa’genna ammuko, ma’nassa nihukkungki’. Bajiki punna nilaporo’ anne passalaka mae ri balla’na karaenga."

¹⁰ Lanri kammana anjo ammotere’mi ke’nanga mange ri Samaria nampa akkio’ mae ri pangawala’na pakke’bu’ lompona kotaya, angkana, "Le’baki kambe a’lampa mange ri pakkemaanna tu Siria, nampa tena sikalimo tau anjoreng. Narapikangi kambe jaranna siagang keledaina ke’nanga nia’ ngasengiji tappaukang ri tampa’na, nampa kemana ke’nanga nabokoi bawang-bawanji."

¹¹ Napa’gorammi sikamma pangawalaka anjo kabaraka, sa’genna nipabattu ri taua anjo kabaraka mange ri balla’na karaenga.

¹² Anjo wattua bangngi iji, mingka assulu’mi karaenga battu ri kamara’ katinroanna nampa nakana mae ri sikamma pangawalaka, "Pilangngeri anne kanangku! Kuassengi anjo rancanana tu Siria! Naassengi ke’nanga angkanaya anne ikatte naalleki’ cipuru’, jari lanri kammanami anjo nanabokoi pakkemaanna ke’nanga nampa a’lampa accokko ri paranga untu’ angngeppangki’ sollanta assulu’ a’boya kanre. Le’baki anjo nabakkai maki’ nampa naempoi kotaya."

¹³ Nia’mo se’re pangawala’na karaenga angkana, "Karaeng, ikatte niaka ija lalang ri anne kotaya sangkamma le’ba’ji sarenta siagang ke’nanga mateamo. Lanri kammana anjo bajiki punna nia’ siapa are tau a’dongko’ limang kayu jarang niaka ija nampa a’lampa ke’nanga mange anjoreng untu’ anciniki apa le’baka kajariang."

¹⁴ Jari napileimi ke’nanga siapa are tau nampa nasuro karaenga anjo ke’nanga a’dongko’ ri rua kareta pa’bundukang a’lampa mange ansalidiki apa le’baka kajariang mae ri tantara Siria.

¹⁵ A’lampami ke’nanga sa’genna mange ri Binanga Yordan. Ri tangngana aganga jaimi nacini’ ke’nanga pakeang siagang pakkakasa’ tassiara’ mange-mange. Yangasenna anjo apa-apaya nipasambila kammajinjo bawang ri tu Siria ri wattunna lari ke’nanga. Ammotere’mi anjo sikamma tunisuroa nampa a’laporo’ mae ri karaenga.

¹⁶ Jari larimi pandudu’na Samaria assulu’ ri kotaya nampa naalle kabusu’ apa-apa niaka ri pakkemaanna tu Siria. Sangkamma apa le’baka Napau Batara, kajariang tojemmi angkanaya tallu kilo gandung kaminang baji’ yareka annang kilo gandung biasa ballinna se’reji doe’ pera’.

¹⁷ Sitabangi anjo wattua pambantu kalenna karaenga tugasa’ anjagai pakke’bu’ lompona kotaya. Matemi anjoreng nionjo’-onjokang ri ra’yaka. Kajariammi anjo kammaya situru’ kana le’baka napau Elisa mae ri karaenga ri wattunna battu karaenga mae ri ia.

¹⁸ Le’ba’mi napau Elisa angkanaya kira-kira wattu kammaya anjo ammuko, tallu kilo gandung kaminang baji’ yareka annang kilo gandung biasa lanibalukangi se’re bawang doe’ pera’.

¹⁹ Na anjo wattua angkanami anjo pambantuna karaenga, "Kemae lakkulle! Tena nantama ri akkala’ anjo kammaya, manna pole Nappaturung bosi lompo Batara battu ri langika ri kamma-kammaya anne!" Nampa nipiali ri Elisa angkana, "Sinampe’ nanuciniki kajariang anjo passalaka, mingka ikau tena nalanukasia’ manna sike’de’ anjo kanrea."

²⁰ Kammami anjo kajariang mae ri anjo taua — matei nionjo’-onjokang ri ra’yaka ri pakke’bu’ lompoa.

2 Raja-raja

Video 2 Raja-raja 7

Ikuti Kami:

KONTAK | PARTISIPASI | DONASI