Alkitab Karaoke

Loading audio...

Catatan: Perhitungan audio timestamp (ketepatan waktu antara audio dan teks) berdasarkan perhitungan mesin / algoritma.

¹ Ngaloi Elisa, "Begikenlah kai si ikataken TUHAN! I bas paksa si genduari ka pagi banci itukurndu i Samaria telu kilo gandum si mejilena ntah pe enem kilo gandum si kurang ulina lau sada duit pirak."

² Tapi nina ajudan raja man Elisa, "Labo tuhu; bicara minter pe ipesusur TUHAN udan, si e labo banci jadi!" "Iidahndu me si enda jadi, tapi ndigan pe lanai ipanndu pangan e," nina Elisa erjabap.

³ Lit empat kalak si penakit kulitna bahaya kal, sangana i darat pintu gerbang kota Samaria nina sapih-sapih ia, "Kai gunana sitimai i jenda ngayak kita mate?

⁴ Bengket ku bas kota, e pe labo lit gunana, sabap mate kelihen kita i je. Tapi bicara sitimai pe i jenda mate kang kita. Emaka otalah kita lawes ku ingan erkemah kalak Siria e; ma ibunuhna ngenca kita, tapi banci ka ipelepasna kita nggeluh."

⁵ Emaka kenca nggo mulai gelap, lawes ia empatna ku ingan kalak Siria e erkemah. Tapi kenca seh la ise pe i je.

⁶ Ibahan TUHAN maka tentera kalak Siria e megi tempa-tempa bagi sora kerehen tentera si nterem, rikut ras gereta perang. Iakap kalak Siria maka raja Israel nggo newa raja-raja ras tentera kalak Heti ras kalak Mesir guna merang ia.

⁷ Erkiteken si e, i bas berngi e kiam kerina kalak Siria ngkelini geluhna: itadingkenna kemahna, kudana, ras kaldena. Kemahna pe itadingkenna bage saja.

⁸ Kenca si empat kalak ndai seh i duru ingan erkemah e, bengket ia ku sada kemah. Ipanganina ras inemina kai si lit i je, ibuatna pirak, emas ras uis si ijumpaina, emaka lawes ia munikenca. Kenca bage mulihken ia, ibengketina kemah si deban, janah bage ka nge perbahanna.

⁹ Tapi dungna nina sapih-sapih ia, "La patut perbahanta enda! Lit i bas kita berita si mehuli, emaka la patut sisinikken saja. Adi sitimai ngayak pepagi maka sikataken, la banci lang kena ukum kita. Otalah kita lawes minter, gelah si kataken man pegawai raja!"

¹⁰ Emaka itadingken kalak ndai ingan erkemah tentera Siria e, mulihken ia ku Samaria. Ilebuhkenna penjaga-penjaga gerbang Nina "Ndai nggo kami ku ingan erkemah tentera Siria janah la lit ise pe idah ntah ibegi kami. Kerina kuda ras kalde tambat denga, janah kemah-kemah bali denga ras sanga itadingken kalak Siria e."

¹¹ Imomoken penjaga gerbang berita e, emaka iberitaken i bas istana raja.

¹² Tupung si e berngi denga, tapi ndarat raja i bas ingan medem nari nina man pegawaina, "Nta kuturiken man bandu rencana kalak Siria e. Ietehna maka kita kelihen i jenda, emaka itadingkenna inganna erkemah, jenari cebuni ia i mbal-mbal. Iakapna sitadingken kota guna ndarami pangan, kenca bage itangkapna kita geluh-geluhen janah ikuasaina kotanta."

¹³ Sekalak pegawai raja ngataken, "Kugapa pe kalak kuta enda nandangi bene nge kerina, bali ras kalak si nggo leben mate e. Emaka sisuruhlah piga-piga kalak gelah sieteh kai kin si nggo jadi, ngersak kuda si lima si tading denga."

¹⁴ Emaka ipilih kalak ndai piga-piga kalak dilaki. Isuruh raja ia lawes tare dua gereta perang nina, "To pepayo, ntah kai nggo jadi man tentera Siria e."

¹⁵ Lawes kalak ndai seh Lau Jordan, janah gedang-gedang dalan idahna uis ras perkakas si itadingken tentera Siria tupung ia kiam. Kenca bage mulihken kalak ndai ngelapor man raja.

¹⁶ Emaka kiamen ndarat kalak Samaria ngerampasi isi kemah tentera Siria. Erkiteken si e, sue ras si nggo ikataken TUHAN, telu kilo gandum si mejile ntah pe enem kilo gandum si kurang ulina, ergana sada duit pirak nge ngenca.

¹⁷ Rembang tupung si ndai raja nugasken ajudanna njagai pintu gerbang kota. Iperjaki jelma si nterem ia i je seh mate, sue ras si nggo leben ikataken Elisa asum raja njumpai ia.

¹⁸ Nderbihna nggo ikataken Elisa man raja nina, "Genduari-genduari ka pagi, telu kilo gandum si mejilena ntah enem kilo gandum si kurang uli, ergana sada duit pirak ngenca."

¹⁹ Nina ajudan e ngaloisa, "Labo tuhu, labo banci jadi e aminna minter pe ipesusur TUHAN udan!" Emaka erjabap Elisa, "Idahndu me si e jadi, tapi ndigan pe la ipanndu pangan e."

²⁰ Janah payo kal bage jadina man bana. Iperjaki jelma si nterem ia seh mate i pintu gerbang kota e.

2 Raja-raja

Video 2 Raja-raja 7

Ikuti Kami:

KONTAK | PARTISIPASI | DONASI