Loading audio...
Error: Maaf, audio tidak dapat diputar.
(It seems your browser does not support HTMLMediaElement.playbackRate, so you will not be able to change the speech rate.)
Catatan: Perhitungan audio timestamp (ketepatan waktu antara audio dan teks) berdasarkan perhitungan mesin / algoritma.
1 Ualuh tahun do umur ni si Josia sanggah na bangkit ai ia gabe raja, anjaha tolu puluh sada tahun do ia gabe raja i Jerusalem. Si Jedida do goran ni inangni, boru ni si Adaya hun Boskat.
2 Ihorjahon do rosuh ni uhur ni Jahowa, anjaha i irikkon do ganup dalan ni si Daud ompungni ai, anjaha seng marinpang ia hu siamun barang hu sambilou.
3 Dob marumur Raja Josia sapuluh ualuh tahun, isuruh raja ai ma si Safan, anak ni si Asalya, anak ni si Mesullam, jurutulis ai, hu Rumah ni Jahowa, nini ma,
4 “Tangkog ma ham marayak sintua ni Malim Hilkia, ase ihira buei ni duit na binoan hu Rumah ni Jahowa, na pinatumpu-tumpu ni halak sijaga pintu hun bani bangsa in;
5 anjaha ibere ma ai hu bani halak haondosan ni horja i Rumah ni Jahowa, lanjar isuruh ma sidea mamberehon ai hu bani halak siparhorja i Rumah ni Jahowa, na mangumban rumah ai,
6 ai ma hu bani tuhang hayu, hu bani halak sipauli rumah ai, hu bani tuhang batu pakon hu bani halak siboli parhayu pakon batu na binarbar laho pabayuhon rumah ai.
7 Tapi seng pala mambahen parhiraan sidea pakon halak haondosan ni duit ai, ai maningon marsihatengeran do sidea.”
8 Dob ai nini si Hilkia, sintua ni malim ai ma hu bani si Safan, jurutulis ai, “Jumpah ahu do buku titah i Rumah ni Jahowa.” Jadi ibere si Hilkia ma buku ai hu bani si Safan, anjaha ibasa ma ai.
9 Jadi laho ma si Safan, jurutulis ai hu bani raja ai, patugahkon barita ai hu bani raja ai, “Domma ibuat juakjuakmu duit na jumpah i rumah ai, anjaha na ondoskon do ai hu bani halak haondosan ni horja i Rumah ni Jahowa.”
10 Ambahni ai nini si Safan jurutulis ai ope hu bani raja ai, “Ibere Malim Hilkia do sada buku hu bangku.” Jadi ibasa si Safan ma buku ai i lobei ni raja ai.
11 Jadi dob ibogei raja ai hata ni buku titah ai, irigati ma hiouni.
12 Dob ai iparentahkon raja ai ma hu bani si Hilkia, malim ai, hu bani si Ahikam, anak ni si Safan, si Akbor, anak ni si Mikaya, pakon hu bani si Safan, jurutulis ai, ampa si Asaya, siparugas bani raja ai,
13 “Laho ma nasiam, sungkun nasiam ma Jahowa pasal ahu, pasal bangsa in, pakon pasal ganup Juda, halani hata ni buku na jumpah on, ai banggal tumang do ringis ni Jahowa na gajak dompak hita, halani na so itangihon ompungta hata ni buku on, laho mangkorjahon romban hu bani ganup na tarsurat ijon dompak hita.”
14 Dob ai laho ma Malim Hilkia, si Akbor, si Safan pakon si Ahikam, si Asaya marayak nabi naboru Hulda, parinangon ni si Sallum, siramotkon pakeian ai, anak ni si Tikwas, anak ni si Harhas. Marianan do ia i Jerusalem, bani huta na baru ai; jadi marsahap ma sidea pakonsi.
15 Dob ai nini si Hulda ma hu bani sidea, “Sonon do hata ni Jahowa, Naibata ni Israel, Hatahon ma hu bani halak na marsuruh nasiam hu bangku,
16 Sonon do hata ni Jahowa, ʻTonggor ma, parohonku ma hamagouan hu huta on pakon hu bani jolma pangisini in, romban hu bani haganup hata ni buku on, na dob binasa ni Raja Juda.
17 Halani na dob tinadingkon ni sidea ai Ahu, anjaha manutung dahupa sidea hu bani naibata na legan, laho mamuhoi ringis-Ku marhitei ganup pambahenan ni tangan ni sidea, halani ai maningon gajak do ringis-Ku dompak ianan on, anjaha seng be tarintopi.
18 Tapi anggo hu bani Raja Juda, na marsuruh nasiam laho manungkun hu bani Jahowa,ʼ sonon ma hatahon nasiam hu bani, sonon do hata ni Jahowa, Naibata ni Israel, ʻAnggo pasal hata na dob binogeimin,
19 halani na dob mangahap uhurmu, anjaha ipaunduk ho uhurmu i lobei ni Jahowa, sanggah na ibogei ho hata, na dob Hulumbahon in dompak huta on, pakon dompak pangisini, paboa na maningon gabe halimisan do in, anjaha sibursikkonon ni halak, anjaha na dob irigati ho hioumu anjaha tangis ho i lobei-Hu, Ahu pe domma hutangihon ho,ʼ nini Jahowa.
20 Halani ai, tonggor ma, Ahu sandiri do na patumpuhon ho hu bani ompungmu, gabe sonang do patumpuon hubagas tanomanmu, ase seng sampang idahon ni matamu haganup hamagouan, na sihol parohon-Ku hu huta on.” Jadi iboan sidea ma hata ai hu bani raja ai.
sabda_ylsa
Yayasan Lembaga SABDA
sabda_ylsa
Selengkapnya
SABDA Alkitab
Podcast SABDA
Slideshare SABDA